باقىتتى بالالىقتىڭ نەگىزى وتباسى ينستيتۋتى ەكەنىن تۇسىنگەن ءجون - پرەزيدەنت

استانا. KAZINFORM - دەموكراتيا-ۇزدىكسىز جۇرەتىن ۇدەرىس. وعان تۇراقتى تۇردە اتسالىسۋ قاجەت. بۇل پرەزيدەنت قاسىم-جومارت توقايەۆتىڭ پايىمى.

«وسىنى قاپەردەن شىعارماۋىمىز كەرەك. الەمدەگى كەز كەلگەن تابىستى دەموكراتيالىق قوعام اينالاسىنا بەي-جاي قارامايتىن ازاماتتاردىڭ ارقاسىندا عانا داميدى، ومىرشەڭ بولادى. ءار ازاماتتىڭ ءال- اۋقاتى مەن وتانىمىزدىڭ تاعدىرى تەك ءوزىمىزدىڭ قولىمىزدا. بالالارىمىز بەن نەمەرەلەرىمىز ءبىزدىڭ جەتىستىكتەرىمىزدى ەسەلەۋى ءۇشىن كەلەر ۇرپاققا قاجەتتى جاعداي جاساۋ - ورتاق پارىزىمىز.

قازاقستاننىڭ بولاشاعى - جاستاردىڭ قولىندا. مەن بۇل تۋرالى ۇنەمى ايتىپ ءجۇرمىن. جەرىمىزگە ەگىلگەن ءار تالدىڭ يگىلىگىن كورەتىن دە - جاس ۇرپاق. ءبىر سوزبەن، نە ىستەسەك تە، ءبارىن ەلىمىزدىڭ ەرتەڭى ءۇشىن ىستەيمىز. سوندىقتان ءبىز بالالاردىڭ دەنساۋلىعىنا، ولاردىڭ ءبىلىمى مەن تاربيەسىنە بۇكىل ەل بولىپ ەرەكشە كوڭىل ءبولۋىمىز كەرەك. مەملەكەت وسى باعىتتا ناقتى شارالار قابىلدادى، ياعني قاراجات ءبولىپ، قاجەتتى ينفراقۇرىلىم سالۋدا. جالپى، بۇل جۇمىس قارقىندى ءجۇرىپ جاتىر دەۋگە بولادى، ءبىراق، الدىمىزدا تۇرعان مىندەتتەر اۋقىمدى، ءالى دە اتقاراتىن شارۋا كوپ»، - دەدى مەملەكەت باسشىسى.

پرەزيدەنت بالالاردىڭ قاۋىپسىزدىگىن قامتاماسىز ەتۋ، قۇقىقتارىن قورعاۋ، ولاردىڭ جان- جاقتى دامۋى ءۇشىن قولايلى جاعداي جاساۋ - مەملەكەتتىك ساياساتتىڭ ەڭ باستى باسىمدىعى ەكەنىن العا تارتتى.

«سالالىق مينيسترلىك بولسىن، اكىمدىك نەمەسە قۇقىق قورعاۋ قۇرىلىمى بولسىن، ۋاكىلەتتى ورگانداردىڭ ءبارى ءوز قىزمەتىن مۇلتىكسىز ورىنداپ، جۇمىسىن ۇيلەستىرۋى كەرەك. باقىتتى بالالىقتىڭ نەگىزى وتباسى ينستيتۋتى ەكەنىن جانە سولاي بولىپ قالا بەرەتىنىن تۇسىنگەن ءجون.

ءبىزدىڭ قوعام قازىر بەتپە- بەت كەلگەن كوپتەگەن ماسەلە مەن كەسەلدىڭ ءتۇپ- تامىرى اتا- انالاردىڭ بالا تاربيەسىنە ءوز دەڭگەيىندە ارالاسپاۋىنان باستالادى. ۇرپاقتىڭ سيفرلىق دۇنيەلەرگە تاۋەلدى بولۋى مەن ۆيرتۋالدى الەمگە شەكتەن تىس قۇمارتۋى ناعىز دەرتكە اينالدى. بالالارعا قاتىستى كەز كەلگەن قايعىلى جاعداي مەنىڭ جانىما باتادى. مەملەكەتتىك ورگانداردىڭ نازارىن دەرەۋ وسىنداي جاعدايلارعا اۋدارىپ، ءتيىستى تاپسىرمالار بەرىپ، ورىندالۋىن تۇراقتى باقىلاۋىمدا ۇستايمىن»، — دەدى قاسىم-جومارت توقايەۆ.

ول زاماناۋي تەحنولوگيالار دامۋعا داڭعىل جول اشاتىنىن، سونداي-اق ومىرىمىزگە ايتارلىقتاي قاۋىپ تە توندىرەتىنىن جەتكىزدى. تانىمال الەۋمەتتىك جەلىلەر بالالاردى عانا ەمەس، ۇلكەندەردى دە زومبيگە اينالدىرۋى مۇمكىن.

«اتا-انالار بالالارىنىڭ تاربيەسىن مەملەكەتكە نەمەسە مەكتەپكە ىسىرا سالماۋى كەرەك. گادجەتتەردىڭ قۇرساۋىندا قالدىرۋعا ءتىپتى بولمايدى. بالالارىنا سيفرلىق گيگيەنانىڭ قاراپايىم ەرەجەلەرىن ۇيرەتۋگە اتا-انا جاۋاپتى. ۇل-قىزدارىمىزعا كوڭىل ءبولۋ، بىرگە ۋاقىت وتكىزۋ، ولاردى الاڭداتقان ماسەلەلەر جايىندا اڭگىمەلەسۋ ماڭىزدى. بالانىڭ سمارتفون نەمەسە كومپيۋتەر پايدالانعان كەزىندە نە ىستەپ جاتقانىن قاتاڭ قاداعالاۋ قاجەت».

جالپى ەلىمىزدە اتا-انالاردىڭ جاۋاپكەرشىلىگى يدەياسىن ىلگەرىلەتۋگە باعىتتالعان قوعامدىق باستامانى قولعا الۋ قاجەت دەپ سانايمىن. وسكەلەڭ ۇرپاقتىڭ قاۋىپسىزدىگىن جان- جاقتى قامتاماسىز ەتۋ ءۇشىن ۋاكىلەتتى مەملەكەتتىك ورگاندارعا ناقتى شارا قابىلداۋدى تاپسىرامىن. بالالار مەن جاسوسپىرىمدەر اراسىندا ەل ىشىندەگى شىنايى قاھارمانداردى ناسيحاتتاۋىمىز قاجەت. مىسالى، جاقىندا وتكەن دۇنيەجۇزىلىك وليمپياداداعى شاحماتشى قىزدارىمىزدىڭ جارقىن جەڭىسى ۇلگى ەتۋگە تۇرارلىق.

ءبىزدىڭ وقۋشىلار ماتەماتيكادان، فيزيكادان جانە باسقا دا پاندەردەن وتكەن وليمپيادالاردا جوعارى ناتيجەگە قول جەتكىزىپ ءجۇر. وسىنداي تالانتتى بالالاردى قولداپ، ولاردىڭ ۇستازدارىن ىنتالاندىرۋ كەرەك»، - دەپ اتاپ ءوتتى مەملەكەت باسشىسى.