باراحولكا بازارىندا كاسىپكەرلەر مەن ساۋدا ورتالىعى باسشىلىعى اراسىندا داۋ تۋىندادى
الماتى. KAZINFORM - الماتىلىقتار اراسىندا «باراحولكا» اتىمەن تانىمال بازاردىڭ ساۋدا ورتالىعىندا كاسىپكەرلەر مەن عيمارات يەسىنىڭ اراسىندا داۋ تۋىندادى. كاسىپكەرلەر عيماراتتىڭ جارىعىن ءوشىرىپ، ساۋدا ورىندارىن جاۋىپ تاستاعان كومپانيا قوجايىنىنا شاعىمدانىپ وتىر. وسى ورايدا، Kazinform ءتىلشىسى وقيعا ورنىنا بارىپ، كاسىپكەرلەرمەن جانە عيماراتقا يەلىك ەتەتىن كومپانيا وكىلىمەن كەزدەستى.
«ەۋرازيا» ورتالىعىندا ساۋدا جاسايتىن كاسىپكەر ساۋلە ابدۋللينا عيمارات 2014 -جىلى 67 كاسىپكەردىڭ قاراجاتىنا سالىنعانىن ايتادى. ونىڭ ايتۋىنشا، ورتالىقتىڭ العاشقى قوجايىنى ولارعا ۇلەسكەر رەتىندە ساۋدا ورىندارىنا مەنشىك يەلىگىن بەرۋگە ۋادە بەرگەن.
«2014 -جىلى مەملەكەتتىڭ تالابىمەن ءبىز وسى عيماراتتى تۇرعىزدىق. 67 كاسىپكەر 5,5 ميلليون دوللار جۇمسادىق. ءار كۆادرات مەترگە 2 مىڭ دوللار كەتتى. مىسالى، ەكى بۋتيكتىڭ كولەمى 40 كۆادرات مەتر بولسا، وعان 80 مىڭ دوللار جانە توتەنشە جاعدايعا ارنالعان ەسىككە جەكە 1,5 مىڭ دوللار جۇمسادىق. ءبىز وۆسياننيكوۆ يگور نيكولايەۆيچ جانە المابەك تاشىمبەتوۆپەن 20 -جىلعى جۋىق جۇمىس ىستەدىك. ءبىزدىڭ سەنىمگە كىرگەن وۆسياننيكوۆ «جەر مەنەن، ال قۇرىلىسقا اقشا سەندەردەن» جانە «پاتەر سەكىلدى ساتا الاسىڭدار، جالعا بەرە الاسىڭدار، بالالارىڭ مەن نەمەرەلەرىڭە قالادى» دەدى. ءبىز كەلىستىك. سودان 2014 -جىلى قۇرىلىس باستالدى، 2015 -جىلى ءبىز ىشىنە كىردىك»، - دەدى ساۋلە ابدۋللينا.
دەگەنمەن كاسىپكەرلەردىڭ ايتۋىنشا، عيمارات قولدانىسقا بەرىلگەن كەزدە ونىڭ العاشقى يەسى قۇرىلىسقا اي سايىن سالىنعان قاراجات تۋرالى قولحاتتى قۇرتىپ، ونىڭ ورنىنا مەنشىك يەلەرى ەكەنىن دالەلدەيتىن كلۋب كارتاسىن بەرگەن. وندا كاسىپكەردىڭ اتى-ءجونى، ج س ن جانە باسقا دا اقپاراتتار كورسەتىلگەن.
«2018 -جىلى «ەۋرازيا» ساتىلىپ جاتقانىن ەستىپ، ءبىز وۆسياننيكوۆتى شاقىردىق. ول ماسكەۋدەن كەلدى دە، «مەن بۇل جەردى 10 ميلليونعا ساتسام، سەندەرگە اقشالارىڭدى قايتارامىن، ال ەگەر 3-4 ميلليونعا ساتسام، جاڭا ادام سەندەردى مەنشىك يەسى رەتىندە قابىلدايدى، مەن سەندەردى تانىستىرامىن» دەپ ۋادە بەردى. 2022 -جىلى شاميل ءابىش دەگەن ادام كەلىپ، عيماراتتى ساتىپ العانى تۋرالى ايتتى. ال 2022 -جىلى جەلتوقساندا بىزگە 15-قاڭتارعا دەيىن بىزدەن عيماراتتى بوساتۋدى تالاپ ەتتى. ءبىز بۇل تالاپپەن كەلىسپەي، پروكۋروتۋراعا، اكىمدىك پەن قۇزىرەتتى ورگاندارعا ارىز جازدىق. مەن بازارعا 90 -جىلدارى كەلدىم. قازىر جاسىم 50 دەن استى. مەن وتباسىمدى اسىراپ وتىرعان بۇل جەردەن كەتپەيمىن»، - دەدى كاسىپكەر.
