باقىتجان بازاربەك: قازىر كىنالىنى ىزدەمەيمىز، بۇگىنگى مىندەت - حالىقتى امان الىپ قالۋ

پەتروپاۆل. KAZINFORM - سۋ تاسقىنىنا بايلانىستى ءبىر توپ سەنات جانە ءماجىلىس دەپۋتاتى سولتۇستىك قازاقستان وبلىسىندا ءجۇر.

ولار تۇرعىندارمەن كەزدەسىپ، سۋ تاسقىنىنىڭ زاردابىن ازايتۋعا باعىتتالعان جۇمىستىڭ بارىسىن كوردى. ءماجىلىس دەپۋتاتى باقىتجان بازاربەك وڭىرگە ساپار بارىسىندا تۇيگەن بىرنەشە ماسەلەنى ءتىزىپ بەردى.

«سەرگەيەۆ سۋ قويماسى 0 دەيىن تولدى. بۇل 60-70-جىلدارى سالىنعان، سودان بەرى ەشقانداي جوندەۋ جۇرگىزىلمەگەن بوگەتكە قانداي جۇك ەكەنى تۇسىنىكتى. ءبىراق، جوندەۋگە قاراجات سۇراعانىمەن، ءتيىستى مينيسترلىك بۇل نىسانعا اقشا بولمەي وتىر. تاعى ءبىر وزەكتى ماسەلە - سەرگەيەۆ سۋ قويماسىنىڭ شەتىندە كارەرلەر بار. ول جەردە جارىلىس جۇمىستارى جۇرگىزىلىپ، جەر قويناۋىن پايدالانۋشىلار شاحتالارىن تەسىپ جاتىر. بۇل ەرتەڭ بوگەتكە كەرى ىقپالىن تيگىزەدى. سۋ قويماسى تەسىلسە، ول 20-30 شاقتى ەلدى مەكەندى ەمەس، بۇكىل پەتروپاۆل سۋ استىندا قالادى. سوندىقتان بۇل ماسەلەلەرگە ۇكىمەت دەر كەزىندە قاراپ، ۋاكىلەتتى ورگاندار قاداعالايدى عوي دەگەن ۇمىتتەمىن»، - دەيدى دەپۋتات.

جەرگىلىكتى حالىقپەن كەزدەسكەن ماجىلىسمەن تۇرعىنداردا قورقىنىش باسىم ەكەنىن ايتادى. ول - وتەماقى الۋعا قاتىستى.

«تۇرعىنداردىڭ كوپشىلىگى ەۆاكۋاتسيا باستالعاندا قۇجاتتارىن الا الماي، ۇيدە قالدىرىپ كەتكەن. كەشە ءبىر اۋىلدىڭ كوشەسىمەن قايىقپەن ءجۇزىپ وتتىك. ۇيلەردى شاتىرىنا دەيىن سۋ باسقان. ياعني قۇجاتتارىنىڭ ءبارى سۋعا كەتتى. ءبىراق تۇرعىندارعا ۇرەيلەنۋدىڭ قاجەتى جوق. جەردىڭ، ءۇيدىڭ قۇجاتتامالارى جوعالسا، سۋ باسقان ۇيدە قالسا، اقپاراتتىق جۇيەلەر بازاسىندا ونىڭ ءبارى ساقتالعان. جەر كاداسترى اقپاراتتىق جۇيە ارقىلى قۇجاتتاردى قالپىنا كەلتىرۋگە بولادى. مال- مۇلكى سۋ استىندا قالعان ازاماتتاردىڭ، اسىرەسە قازاقستاننىڭ باتىسى - اقتوبە، اتىراۋ وبلىسىندا مالى سۋدان قىرىلعان ازاماتتار بار. بۇل جەردە اۋىل شارۋاشىلىعى مالدارىنىڭ يدەنتيفيكاتسياسى بازاسى بار. ول جەردە ءار ادامعا قانشا مال تىركەلگەنىن راستاۋعا بولادى. ەرتەڭ حالىققا وتەماقى تولەردە مەملەكەتتىك ورگاندار «تىرناق ىشىنەن كىر» ىزدەمەۋ كەرەك. توپان سۋ ۋاقىتىمەن كەتەدى. سۋ كەتكەننەن كەيىن تۇرعىندار بۇكىل مال- مۇلكىنىڭ شىعىنىن مەملەكەتتەن سۇراعان كەزدە، ماسەلە بولۋى مۇمكىن. سول كەزدە ءبىز ونى جەكە قاداعالاۋعا الامىز. ويتكەنى ادامدار مال-مۇلكىنەن، ۇيىنەن، جەرىنەن تولىعىمەن ايرىلىپ وتىر جانە بۇل ولاردىڭ كىناسى ەمەس. تابيعي اپاتتان زارداپ شەككەندەر تولىق وتەماقىسىن الۋعا ءتيىس. پرەزيدەنتتىڭ ءوزى ايتىپ وتىر ونى. ەرتەڭ جاۋاپتى مەملەكەتتىك ورگاندار تاراپىنان وتەماقى تولەۋ كەزىندە قيىندىقتار تۋسا، تولەمەسە، ال ادام زارداپ شەكسە، مۇنداي جاعدايدا لاۋازىمدى تۇلعانى جاۋاپكەرشىلىككە تارتۋ كەرەك»، - دەيدى باقىتجان بازاربەك.

ءماجىلىس دەپۋتاتىنىڭ پىكىرىنشە، سۋ تاسقىنى اياقتالعاننان كەيىن بارلىق ۋاكىلەتتى جانە جەرگىلىكتى اتقارۋشى ورگاندارعا ءتيىستى بوگەت-پلوتينالاردىڭ، سۋ شايىپ كەتكەن اۋىلداردىڭ بيۋدجەتتەرىن قاراپ، 2018 -جىلدان باستاپ قانداي دامبالار جوسپارلانعان، قانداي بوگەتتەر سوعىلۋى كەرەك ەدى، وعان قانشا اقشا جۇمسالعان - سونىڭ ءبارىن تەكسەرۋ كەرەك.

«ءتيىستى قۇقىقتىق باعانى پروكۋراتۋرا جانە انتيكور بەرۋى ءتيىس. ويتكەنى بۇل جەردە دە اكىمدىكتەرگە، جەرگىلىكتى اتقارۋشى ورگاندارعا، توتەنشە جاعدايلار قىزمەتىنە جانە باسقا دا ۋاكىلەتتى ورگاندارعا سۇراق تۋىندايدى. سوندىقتان دا ءبىز پارلامەنت ءماجىلىسى دەپۋتاتتارى قازىر كىنالىنى ىزدەمەيمىز، قازىرگى نەگىزگى مىندەت - قاۋىپ- قاتەردىڭ الدىن الۋ، حالىقتى ەۆاكۋاتسيالاۋ. وسى ءۇشىن بارلىق مەملەكەتتىك ورگاندار جۇمىلا ىسكە كىرىسكەن»، - دەيدى باقىتجان بازاربەك.

بۇعان دەيىن س ق و- دا سۋ تاسقىنىنا بايلانىستى 1800 وقۋشىنىڭ قاشىقتان وقۋعا كوشىرىلگەنىن ايتقان ەدىك.