بالانى تاربيەلەۋدىڭ 9 قاعيداسى

استانا. قازاقپارات - بالانى سانالى، ەركىن ويلايتىنداي، الدىنا ماقسات قويا بىلەتىندەي ەتىپ قالاي تاربيەلەۋگە بولادى؟ بالا تاربيەسى - وتە اۋىر جانە ۇزدىكسىز ەكەنى انىق.

ءوزىمنىڭ 4 بالام بولعاندىقتان، ءارقاشاندا وسى تاقىرىپقا قاتىستى مالىمەتتەر ىزدەپ جۇرەم.

بارلىق اتا-انا ءوز بالاسىنىڭ باسقا بىرەۋگە ەلىكتەپ وسەتىنىن جاقسى بىلەدى.

مىسالى، اكەسى بالاسىنا: «تاماق ىشەردىڭ الدىندا قولىڭدى جۋ»، دەپ، ال ءوزى جۇمىستان كەلگەن بەتتە سول تالاپتى ورىنداماسا، قانشا جەردەن بالانى ۇرىسقانىمەن ول ءوز اكەسىنىڭ ءىسىن قايتالايدى.

وسى ارادا تاربيە بەرۋدىڭ كەرىعار ماسەلەلەرى تۋىندايدى.

وسى ورايدا، حالىق دانالىعى ايتپاقشى: «ەڭ الدىمەن بالانى ەمەس، ءوزىڭدى تاربيەلە».

ارينە، ءار وتباسىنىڭ وزىندىك تاربيەلەۋ جۇيەسى قالىپتاسقان. ءبىراق، تاربيە بەرۋدىڭ قاعيدلارىن ءبىر كورىپ شىعۋ اركىمدى قىزىقتىرار دەپ ويللايمىن. «ءۇي ەنسيكلوپەدياسى» اتتى كىتابىنان الىنعان بالا تاربيەلەۋدىڭ 9 قاعيداسىن سىزدەردىڭ نازارلارىڭىزعا ۇسىنامىن.

1. بالاڭنىڭ ءدال ءوزىڭ سياقتى بولاتىنىن كۇتپە. نەمەسە، سەنىڭ قالاعانىڭداي بولادى دەپ كۇتپە. تاربيە بالاعا سىزگە ۇقساۋعا ەمەس، وزىندىك ەرەكشەلىگىن تابۋعا كومەكتەسۋ كەرەك.

2. بالاڭنان ىستەگەن جاقسىلىقتارىڭ ءۇشىن اقى سۇراما. سەن وعان ءومىر سىيلادىڭ، ول ونىڭ قۇنىن قالاي وتەيدى؟ ول باسقاعا ءومىر سىيلايدى: بۇل العىستىڭ قايتىمسىز زاڭى.

3. تاربيەلەۋ بارىسىندا بالاڭنان ءوشىڭدى الما. ويتكەنى، نە ەكسەڭ، سونى وراسىڭ.

4. بالاڭنىڭ پروبلەمالارىنا كىسىمسىنىپ قاراما. سەبەبى، ءار ادامنىڭ باسىنا ءوزى كوتەرە الاتىنداي اۋىرتپالىق بەرىلەدى. ول اۋىرتپالىق سەنىكىنەن كەم بولماۋى مۇمكىن. جانە دە بالاڭ وندايعا داعدىلانباعان.

5. تاربيە بەرۋدە بالاڭدى كەمسىتۋشى بولما.

6. ەگەر بالاڭا ءبىر نارسە ىستەۋ قولىڭنان كەلمەسە، ول ءۇشىن ءوزىڭدى قيناما. ال ەگەردە قولىڭنان كەلىپ تۇرىپ ىستەمەسەڭ، وندا ءوز-ءوزىڭدى قورلاي بەر.

7. بالاڭا بارلىق جاعداي جاساۋ تاربيەنىڭ باستى قاعيداسى.

8. وزگەنىڭ بالاسىن سۇيە ءبىل. وزگەنىڭ بالاسىنا ءوز بالاڭا جاسامايتىن نارسەنى جاساما.

9. ءوز بالاڭىز دارىنسىز، جولى بولماعىش، قىڭىر، ەرەسەك بولسادا سۇيە ءبىل. ونىمەن كوپ ۋاقىتىڭدى وتكىزۋگە تىرىس، قۋانىش-قايعىلارىن بولىسە ءبىل. ويتكەنى، بالاڭنىڭ قاسىڭدا بولۋى - بۇل سەن ءۇشىن قايتا كەلمەيتىن مەرەكە ۋاقىتى.

بۇدان مىناداي قورىتىندى جاساۋعا بولادى: بالالار ومىرگە اتا-انا تاربيەسىن الۋعا عانا ەمەس، سونىمەن قاتار ءبىزدى دە تاربيەلەۋ ءۇشىن دۇنيەگە كەلەدى. ال، ءوز بالاسىن جاقسى تاربيەلەگىسى كەلەتىن ءاربىر سانالى اتا-انا ەڭ الدىمەن ءوزىنىڭ تاربيەسىن تۇزەيدى. بۇل - تاربيەنىڭ باستى ماقساتى.

ال ءسىزدىڭ وتباسىڭىزدا تاربيە بەرۋ قانداي نەگىزدەردە جۇزەگە اسادى؟

blogtime