قۇجاتتا بالىق اۋلايتىن اۋلارعا قويىلاتىن تالاپتار مەن شايان اۋلاعىشتاردى پايدالانۋعا قاتىستى شەكتەۋلەر بەلگىلەنگەن.
وزگەرىستەر اۋىل شارۋاشىلىعى ءمينيسترىنىڭ 2026-جىلعى 4-قاراشاداعى بۇيرىعىمەن بەكىتىلدى. قۇجاتتا بالىق اۋلاۋعا رۇقسات ەتىلگەن قۇرالدار مەن تاسىلدەردىڭ ءتىزىمى جاڭارتىلعان.
كاسىپشىلىك بالىق اۋلاۋ ءۇشىن قۇرما، ىعىزبا، دريفتەرلى جانە قورشايتىن اۋلاردى پايدالانۋعا بولادى. سونداي-اق ترال، جىلىمنىڭ بىرنەشە ءتۇرىن، سۇزەكى، سۇيرەتپە، ۆەنتەرلەر مەن شايان اۋلاعىشتاردى قولدانۋعا رۇقسات ەتىلەدى.
تىزىمگە جايىن اۋلاۋعا ارنالعان ارنايى قۇرالدار، كەمەلەرگە ورناتىلاتىن بالىق سورعى جانە ەرليفتەرلى قوندىرعىلار، ارتەميا سيستالارىن جيناۋعا ارنالعان جابدىقتار دا ەنگەن.
بالىق اۋلايتىن اۋلارعا جەكە تالاپ قويىلعان. 2030-جىلعى 31-جەلتوقسانعا دەيىن ءتۇرلى ۇلگىدەگى اۋلاردى پايدالانۋعا بولادى. الايدا ديامەترى 0,2 ميلليمەتردەن جىڭىشكە سينتەتيكالىق نەيلون نەمەسە باسقا دا پولياميدتى مونوجىپتەن توقىلعان، كوزىنىڭ ولشەمى 100 ميلليمەتردەن كىشى اۋلاردى قولدانۋعا بولمايدى.
اۋەسقوي بالىقشىلار قالقىمالى، شىبىندىق، ءتۇپتى، تاستاما جانە يىلمەلى قارماقتاردى، ۆوبلەر، جەرليتسا، دوڭگەلەك، بلەسنا، مورمىشكا مەن تروللدى پايدالانا الادى.
بەلگىلەنگەن تالاپتار ساقتالسا، سۋ استىندا بالىق اۋلاۋعا ارنالعان مىلتىقتى دا قولدانۋعا بولادى. ال ءبىر بالىقشى ۇشتەن ارتىق شايان اۋلاعىش پايدالانا المايدى.
بۇيرىق 2026-جىلعى 21-قاراشادا كۇشىنە ەنەدى.
بالىق اۋلاۋعا ۋاقىتشا تىيىم سالۋ مەرزىمدەرى مەن بيىل وزگەرگەن ەرەجەلەر تۋرالى وسى ماتەريالدان وقي الاسىز.
ەسكە سالايىق، قازان ايىندا كاسپيي تەڭىزىندە شەكاراشىلار براكونەرلەردىڭ جالپى ۇزىندىعى 88 شاقىرىم بولاتىن بالىق اۋلاۋ قۇرالدارىن تاركىلەدى. اۋعا تۇسكەن بەكىرە جانە باسقا دا بالىق تۇرلەرىنىڭ 2337 ءسى تابيعي ورتاسىنا جىبەرىلدى.