باسپانا، مەكتەپ، سۋ قۇبىرلارى: انتيكور قۇرىلىسى ۇزاققا سوزىلعان جوبالاردى باقىلاۋعا الدى

استانا. KAZINFORM - سىبايلاس جەمقورلىققا قارسى ءىس- قيمىل اگەنتتىگى قۇرىلىسى ۇزاققا سوزىلعان الەۋمەتتىك نىسانداردى سۇيەمەلدەۋ جانە مونيتورينگتەۋ جۇمىستارىن جالعاستىرادى.

بيىل قۇرىلىسى 4 جىلعا دەيىن سوزىلعان 6 پروبلەمالىق نىسان قولدانىسقا بەرىلدى. قازىر ەل بويىنشا قۇرىلىسى ۇزاققا سوزىلعان 152 نىسان اگەنتتىك باقىلاۋىندا تۇر.

قۇرىلىسى ۇزاققا سوزىلعان نىسانداردى سۇيەمەلدەۋ جوباسى 2023 -جىلدىڭ قازان ايىندا ىسكە قوسىلعان ەدى. وسى ساتتەن بەرى 87 نىساننىڭ قۇرىلىسى اياقتالدى. ولاردىڭ قاتارىندا مەكتەپتەر، تۇرعىن ۇيلەر، سپورتتىق جانە مادەني نىساندار، سونداي-اق كوپىرلەر مەن سۋ قۇبىرى جەلىلەرى بار.

− ەڭ كوپ نىسان قۇرىلىسى اياقتالعان ءوڭىر - پاۆلودار وبلىسى (14)، اقتوبە وبلىسى (10)، قىزىلوردا وبلىسى (8) جانە استانا قالاسى، تۇركىستان، اقمولا جانە باتىس قازاقستان (6) وبلىستارى كوش باستاپ تۇر. بۇل جوبالاردىڭ بارلىعى تۇرعىندار ءۇشىن، اسىرەسە شالعاي، اۋىلدىق ەلدى مەكەندەردەگى حالىق ءۇشىن اسا ماڭىزدى. ەندى مىڭداعان بالانى ساپالى بىلىممەن قامتيتىن 20 مەكتەپ، كوپبالالى وتباسىلار مەن جەتىم بالالارعا ارنالعان 12 تۇرعىن ءۇي قولدانۋعا بەرىلدى، − دەدى دانيار بيگايداروۆ سىبايلاس جەمقورلىققا قارسى قىزمەتتە وتكەن بريفينگتە.

سونىمەن بىرگە، 9 سپورت نىسانى، 8 مادەنيەت جانە دەمالىس نىسانى، 4 دەنساۋلىق ساقتاۋ نىسانى جانە 4 كوپىر مەن 3 بالاباقشا اشىلادى.

تازا اۋىز سۋمەن قامتاماسىز ەتۋگە دە ەرەكشە كوڭىل ءبولىنىپ وتىر. ناتيجەسىندە 26 ەلدى مەكەن تازا سۋعا قول جەتكىزدى، بۇل جەرگىلىكتى تۇرعىنداردىڭ ءومىر ساپاسىنا تىكەلەي اسەر ەتەدى. پاۆلودار وبلىسىندا كۇركەلى، باياناۋىل جانە شۇعا اۋىلدارىندا سۋ قۇبىرى جەلىلەرى ىسكە قوسىلدى. بۇل جوبالار 400-دەن استام ءۇي شارۋاشىلىعىن تازا اۋىز سۋمەن قامتاماسىز ەتتى.

− سولتۇستىك قازاقستان وبلىسىنداعى سەرگەيەۆكا قالاسىندا ءۇش جىل بويى كۇتكەن 27 پاتەرلى تۇرعىن ءۇي پايدالانۋعا بەرىلدى. بۇل ءۇي 2022 -جىلى اياقتالۋى كەرەك ەدى. پاتەرلەر كوپبالالى وتباسىلارعا، جەتىم بالالارعا جانە الەۋمەتتىك وسال توپتارعا بەرىلدى. قوستاناي قالاسىندا 45 پاتەرلى تۇرعىن ءۇي قۇرىلىسى اياقتالىپ، كەشىگىپ بولسا دا پايدالانۋعا بەرىلدى. اتىراۋ وبلىسىنىڭ سارى توعاي اۋىلىندا مادەنيەت ءۇيىنىڭ قۇرىلىسى اياقتالدى. بۇل نىساننىڭ قۇرىلىسى 8 جىلعا سوزىلعان بولاتىن، − دەدى رەسمي وكىل.

2025 -جىلدىڭ ەكىنشى توقسانىندا ەلدىڭ ءتۇرلى وڭىرلەرىندە تاعى 15 نىساننىڭ قۇرىلىسى اياقتالادى دەپ جوسپارلانعان. ولاردىڭ قاتارىندا اقمولا، شىعىس قازاقستان، پاۆلودار، جامبىل، اقتوبە، قوستاناي، تۇركىستان، ۇلىتاۋ وبلىستارى مەن الماتى، شىمكەنت قالالارى بار. بۇل جوبالار تۇرعىن ۇيلەرمەن قاتار، مەكتەپتەر، سپورت جانە مادەنيەت نىساندارى سياقتى الەۋمەتتىك ينفراقۇرىلىم نىساندارىن قامتيدى.

ايتا كەتەيىك، 2022 -جىلدان بەرى مەملەكەتكە جانە كۆازيمەملەكەتتىك سەكتور سۋبەكتىلەرىنە 1 تريلليون 130 ميلليارد تەڭگەدەن استام اكتيۆ قايتارىلدى. اكتيۆتەردىڭ ەداۋىر بولىگى - 670 ميلليون ا ق ش دوللارى شەتەلدەن قايتقان.

سىبايلاس جەمقورلىقتان تاركىلەنگەن اقشاعا ەلىمىزدە 89 مەكتەپ سالىنىپ جاتىر.

اۆتور

ايجان سەرىكجان قىزى