باس مۋفتي قازاقستاندىقتاردى ورازا ايت مەرەكەسىمەن قۇتتىقتادى

استانا. KAZINFORM - قازاقستان مۇسىلماندارى ءدىني باسقارماسىنىڭ ءتوراعاسى، باس مۋفتي ناۋرىزباي قاجى تاعان ۇلى قازاقستاندىقتارعا جىلى لەبىزىن ءبىلدىرىپ، ەل تىنىشتىعىن تىلەك ەتتى.

«سىزدەردى ءيسى مۇسىلماننىڭ ۇلىق مەيرامى - ورازا ايتتىڭ كەلۋىمەن شىن جۇرەكتەن قۇتتىقتايمىن! ايت قابىل بولسىن! قاسيەتتى رامازاننىڭ اياقتالعانىن بىلدىرەتىن مەيرامدا، جۇرەككە مەيىرىم، قۋانىش سەزىمى ۇيالايتىن ساۋلەلى ساتتە سىزدەرگە، وتباسىلارىڭىزعا رياسىز نيەتپەن اللانىڭ اماندىعى مەن بەرەكەسىن تىلەيمىن. جاراتقان جار بولسىن! اللا تاعالا وتىز كۇن بويى ۇستاعان ورازامىزدى، جاساعان دۇعامىزدى، ورىندى سەبەپتەرمەن اۋىز بەكىتە الماي قالعان جانداردىڭ قايىرلى امالدارىن قابىل ەتكەي!»، - دەدى باس مۋفتي.

«ايت» ءسوزى - مەرەكەلەۋ، حال سۇراسۋ، ءبىر-ءبىرىن قۋانتۋ، قۋانىشقا توپتالۋ، قارىمتا دەگەن ماعىنانى بىلدىرەدى.

«جاراتۋشى جاببار يەمىز: «...ولار مەن ءۇشىن ورازا ۇستادى، مەنىڭ پارمەنىممەن اۋىز اشتى، ەندى قۋانىشقا كەنەلسىن...»، - دەپ ءسۇيىنشى حابار جەتكىزگەن. جاراتۋشى يەمىز بارشا مۇسىلمان قاۋىمنىڭ قۋانىشىن ارتتىرعاي! قازاقستان مۇسىلماندارى ءدىني باسقارماسى قاسيەتتى رامازان ايىندا ەلىمىز بويىنشا قايىرىمدىلىق جوبالاردى جۇزەگە اسىردى. ساۋاپتار ەسەلەنىپ جازىلاتىن بەرەكەلى ايدا يگى ىسكە اتسالىسقان ەرىكتىلەرگە، دەمەۋشى ازاماتتار مەن جومارت جاندارعا رياسىز نيەتپەن ايرىقشا العىسىمدى بىلدىرەمىن. اللا رازى بولسىن!»، - دەدى ول.

ورازا ايت - وتباسىلىق مەرەكە. مەيرام كۇنى سىيلىق بەرىپ، قۋانىشقا بولەۋ - ساۋاپتى ءىس. كومەككە مۇقتاج ادامعا قايىرىمدىلىق جاساۋ دا ساۋابى مول امالدىڭ ءبىرى.

«وزدەرىڭىزگە بەلگىلى، ەلىمىزدىڭ بىرنەشە ايماعىندا بولىپ جاتقان كوكتەمگى سۋ تاسقىنى جەرگىلىكتى اعايىن- جۇرتتى ۇرەيلەندىرىپ، ۇلكەن ابىگەرگە سالۋدا. ءۇيى مەن مال- دۇنيەسىنەن ايىرىلعان وتباسىلارعا مەملەكەتىمىز ءتيىستى كومەك كورسەتۋدە. قازاقستان مۇسىلماندارى ءدىني باسقارماسى دا ءوز مۇمكىندىگى اياسىندا سۋ تاسقىنىنان زارداپ شەككەن ازاماتتاردى مەشىت پەن مەدرەسەلەرگە ورنالاستىرىپ، ولارعا مورالدىق تۇرعىدان قولداۋ كورسەتتى. سونىمەن قاتار سۋ باسقان ايماقتارعا 100 توننادان استام گۋمانيتارلىق كومەك جىبەردى. تاسقىن سۋدان ءۇيى جارامسىز بولىپ قالعان قولىندا مۇگەدەكتىگى بار ەكى بالاسىمەن شاراسىز كۇيگە تۇسكەن جالعىز باستى اناعا پاتەر بەردى. 1113 ءدىن قىزمەتكەرى ورتاق ىسكە جۇمىلدىرىلدى. 

وسى رەتتە بارشا مۇسىلمان قاۋىمىن ورازا ايت كۇندەرى سىناقتى كۇندەردى باستان كەشىپ جاتقان جۇرتىمىزعا قول ءۇشىن بەرىپ، جۇرەكتەرىنە قۋانىش ۇيالاتۋعا شاقىرامىن. «قايىرىمدىلىق جاساساڭ - قايىرىن ءوزىڭ كورەسىڭ» دەپ حالقىمىز ايتقانداي، ىزگى ءىستىڭ ساۋابى ەسەلەنىپ، قايىرىن وزدەرىڭىز كورىڭىزدەر.

ورازا ايت مەرەكەسى قۇتتى بولسىن! ءراببىمىز دۇعا- تىلەگىمىزدى، قاسيەتتى ايدا جاساعان قايىرلى ىستەرىمىزدى، بەرگەن زەكەت پەن ءپىتىر ساداقامىزدى قابىل ەتكەي! ءار وتباسىنا اماندىق، جاقسىلىق، قۇت-بەرەكە تىلەيمىن. ورازادان ورازاعا دەيىن امان-ەسەن جەتە بەرەيىك! اللا تاعالا قازاق دالاسىن ءتۇرلى تابيعي اپاتتاردان ساقتاعاي. سىناقتى ساتتەردى باستان كەشىپ جاتقان جەرلەستەرىمىزگە جاراتقان يەمىز جار بولعاي. ەلىمىز امان، جۇرتىمىز تىنىش بولعاي! ءامين!»، - دەدى ناۋرىزباي قاجى تاعان ۇلى.

اۆتور

ورالحان قوجانوۆ