باقىتجان بازاربەك: ۇكىمەت جۇمىسىنىڭ باستى ناتيجەسى - حالىقتىڭ ريزاشىلىعى
استانا. KAZINFORM - ءماجىلىس دەپۋتاتى باقىتجان بازاربەك وتستاۆكاعا كەتكەن ۇكىمەتتىڭ جۇمىسىنا حالىق قالاۋلىسى رەتىندە ءوز باعاسىن بەرىپ، جاڭا ۇكىمەتتىڭ باستى مىندەتىن اتادى.
«كەشە وتستاۆكاعا كەتكەن ۇكىمەت باسشىسىنىڭ كانديداتۋراسىن بەكىتكەن كەزدە قارسى داۋىس بەرگەن 5 دەپۋتاتتىڭ ءبىرى مەن ەدىم. سەبەبى كوپ ماسەلە شەشىلگەن جوق. باسقا سالالارعا توقتالماي-اق قويايىن، جەر ماسەلەسىنە كەلسەك. تۇرعىن ءۇي سالۋعا بەرىلەتىن 10 سوتىق جەر ماسەلەسى شەشىلمەدى، قۇرىلىس سالاسىندا سىبايلاس جەمقورلىق بەلەڭ الىپ وتىر. سەيسميكالىق قاۋىپتى ايماقتاردىڭ توتەنشە جاعدايلارعا دايارلىعى وتە تومەن. الماتى قالاسى جەر سىلكىنىسىنە ءتىپتى دايىن ەمەس. قازىر ءبىزدىڭ قاراۋىمىزعا قۇرىلىس كودەكسى كىردى. جەر سىلكىنىسىنە دايىن ەمەس، بۇل كىمنىڭ جاۋاپكەرشىلىگى؟ ارينە، ۇكىمەتتىڭ جانە قۇزىرلى مينيسترلىكتىڭ. وسىعان وراي شۇعىل شەشىمدەر قابىلداۋ قاجەت. وكىنىشكە قاراي، جەر جانە قۇرىلىس سالاسىندا ءتيىستى شارالار قابىلدانباۋى سەبەبىنەن سىبايلاس جەمقورلىق، قۇرىلىس لوببيى، ونەركاسىپتەردىڭ سانيتارلىق تالاپتاردى بۇزۋى بولىپ وتىر. ەكولوگيالىق جانە سانيتارلىق تالاپتاردى بۇزىپ، جاپپاي تۇرعىن ءۇي سالىنىپ جاتىر. ول ۇيلەردىڭ قاۋىپسىزدىگىنە ەشكىم جاۋاپ بەرە المايدى. وسىلاردىڭ ءبارى جەر، قۇرىلىس سالاسىندا كەتكەن ساياسي قاتەلىكتەردىڭ كورىنىسى»، - دەدى باقىتجان بازاربەك.
ونىڭ ايتۋىنشا، وتستاۆكاعا كەتكەن ۇكىمەت ارتقان ءۇمىتتى اقتاعان جوق.
«مەن تاۋەلسىز دەپۋتاتپىن، ءوز ويىمدى تاۋەلسىز ايتامىن. حالىقتىڭ جاعدايىن كورىپ وتىرمىز، ونشا ەمەس. باعا قىمباتتاپ جاتىر. ءوزىڭىز بىلەسىز، الەۋمەتتىك جوبالاردى ىسكە اسىرۋ ءۇشىن ۇلتتىق قوردان تريلليونداعان قارجىنى الىپ جاتىرمىز. ۇلتتىق قوردان الا بەرسەك، ەرتەڭ نە قالادى؟ بولاشاق ۇرپاققا نە قالدىرامىز؟ ونەركاسىپ سالاسى دا سول، ءبارى مۇنايعا قاراپ وتىر، سونى ءوندىرىپ شىعارامىز. جاڭا ونەركاسىپ وشاقتارىن اشپايمىز. اشساق، ولارعا جابىلۋ قاۋپى ءتونىپ وتىر. وعان مەملەكەتتىڭ ءتيىستى قورعاۋ امال-شارتتارى جەتكىلىكسىز. وتستاۆكاعا كەتكەن ۇكىمەتتىڭ ءىس ارەكەتتەرى باياۋ بولدى، ول ءۇشىن جەدەل قيمىلداۋ كەرەك ەدى»، - دەدى ول.
سونداي-اق، حالىق قالاۋلىسى كەيبىر اكىمدەر بيۋجەتتىك باعدارلامانى ورىنداماي، سونىڭ سالدارىنان سوگىس العانىن ايتتى.
«جەر، مەن قۇرىلىس سالاسىنا ميللياردتاعان قارجى ءبولىندى، ءبىراق اكىمدىكتەر جۇمىستى سوزىپ جىبەردى، كەيبىر اقشانىڭ قايدا كەتكەنىن ءبىز بىلمەيمىز. جۇمىستىڭ ەڭ باستى ناتيجەسى حالىقتىڭ ريزاشىلىعى»، - دەيدى ب. بازاربەك.
ودان بولەك، تاۋەلسىز دەپۋتات جاڭا ۇكىمەتتەن قانداي ءۇمىت كۇتەتىنىن ايتتى.
«جاڭادان تاعايىندالاتىن ۇكىمەت الدىمەن «حالىق» دەگەندى ءبىلۋ كەرەك. «حالىق» ءسوزى بەس ءارىپ، ءبىراق سونىڭ ىشىندە كوپ نارسە جاتىر. ياعني حالىقتىڭ مۇڭ-مۇقتاجى، الەۋمەتتىك جاعدايى مەن تىرشىلىك ەتۋ جاي-كۇيى ءبىرىنشى كەزەكتە تۇرۋى ءتيىس. ەگەر ۇكىمەت الدىمەن ستاتيستيكانى قويىپ، حالىقتى كەيىنگە قويسا، ودان ەشتەڭە شىقپايدى. حالىق - ۇكىمەتتىڭ باستى ماقساتى بولۋ كەرەك»، - دەپ تولىقتىردى ءماجىلىس دەپۋتاتى.