ال تىڭ باستامالارىن جۇزەگە اسىرعىسى كەلەتىن جاستارعا 3 ميلليون تەڭگەگە دەيىن گرانت بەرىلەدى. جاستارعا ارنالعان مۇمكىندىكتەر تۋرالى ەلوردادا وتكەن جيىندا مادەنيەت جانە اقپارات مينيسترلىگى جاستار جانە وتباسى ىستەرى كوميتەتىنىڭ ءتوراعاسى قايرات قامباروۆ ايتىپ بەردى.
بۇگىن استانادا ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە «ۇلتتىق دامۋ كۇن تارتىبىندە - جاستار» اتتى ساراپشىلىق ديالوگ الاڭى ءوتتى.
جيىندا مەملەكەت باسشىسى قاسىم-جومارت توقايەۆتىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى جولداۋىندا بەلگىلەنگەن ستراتەگيالىق باسىمدىقتارى تالقىلاندى.
جيىندا جاستار جانە وتباسى ىستەرى كوميتەتىنىڭ ءتوراعاسى قايرات قامباروۆ بۇگىندە قازاقستانداعى جاستار سانى 6 ميلليونعا جۋىقتاعانىن اتاپ ءوتتى.
- قازىرگى كەزدە جاستار ەل حالقىنىڭ ۇشتەن بىرىنە جۋىق بولىگىن قۇرايدى. سوندىقتان ولاردىڭ قوعامدىق ومىرگە بەلسەندى ارالاسۋى، مەملەكەتتىك باستامالاردى جۇزەگە اسىرۋعا قاتىسۋى جانە ەل دامۋىنا ۇلەس قوسۋى ماڭىزدى، - دەدى سپيكەر.
12400 جاس وتباسى باسپانالى بولدى
ونىڭ سوزىنشە، جاستاردى تولعاندىراتىن نەگىزگى ماسەلەلەردىڭ ءبىرى - باسپانا. كوميتەت ءتوراعاسىنىڭ دەرەگىنشە، ەلىمىزدىڭ 17 وڭىرىندە جاستارعا ارنالعان جەڭىلدەتىلگەن تۇرعىن ءۇي باعدارلامالارى جۇزەگە اسىرىلىپ جاتىر. وسى باعدارلامالاردىڭ كومەگىمەن 12400 جاس وتباسى باسپانالى بولعان.
- سونىمەن قاتار وتباسى بانك سالىمشىلارىنىڭ 42 پايىزدان استامىن 35 جاسقا دەيىنگى ازاماتتار قۇرايدى. ولاردىڭ سانى 283 مىڭنان اسادى. بۇدان بولەك، اۋىلدى جەرلەرگە جۇمىس ىستەۋگە باراتىن جاس ماماندار ءۇشىن دە تۇرعىن ءۇي ساتىپ الۋعا مۇمكىندىك بەرەتىن قولداۋ شارالارى قاراستىرىلىپ وتىر. اتاپ ايتقاندا، باسپانا الۋعا بەرىلەتىن بيۋدجەتتىك نەسيە كولەمى 10 ميلليون تەڭگەدەن اسادى، - دەدى قايرات قامباروۆ.
بۇدان باسقا، نەسيەلىك تۇرعىن ءۇي قۇرىلىسىن قارجىلاندىرۋعا ارنالعان جىلدىق 2,5 پايىزدىق جەڭىلدەتىلگەن قاراجات كولەمى ۇلعايتىلعان. باسپانا كەزەگىنە تۇرۋ جانە تۇرعىن ءۇيدى ءبولۋ ۇدەرىسى دە اۆتوماتتاندىرىلعان.
كوميتەت ءتوراعاسىنىڭ ايتۋىنشا، مۇنداي باعدارلامالار جاستاردىڭ تۇرمىس ساپاسىن جاقسارتىپ قانا قويماي، ولاردىڭ ءوز وڭىرىندە تۇراقتاپ قالۋىنا دا ىقپال ەتەدى.
جاستاردىڭ 30 جوباسىنا 3 ميلليون تەڭگەدەن بەرىلەدى
مەملەكەت جاستاردىڭ شىعارماشىلىق، عىلىمي جانە كاسىپكەرلىك باستامالارىن قولداۋعا دا قارجى ءبولىپ وتىر. سونىڭ ءبىرى - جىل سايىن جۇزەگە اسىرىلاتىن «تاۋەلسىزدىك ۇرپاقتارى» گرانتى.
