بالانىڭ ەستە ساقتاۋىن قالاي جاقسارتامىز؟ قازاقستاندىق لوگوپەد بىرنەشە ءتيىمدى جاتتىعۋ ۇسىندى
نەيروگيمناستيكالىق جاتتىعۋلار ادامنىڭ وڭ جانە سول جاق ميىنىڭ قاتار دامۋىنا سەپتىگىن تيگىزەدى. ەكى قولمەن بىرگە جۇمىس ىستەۋ مي جۇمىسىنىڭ جاقسى دامۋىنا ىقپال ەتەدى. وعان قوسا، نەيروگيمناستيكالىق جاتتىعۋلار كادىمگى گيمناستيكا سياقتى فيزيكالىق تۇرعىدا ادامعا پايداسىن تيگىزەدى. نەيروگيمناستيكالىق جاتتىعۋلاردى جۇيەلى تۇردە ورىنداۋ ميدىڭ ونىمدىلىگىن ارتىرادى. لوگوپەد شايكەنوۆا نازگۇل سەرىك قىزى ەستە ساقتاۋدى جانە مي جۇمىسىن جاقسارتاتىن بىرنەشە پايدالى جاتتىعۋ ۇسىندى.
بۇل جاتتىعۋلار تەك بالاعا ەمەس، ەرەسەكتەرگە دە پايدالى. مىسالى، بالا ءۇي تاپسىرماسىن ورىنداپ وتىرعان كەزدە، ونى سەرگىتۋ ءۇشىن وسى جاتتىعۋلاردى ورىنداتساڭىز بولادى. سونداي- اق ءوزىڭىز دە جۇمىستا ميىڭىزدى ىسكە قوسۋ ءۇشىن ولاردى جاساۋعا بولادى.
نەيروجاتتىعۋ
«اش-جۇم»
جاتتىعۋ ەكى قولمەن جاسالادى، ءبىر قول اشىق، ەكىنشى قول - جۇدىرىق. ەكەۋىن الماستىرا وتىرىپ، جۇدىرىق-الاقان كورسەتەدى، ونى ۇستەلدىڭ ۇستىندە جاساۋعا دا بولادى.
«جۇدىرىق- قابىرعا- الاقان»
بالا ۇستەلگە ەكى قولمەن بىردەي ءبىرىنشى جۇدىرىقپەن، سوسىن الاقان قىرىمەن قويىپ، ءۇشىنشى الاقانمەن قويىپ ۇرعىلايدى. باستاپقىدا اسىقپاي، كەيىن جىلدام تەمپپەن جاساۋ كەرەك.
«دوپتى دومالاتۋ»
اق قاعازعا سىزىق-بەلگىلەردى (جوعارى-تومەن، سول جاعىندا جوعارىعا قاراي، وڭ جاعىندا دوڭگەلەك) سالىپ، بالانى ۇستەلگە وتىرعىزىپ، ءبىر ۋاقىتتا ەكى قولمەن سۋرەتتەگى سحەما بويىنشا كىشكەنتاي دوپتى نەمەسە شاريكتى الاقانمەن جۇرگىزۋ. جوعارى - تومەن، قيعاش، سول قول - جوعارى-تومەن قوزعالىسپەن، وڭ قول - اينالدىرا وتىرىپ قيمىلدار جاسايدى.
كۋبيكپەن ويىن
ۇستەلدىڭ ۇستىنە ەكى قاتارعا ۇزىنا 4-5 كۋبيكتى ءتىزىپ جول سالىپ قوياسىز. بالا ەكى قولمەن ءبىر ۋاقىتتا تىزىلگەن كۋبيكتەردى سايكەس كەسەگە سالۋ كەرەك، ياعني تۇسىنە بايلانىستى. ەكى ءتۇستى الساڭىز (قىزىل، سارى) تىزبەكتى ءتۇستى كۋبيكتەرگە سايكەس ورنىن ارالاستىرىپ قويساڭىز، تىپتەن، قىزىق. ءبىر جولدا ۇقساس ءتۇستى كۋبيكتەر بولسا قولىن اۋىستىرماي سالادى. ءار ءتۇرلى كۋبيكتەر بولسا، قولدارىن ايقاستىرا وتىرىپ سالۋ قاجەت. كۋبيك كوپ بولعان سايىن، تىزبەك جول نەعۇرلىم ۇزىن بولسا، ويىن سوعۇرلىم قيىنداي تۇسەدى.
«كۋبيكتەگى سان»
توپتىق ويىن. اتا-انا مەن بالا ويناعانعا وتە جاقسى. كۋبيكتىڭ بارلىق شەتىنە ءار ءتۇرلى سانداردى جابىستىرىپ قويۋ. كۋبيكتى بالامەن كەزەكتەسە وتىرىپ لاقتىرىپ، قانشا سان شىقسا، سونشا الدىنداعى ويىنشىقتى (ءوز تاڭداۋىڭىزعا قاراي) قوراپقا سالىپ وتىرۋ.
ەسكە سالايىق، بۇعان دەيىن لوگوپەد بالامەن ويناۋ ارقىلى ونىڭ سويلەۋىنە قالاي كومەكتەسە الاتىنىڭىزدى ايتقان بولاتىن.