باس پروكۋراتۋرا قارجى پيراميداسىن قۇرعاندار ەلدى قالاي اربايتىنىن ايتتى

استانا. قازاقپارات - 2024-جىلى قازاقستان باس پروكۋراتۋراسىنىڭ ازاماتتاردى قابىلداۋ ورتالىعىنا 5,5 مىڭنان استام ارىز يەسى كەلگەن.

- ولاردىڭ كوپشىلىگى قارجىلىق پيراميدالارعا قاتىستى شاعىممەن كەلگەن. قارجى پيراميداسىنىڭ قۇربانى بولماۋ جولدارىن ايتىپ، ءسىزدى ەسكەرتپەكشىمىز، - دەلىنگەن ۆەدومستۆو حابارلاماسىندا.

قارجى پيراميداسىنىڭ نەگىزگى بەلگىلەرى:

ليتسەنزياسىنىڭ/ەسەپتىك تىركەۋىنىڭ بولماۋى؛

بۇقارالىق اقپارات قۇرالدارىنداعى (ب ا ق) اگرەسسيۆتى جارناما؛

كومپانيانىڭ قىزمەت تۋرالى ناقتى مالىمەت جوق؛

ونىمدى/قىزمەتتى ساتىپ الۋعا كوندىرۋ جاعدايلارى.

پيراميدا ەكەنىن قالاي بىلۋگە بولادى:

ولار ادەتتە جارنامالاۋ كەزىندە مىنانداي سوزدەردى كوبىرەك قولدانادى:

جوعارى تابىستى بيزنەس؛

كەپىلدى تابىس؛

جوعارى تابىستى ونلاين جوبا؛

ونلاين تابىس؛

يننوۆاتسيالىق جوبا.

نەگىزگى ۇراندارى:

«اقشا تابۋعا اسىعىڭىز!»

«ءوز مۇمكىندىگىڭىزدى جىبەرىپ الماڭىز»

«قارىزدان قۇتىلاسىز!»

«بۇگىن ينۆەستيتسيالاڭىز!»

«سىزگە بانك باس تارتتى ما؟ ءبىز كومەكتەسەمىز!».

باس پروكۋراتۋرا قارجى پيراميداسىن قۇرعان ءۇشىن قىلمىستىق جاۋاپتىلىق كوزدەلگەنىن ەسكە سالدى.

- قىلمىستىق كودەكستىڭ 217-بابىندا مۇلكى تاركىلەنىپ بەس جىلدان ون ەكى جىلعا دەيىن باس بوستاندىعىنان ايىرۋ جازاسى قاراستىرىلعان. سونىمەن قاتار قارجى پيراميداسىن جارنامالاعان ءۇشىن قىلمىستىق كودەكستىڭ 217-1-بابىندا مۇلكى تاركىلەنىپ، ەكى مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا، التى ءجۇز ساعاتقا دەيىنگى مەرزىمگە قوعامدىق جۇمىستارعا تارتۋعا، ەكى جىلعا دەيىنگى مەرزىمگە باس بوستاندىعىن شەكتەۋگە، نە سول مەرزىمگە باس بوستاندىعىنان ايىرۋ جازاسى قاراستىرىلعان. سالعان اقشالاي قاراجاتتان ايىرىلىپ قالۋ قاۋپىن جانە تەرىس سالدارىن بولدىرماۋ ماقساتىندا ازاماتتاردى كۇماندى قارجى سحەمالارىنا قاتىسپاۋدى سۇرايمىز. ساق بولىڭىز! ارانداتۋشىلىققا بەرىلمەڭىز! وڭاي اقشا بولمايدى!، - دەپ ەسكەرتتى پروكۋراتۋرا.

ەگەر قارجى پيراميداسىنا تاپ بولدىم دەگەن كۇمان پايدا بولسا، سىزگە دەرەۋ تومەندە كورسەتىلگەن ورگاندارعا جۇگىنۋ قاجەت:

• تۇرعىلىقتى ورنىڭىز بويىنشا قۇقىق قورعاۋ ورگاندارىنا

• ق ر ىشكى ىستەر مينيستىرلىگىنە

• ق ر قارجىلىق مونيتورينگ اگەنتىگىنە

• ق ر قارجى نارىعىن رەتتەۋ جانە دامىتۋ اگەنتىگىنە جۇگىنۋ قاجەت.

وسىعان دەيىن ش ق و- دا ەكى قارجى پيراميداسىنا كىرگەن 250 ادام 400 ميلليون تەڭگە شىعىنعا باتقانىن جازعان ەدىك.