بالاڭىزدىڭ ەسىرتكى ساتۋمەن اينالىسىپ جۇرگەنىن قالاي انىقتاۋعا بولادى - ءى ءى م كەڭەسى

استانا. KAZINFORM - جىل باسىنان بەرى ەسىرتكى قىلمىسىن جاساعان 30 جاس ءوسپىرىم ۇستالدى. بۇل تۋرالى ءى ءى م ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ ورىنباسارى باقىتجان ءامىرحانوۆ ايتتى.

«2024 -جىلدىڭ وتكەن كەزەڭىندە ەسىرتكى قىلمىسىن جاساۋعا قاتىسقانى ءۇشىن 30 كامەلەتكە تولماعان ۇستالدى. تەك وتكەن اپتادا ەكى كامەلەتكە تولماعان قولعا ءتۇستى. شىمكەنتتە مامىر ايىندا ورتا مەكتەپتى بىتىرگەن جاس ءوسپىرىم ۇستالدى. ودان 13 پاكەت مەفەدرون تاركىلەندى. كۇنى كەشە عانا كوكشەتاۋدا 14 جاستاعى جاس ءوسپىرىم ۇستالىپ، ودان سالماعى 200 گرامنان استام 55 پاكەت مەفەدرون تاركىلەندى. جاۋاپ الۋ بارىسىندا جاس ءوسپىرىم وسىنداي تاسىلمەن موپەد ساتىپ الۋعا اقشا تاپقىسى كەلگەنىن ايتقان»، - دەدى ول ۆەدومستۆودا وتكەن بريفينگتە.

وسىعان بايلانىستى ىشكى ىستەر مينيسترلىگى اتا-انالاردى بالالارىنىڭ ۋاقىت وتكىزۋىنە باقىلاۋدى كۇشەيتۋدى سۇراپ وتىر.

«بالالاردىڭ قورشاعان ورتاسىن زەرتتەپ، ولاردىڭ جازعى دەمالىس كەزىندە بوس ۋاقىتىن ۇيىمداستىرۋ كەرەك. جاس ءوسپىرىمنىڭ جەكە زاتتارىنداعى يزولەنتا، كىشكەنتاي پاكەتتەر، قالتالىق ەلەكتروندىق تارازى، ءدارى سالىنعان بليستەرلەر نەمەسە كوز تامشىلارىمەن شولمەكتەر قاۋىپ-قاتەر بەلگىسى سانالادى. تەلەفونىندا كىرە بەرىستەردىڭ، ايالدامالاردىڭ، ءۇي قابىرعالارىنىڭ سۋرەتتەرى بولسا جانە ەڭ باستىسى - اتا-اناسى ساتىپ الماعان جانە ولاردىڭ قايدان كەلگەنىن جاس ءوسپىرىم تۇسىندىرگىسى كەلمەيتىن جاڭا قىمبات زاتتار كۇدىك تۋعىزۋى كەرەك»، - دەدى ءى ءى م وكىلى.

ونىڭ ايتۋىنشا، وسى بەلگىلەردىڭ بارلىعى كامەلەتكە تولماعاننىڭ ەسىرتكىنىڭ زاڭسىز اينالىمىنا قاتىسۋ قاۋىپ-قاتەرىن انىق كورسەتەدى.

«مۇنداي بەلگىلەر بولماسا دا بالانى ەسىرتكى وتكىزۋگە تارتۋى مۇمكىن ەكەندىگى تۋرالى ونىمەن مىندەتتى تۇردە سويلەسۋگە كەڭەس بەرەمىز»، - دەدى ول.

اۆتور
مارلان جيەمباي