باسپانا نارىعىندا باعا قالاي وزگەرىپ جاتىر

 ۇلتتىق ستاتيستيكا بيۋروسى تۇرعىن ءۇي نارىعىنداعى احۋال جونىندە مالىمەت ۇسىندى، دەپ حابارلايدى Kazinform اگەنتتىگى. 

اتاپ ايتقاندا، بيىلعى جانە بىلتىرعى قىركۇيەك ارالىعىنداعى باعانى سالىستىرعاندا:

جاڭا تۇرعىن ۇيلەردى ساتۋ 5,7 پايىز قىمباتتادى،

پاتەرلەردى قايتا ساتۋ 3,9 پايىز ارزاندادى،

اباتتاندىرىلعان تۇرعىن ءۇيدى جالعا الۋ 0,2 پايىز تومەندەدى.

جاڭا سالىنعان ۇيلەر ەداۋىر قىمباتتاعان وڭىرلەر:

پاۆلودار - 18,9 پايىز،

سەمەي - 16 پايىز،

اقتاۋ - 11,7 پايىز.

قولدانىستاعى باسپانا باعاسى ەڭ كوپ كوتەرىلگەن قالالار:

سەمەي - 25,3 پايىز،

قىزىلوردا - 14,6 پايىز،

تالدىقورعان - 9,7 پايىز.

جالعا بەرىلەتىن باسپانا قۇنى قىمباتتاعان قالالار:

قاراعاندى - 24,8 پايىز،

قونايەۆ - 24,6 پايىز،

قىزىلوردا - 22,5 پايىز.

جالپى، تۇرعىن ءۇيدى الىپ-ساتۋ بويىنشا بيىلعى قىركۇيەك ايىندا 35398 مامىلە جاسالعان. ونىڭ ىشىندە جەكە ۇيلەر - 8815، كوپپاتەرلى ۇيدەگى باسپانا - 26583. 2023 -جىلدىڭ تامىزىمەن سالىستىرعاندا (38810) ءۇي نارىعىنداعى مامىلەلەر سانى 8,8 پايىز ازايعان.

ءۇي ساۋداسى استانا (6731 - 19 پايىز) جانە الماتى (6436 - 18,2 پايىز) قالالارى مەن قاراعاندى وبلىسىندا (3041 - 8,6 پايىز) كوپ بولعان. باسپانا ەڭ از ساتىلعان ءوڭىر - ۇلىتاۋ، 319 بىرلىك (0,9 پايىز).

بيىلعى قىركۇيەكتە باسپانانى ساتۋ-ساتىپ الۋ كەلىسىمدەرى بىلتىرعى قىركۇيەكپەن سالىستىرعاندا 2,3 پايىز ازايعان، ول كەزدە 36241 مامىلە رەسىمدەلگەن بولاتىن. ازايۋدىڭ ەڭ جوعارعى كورسەتكىشى تۇركىستان وبلىسىندا (26 پايىز) تىركەلدى. ال سولتۇستىك قازاقستان وبلىسىندا باسپانا ساۋداسى كەرىسىنشە، ارتقان (22,1 پايىز).