بالانىڭ قورىلداپ ۇيىقتاۋى زيان با؟ سومنولوگ مامان جاۋاپ بەردى

رەسەيلىك سومنولوگ رومان بۋزۋنوۆ ءتۇس كورۋدىڭ سىرىن جانە كوپ بىلمەيتىن قىزىقتى فاكتىلەردى ءبولىستى. بۇل تۋرالى ول جۋرناليست يۋليا مەنشيەۆوعا بەرگەن سۇحباتىندا ايتتى.

سومنولوگيا - بۇل ۇيقىنى، ونىڭ فيزيولوگيالىق، بيوحيميالىق، جانە پسيحولوگيالىق اسپەكتىلەرىن زەرتتەيتىن عىلىم سالاسى. ول سالىستىرمالى تۇردە جاڭا پايدا بولعان عىلىمعا جاتادى. سومنولوگيانىڭ نەگىزدەرى ⅩⅩ عاسىردىڭ ورتاسىندا قالىپتاسا باستادى. تۇستەردى زەرتتەيتىن مامانداردى «سومنولوگ» دەپ اتايدى.

بالانىڭ قورىلداۋى نەنى بىلدىرەدى؟

رومان بۋزۋنوۆ كىشكەنتاي بالالاردىڭ قورىلداۋى جايلى سومنولوگيادا قانداي دەرەكتەر بارىن اشتى.

«بۇل - ۇلكەن ماسەلە. بالالاردىڭ 10-15 پايىزى قورىلمەن ۇيىقتايدى. ال 1-2 پايىزىندا «اپنوە» دياگنوزى بار. اپنوە - بۇل تىنىس الۋدىڭ ۋاقىتشا توقتاۋى نەمەسە باياۋلاۋى، ادەتتە بىرنەشە سەكۋندتان مينۋتقا دەيىن سوزىلاتىن جاعداي. بۇل قۇبىلىس كوبىنەسە ۇيقى كەزىندە كەزدەسەدى جانە ونى مەديتسينالىق تەرميندە «ۇيقى اپنوەسى» دەپ اتايدى. ۇيقى بالا ءۇشىن وتە ماڭىزدى ءرول اتقارادى. ونىڭ وسۋىنە، جەتىلۋىنە ۇيقى جاۋاپ بەرەدى. ەگەر بالاڭىز ۇيىقتاپ جاتقاندا 100-گە جۋىق قورىل ارقىلى تىنىس السا، ونىڭ ۇيقى جۇيەسى بۇزىلادى. ۇلكەندەردە دە بۇل قالىپتى جاعداي ەمەس. الايدا بالالاردىڭ قورىلداۋى ەكى ەسە الاڭداتاتىن جايت» دەپ جاۋاپ بەردى مامان.

ول بۇل نارسەگە ءمان بەرمەۋدىڭ قانداي نارسەگە اكەپ سوعاتىنى جايلى ايتتى.

«بالانىڭ قورىلداپ ۇيىقتاۋى ونىڭ ءوسۋىن، دامۋىن تەجەيدى. مەن اتا-انالارعا بۇل نارسەگە بەي-جاي قاراماۋعا كەڭەس بەرەمىن. سەبەبى، بۇل ەرتەڭ ۇلكەن ماسەلەگە اينالۋى مۇمكىن. ەرتەرەك بالاڭىزدى سومنولوگ مامانعا قاراتقانىڭىز ءجون» دەپ قوستى ول.