كاسىپكەرلەردىڭ ايتۋىنشا، بيىل مامىر ايىندا عيماراتقا يەلىك ەتەتىن كومپانيانى Divi رەتىندە قايتا قۇرىلىپ، كاسىپكەرلەرگە جالعا الۋ تۋرالى كەلىسىمشارت ۇسىنىلعان. ءبىراق ساۋداگەرلەر بۇل قۇجاتتان باس تارتىپ وتىر. سەبەبى وندا كاسىپكەرلەردىڭ بۋتيكتەرگە يەلىك ەتەتىنى كورسەتىلمەگەن.
«6-مامىردا Divi دەگەن كومپانيا اشىلدى. 14-مامىردا بىزگە كەلىپ، كەلىسىمشارتقا قول قويىڭدار دەيدى. ءبىز بۇل كەلىسىمشارتقا كەلىسپەيمىز. ويتكەنى ءبىز جالعا الۋشىلار ەمەس، بۇل جەردە مەنشىك يەسىمىز. بىزدە كىم، قانشا اقشا بەرگەنى جازىلعان ۇلەسكەرلەردىڭ ءتىزىمى بار. قازىر ادامدار نەگە دالادا قالۋى قاجەت؟ الاتاۋ اۋدانى اكىمدىگىندە كەزدەسۋ وتكىزدىك. ءبىز ءار بۋتيكتىڭ مەنشىك يەسى رەتىندە تىركەۋدى، كوممۋنالدىق قىزمەتتەر مەن ساۋدا ءۇيىنىڭ جۇمىسىن ۇيىمداستىرۋعا، ياعني تازالىق، كۇزەت قىزمەتتەرىنە عانا تولەم الۋدى تالاپ ەتتىك. ەگەر وعان كەلىسپەگەن جاعدايدا قۇرىلىسقا جۇمسالعان 5,5 ميلليون دوللاردى قايتارۋ كەرەك بولدى. سول كەزدەسۋدەن كەيىن ولار Divi ج ش س-ىنا اۋىستىرىپ تاستادى. ەندى بىزگە قىسىم جاسالىپ جاتىر. ەلەكتر توعىپ ءوشىرىپ، ەسىكتەرىمىزدى مورلەپ جاۋىپ تاستادى. پروكۋروردان رۇقسات الىپتى-مىس. 2023 -جىلى 14-15-قاڭتار قىلمىستىق ءىس قوزعالدى»، - دەدى ساۋلە ابدۋللينا.
كاسىپكەرلەر شاعىمىنا بايلانىستى Divi ج ش س-نىڭ زاڭ ءبولىمىنىڭ باسشىسى قايسار جامۋلدينوۆقا حابارلاستىق. كومپانيا زاڭگەرى كاسىپكەرلەردىڭ شاعىمى عيماراتتىڭ العاقشى قوجايىنىنا باعىتتالعانىن ايتادى. سونداي-اق ونىڭ ايتۋىنشا، ساۋداگەرلەر توبى زاڭدى تۇردە كاسىپ جۇرگىزىپ، سالىق تولەۋدەن جالتارىپ وتىر.
«كاسىپكەرلەر وزدەرىن مەنشىك يەسى دەپ سانايدى. ولاردىڭ شاعىمى العاشقى قوجايىنعا باعىتتالعان. ءبىز مۇندا يەلىك ەتىپ وتىرعان ءتورتىنشى زاڭدى تۇلعامىز. ولاردىڭ ايتۋىنشا، العاشقى قوجايىن ولارعا كەي جەرلەرگە مەنشىك يەلىگىن بەرۋگە ۋادە بەرگەن. ءبىراق بۇل تەك ولاردىڭ ايتۋى بويىنشا. وتكەن جىلى سوت پروتسەستەرى بولدى. سوت ولاردىڭ ءوتىنىشىن قاناعاتتاندىرعان جوق. قازىر بۇل جەردىڭ زاڭدى يەسى ولاردان كولەڭكەلى كاسىپتەن شىعىپ، باسقا ساۋدا ورتالىقتارىندا سەكىلدى زاڭ جۇزىندە كەلىسىمشارتقا وتىرىپ، جۇمىس ىستەۋدى تالاپ ەتىپ وتىر. ءبىراق ولار مۇنداي وزگەرىستى قالامايدى. ويتكەنى ولار تابىس كوزىن زاڭدى تۇردە كورسەتۋى كەرەك بولادى، ياعني سالىق تولەۋلەرى قاجەت»، - دەدى Divi كومپانياسىنىڭ وكىلى.