- بۇل باستاما اياسىندا رەسپۋبليكالىق دەڭگەيدە ۇزدىك دەپ تانىلعان 30 جوباعا 3 ميلليون تەڭگەدەن قارجىلاي قولداۋ كورسەتىلەدى. باعدارلامانىڭ نەگىزگى ماقساتى - جاستاردىڭ تىڭ يدەيالارىن جۇزەگە اسىرۋىنا مۇمكىندىك بەرۋ جانە ولاردىڭ ءوز الەۋەتىن دامىتۋىنا جاعداي جاساۋ. سونىمەن قاتار ەلىمىزدە دارىندى جاستاردى ىنتالاندىرۋعا باعىتتالعان «دارىن» مەملەكەتتىك جاستار سىيلىعى بار. ول ءتۇرلى سالادا جەتىستىككە جەتكەن جاستاردى قولداۋعا ارنالعان، - دەدى سپيكەر.
كوميتەت ءتوراعاسى جاستارعا قارجىلاي كومەك كورسەتۋمەن قاتار، ولاردىڭ ءوز بەتىنشە دامۋىنا مۇمكىندىك بەرەتىن جاعداي قالىپتاستىرۋ دا ماڭىزدى ەكەنىن جەتكىزدى.
جاستاردى جۇمىسپەن قامتۋعا قانداي جوبالار كومەكتەسەدى
جاستار ساياساتىنىڭ تاعى ءبىر ماڭىزدى باعىتى - جۇمىسپەن قامتۋ جانە كاسىبي بىلىكتىلىكتى ارتتىرۋ. بۇل رەتتە ءبىلىم بەرۋ جۇيەسى مەن ەڭبەك نارىعىنىڭ بايلانىسىن نىعايتۋعا باسىمدىق بەرىلىپ وتىر.
قايرات قامباروۆتىڭ ايتۋىنشا، استانادا «جول تاپ» باعدارلاماسى، ال باسقا وڭىرلەردە «تالاپتان - مۇمكىندىكتەر الاڭى» جوبالارى جۇزەگە اسىرىلىپ جاتىر.
- بۇل باستامالار جاستاردىڭ سۇرانىسقا يە ماماندىقتاردى مەڭگەرۋىنە جانە جۇمىسقا ورنالاسۋ ءۇشىن قاجەتتى پراكتيكالىق داعدىلاردى قالىپتاستىرۋىنا كومەكتەسەدى. سونىمەن قاتار سيفرلاندىرۋ مەن جاساندى ينتەللەكتتىڭ دامۋى جاستاردىڭ كاسىبي دايىندىعىنا جاڭا تالاپتار قويىپ وتىر. وسىعان بايلانىستى ولاردىڭ سيفرلىق ساۋاتتىلىعىن ارتتىرۋ، جاڭا تەحنولوگيالاردى مەڭگەرۋىنە جاعداي جاساۋ جانە يننوۆاتسيالىق ويلاۋ قابىلەتىن دامىتۋ ماڭىزدى، - دەدى ول.
«تازا قازاقستانعا» 2 ميلليوننان استام جاس قاتىستى
جاستاردىڭ قوعامدىق بەلسەندىلىگىن ارتتىرۋعا باعىتتالعان باستامالاردىڭ ءبىرى - «تازا قازاقستان» جالپىۇلتتىق اكتسياسى.
قايرات قامباروۆ كەلتىرگەن مالىمەتكە سايكەس، وسى باستاما اياسىندا ەلىمىزدە 7 مىڭعا جۋىق ءىس-شارا ۇيىمداستىرىلعان. ولارعا 2 ميلليوننان استام جاس قاتىسقان.
- ەكولوگيالىق مادەنيەتتى قالىپتاستىرۋ ءبىر رەتتىك سەنبىلىكتەرمەن شەكتەلمەۋى كەرەك. قورشاعان ورتاعا جاۋاپكەرشىلىكپەن قاراۋ جاستاردىڭ كۇندەلىكتى ءومىر سالتىنا اينالۋعا ءتيىس، - دەدى كوميتەت ءتوراعاسى.
سونىمەن بىرگە جيىندا جاستاردىڭ ازاماتتىق بەلسەندىلىگىن ارتتىرۋ، مەملەكەتتىك ينستيتۋتتارمەن جانە بيزنەس وكىلدەرىمەن ءوزارا بايلانىسىن نىعايتۋ ماسەلەلەرى دە قوزعالدى.
قايرات قامباروۆ جاستاردىڭ مەملەكەتتىك قولداۋ شارالارىن پايدالانۋمەن عانا شەكتەلمەي، ەلدەگى ەكونوميكالىق جانە قوعامدىق وزگەرىستەرگە بەلسەندى قاتىسۋى قاجەت ەكەنىن جەتكىزدى.
ايتا كەتەيىك، بۇعان دەيىن قازاقستاندا جاستار دەنساۋلىعىن نىعايتۋعا ارنالعان حالىقارالىق باعدارلاما ىسكە قوسىلعانى حابارلاندى.