بانگلادەشتە ۇكىمەتتىڭ وتستاۆكاعا كەتۋىن تالاپ ەتكەن شەرۋدە 70-تەن استام ادام قازا تاپتى
داككا. KAZINFORM - بانگلادەش پوليتسياسى ەل پرەمەر- ءمينيسترى شەيح حاسينانىڭ وتستاۆكاعا كەتۋىن تالاپ ەتىپ كوشەگە شىققان ون مىڭداعان شەرۋشىلەردى تاراتۋ ءۇشىن كوزدەن جاس اعىزاتىن گاز بەن گراناتا قولداندى.
سالدارىنان كەمىندە 76 ادام، ونىڭ ىشىندە 13 پوليتسيا قىزمەتكەرى قازا تاۋىپ، ونداعان ادام جاراقات الدى. بۇل تۋرالى Al Jazeera حابارلادى.
باسىلىمنىڭ مالىمەتىنشە، ەل استاناسى داككا مەن سولتۇستىكتەگى بوگرا، پابنا مەن رانگپۋر، سونداي-اق باتىستاعى ماگۋرا، شىعىستاعى كوميللا جانە وڭتۇستىگىندەگى باريسال مەن فەني قالالارىندا جاعداي شيەلەنىسىپ كەتكەن. شىلدە ايىنىڭ باسىندا ستۋدەنتتەردىڭ ۇكىمەتتىك جۇمىس ورىندارىنا كۆوتا جۇيەسىن توقتاتۋدى تالاپ ەتكەن نارازىلىقتار زورلىق-زومبىلىققا ۇلاسىپ، جۇزدەگەن ادامنىڭ ءومىرىن قيعان سوڭ شەرۋشىلەر حاسينانىڭ وتستاۆكاعا كەتۋىن تالاپ ەتتى. ولار ۇكىمەت وتستاۆكاعا كەتپەيىنشە توقتامايمىز دەپ وتىر.
شەرۋ قايتا جالعاسىپ، كوشەلەر ادامعا تولدى. كوپتەگەن ايماققا زاقىم كەلدى. داككانىڭ شاحباگ اۋدانىنداعى ءىرى مەملەكەتتىك اۋرۋحانا - بانگاباندحۋ شەيح مۋجيب مەديتسينالىق ۋنيۆەرسيتەتىنە شابۋىل جاسالىپ، بىرنەشە كولىك ورتەندى. سونداي-اق استانانىڭ ۋتتارا اۋدانىندا پوليتسيا ءىرى تاس جولدى جاۋىپ تۇرعان جۇزدەگەن ادامدى تاراتۋ ءۇشىن كوزدەن جاس اعىزاتىن گاز قولداندى.
شەرۋشىلەر بيلىك پارتياسىنىڭ جۇزدەگەن بەلسەندىلەرى بولعان اۋدانداعى ۇيلەرگە شابۋىل جاساپ، الەۋمەتتىك قورعاۋ كەڭسەسىن قيراتتى. كۋاگەرلەردىڭ ايتۋىنشا، بىرنەشە قولدان جاسالعان جارىلعىش زاتتار ىسكە قوسىلىپ، اتىس داۋسى ەستىلگەن.
نارازىلىقتار قازىر شامامەن 170 ميلليون حالقى بار وڭتۇستىك ازيا مەملەكەتىندە ۇكىمەتكە قارسى جاسالعان كەڭىرەك قوزعالىسقا اينالدى. كەيىنگى اپتادا كەم دەگەندە 11000 ادام قاماۋعا الىندى.
اۆتور
جاراسقان نۇرىبايەۆ