ول سونداي-اق عيمارات بۇگىنگى كۇنى داستان جانتىليەۆكە تيەسىلى ەكەنىن، ءبىراق ول كومپانيانى تىكەلەي باسقارا المايتىندىقتان Divi ج ش س-ىمەن سەنىمگەرلىك باسقارۋ شارتىن جاساعانىن اتاپ ءوتتى.
«عيمارات بۇگىنگى كۇنى داستان جانتىليەۆكە تيەسىلى. ول زاڭدى ساتىپ الۋشى. ساتىپ الۋ كەزىندە كاسىپكەرلەر توبى كەلىسىم كۇشىنە ەنبەيتىندەي زاڭدى ارىز-شاعىمدارىن تىركەگەن جوق. ويتكەنى بۇل توپ وۆسياننيكوۆ ەسىمدى تۇلعاعا ەشقانداي قاتىسى جوق ءۇشىنشى ادامنىڭ مۇلكىنە تالاسا المايتىندارىن تۇسىنەدى. ءبىزدىڭ بىلۋىمىزشە، ولار وۆسياننيكوۆ ۇستىنەن اقشانى الاياقتىق جولمەن يەمدەنۋ فاكتىسى بويىنشا ارىز جازعان. ال بىزگە ەشقانداي زاڭدى شەكتەۋلەر قويىلعان جوق. عيمارات ءتىپتى زاتتاي دالەل رەتىندە قابىلدانبادى. ەگەر سوت شەشىمى شىعىپ، وندا كاسىپكەرلەردىڭ مەنشىك يەلىگى تۋرالى كورسەتىلسە، ارينە ءبىز ونى ورىندايمىز. ءبىراق قازىر جاعداي ۇناسا دا، ۇناماسا دا عيمارات بىزگە تيەسىلى. ءبىز تەك قانا زاڭدى قۇقىقتارىمىزدى پايدالانىپ جاتىرمىز»، - دەدى قايسار جامۋلدينوۆ.
Divi كومپانياسىنىڭ زاڭگەرى 128 بۋتيكتىڭ 56 سى قانداي دا ءبىر بايلانىس ورناتۋدان باس تارتقاندىقتان، ولار ەلەكتر كوزىنەن اجىراتىلىپ، ەسىكتەرى مورلەنگەنىن ايتادى. سونىمەن قاتار كاسىپكەرلەر الداعى ۋاقىتتا كومپانيا تالابىن ورىندامايتىن بولسا، بۇل جاعدايدىڭ قايتالانۋى مۇمكىن دەيدى ول.
«16-مامىر كۇنى ءبىز بارلىق مەملەكەتتىك ورگانداردىڭ قاتىسۋىمەن كەزدەسۋ وتكىزدىك. وندا كولەڭكەدە جۇمىس ىستەۋدى توقتاتىپ، كاسىپكەرلەردىڭ قۇقىقتارى ساقتالۋى ءۇشىن كەلىسىمشارت نەگىزىندە جۇمىس ىستەۋگە شاقىردىق. ءبىراق ولار جالعا الۋ تۋرالى كەلىسىمدە ولاردى مەنشىك يەسى رەتىندە كورسەتۋدى تالاپ ەتىپ وتىر. ءبىراق بۇل ميعا قونىمسىز جاعداي عوي. قالاي ءبىز جالعا الۋشىنى مەنشىك يەسى رەتىندە كورسەتەمىز؟ ەگەر وكىنىشكە قاراي، ءبىزدىڭ تالاپتارىمىز ورىندالماسا، ولار بولاشاقتا عيماراتقا كىرە المايدى. ءبىز ءتىپتى ولارعا شارتتى بۇزۋ تۋرالى حابارلاما جىبەرە المايمىز، ويتكەنى ەشقانداي شارت جاسالماعان»، - دەيدى كومپانيا وكىلى.
قايسار جامۋلدينوۆ سوزىنشە، كومپانيا باسشىلىعى الداعى ۋاقىتتا كاسىپكەرلەرمەن اتامەكەن الاڭىندا كەزدەسۋ وتكىزۋدى جوسپارلاپ وتىر.
اۆتور
دوسبول اتاجان