باس ءمۇفتي «يفتار» ەمەس، «اۋىزاشار» دەپ قازاق تىلىندە ايتۋعا شاقىردى

استانا. KAZINFORM - باس ءمۇفتي شەت تىلدەرىن قوسىپ سويلەۋ ءدىني ورتادا عانا ەمەس، كۇندەلىكتى ومىردە دە كوبەيىپ كەتكەنىن ايتتى.

قازاقستان مۇسىلماندارى ءدىني باسقارماسىنىڭ ءتوراعاسى - باس ءمۇفتي ناۋرىزباي قاجى تاعان ۇلى ورازا الدىندا ءدىني باسقارما ءدىني تۇسىنىكتەردى قالاي اتايتىنىن ايتىپ بەردى، دەپ حابارلايدى Inbusiness.kz سايتى.

«اتا-بابالاردان بىزگە جەتكەن سالت-داستۇرلەرىمىز بار، قۇدايعا شۇكىر. ءدىنىمىز يسلاممەن ساباقتاسىپ كەتكەن. سونى ساقتاپ قالۋ ماقساتىندا كوپ جۇمىس جاسالىپ جاتىر. جاقىندا عانا «بابالار ىزىمەن: قازاق دالاسىنداعى مۇسىلماندىق مەكتەپ» كىتابى جارىق كوردى. ياعني، بىزگە يسلام قاشان كەلدى، ونى بابالارىمىز قالاي ۇستادى، قانداي باعىتتا ءجۇردى - وسىنىڭ بارلىعى سول جەردە كورسەتىلگەن. وسى كىتاپتار ەلىمىزگە كەڭىنەن تاراپ جاتىر. ءداستۇردىڭ قۇندىلىعى اياسىندا ورازاعا قاتىستى دۇنيەلەردى ايتتىق. ورازاعا قاتىستى سىرتتان كەلگەن سوزدەر بار. مىسالى سارەسىن ءبىز سارەسى دەپ كەلدىك، كەيبىر جاستارىمىز ونى «سۋحۋر» دەپ كەتتى. سارەسى دەپ ايتايىق. تۇسىنىكتى ءتىل»، - دەدى باس ءمۇفتي.

سونداي-اق، ول يفتاردى اۋىزاشار دەپ ايتۋعا شاقىردى.

«ونى دا بىرەۋلەر يفتار دەپ ايتىپ كەتتى. كەيبىر سوزدەردى اعىلشىن تىلىندە ايتىپ جاتادى. كورشىلەس ورىس تىلىندە ايتىلاتىن سوزدەر بار. ءبىراق ءبىز ءوزىمىزدىڭ ۇلتتىق قۇندىلىقتارىمىزدى دارىپتەيىك دەگەن ماقساتتا وسى ۇندەۋلەردى ايتتىق»، - دەيدى ناۋرىزباي قاجى تاعان ۇلى.

باس ءمۇفتي شەت تىلدەرىن قوسىپ سويلەۋ ءدىني ورتادا عانا ەمەس، كۇندەلىكتى ومىردە دە كوبەيىپ كەتكەنىن، ماسەلەن، جاستار اعا، ءىنىم، باۋىرىم دەمەي، «برات»، «براتجان» دەپ سويلەيتىنىن ەسكە سالدى.

«ءبىز ورازاعا قاتىستى دۇنيەلەردى ايتتىق. بۇرىندارى ماعان ءبىر كىسىنىڭ «ابايدان ارتىق اللانى تانىعان قازاق بار ما؟ ابايدىڭ ءوزى اللا دەپ جازدى عوي» دەگەنى بار. قازاقستان مۇسىلماندارى ءدىني باسقارماسى بۇعان دەيىنگى ءپاتۋالارىندا ايتقان: ياعني اللاح ەمەس، اللا دەپ ايتايىق دەدىك. قازاققا ءسىڭىمدى، جاقىن ءسوز عوي. اللا تاعالا دەپ ايتامىز. وسىنى دا ۇندەۋگە قوسىپ كەتتىك. وسىنداي سوزدەردى حالقىمىزعا ناسيحات رەتىندە ايتتىق»، - دەيدى باس ءمۇفتي.