بالانىڭ ۇلتى بەلگىسىز بولسا ونى قالاي انىقتايدى

استانا. KAZINFORM - كونستيتۋتسيالىق سوت «نەكە (ەرلى-زايىپتىلىق) جانە وتباسى تۋرالى» كودەكستىڭ 65-بابىنىڭ كونستيتۋتسياعا سايكەستىگىن قارادى. بۇل باپتا بالانىڭ ۇلتى تەك اتا-اناسىنىڭ بىرەۋىنىڭ ۇلتىنا قاراي ايقىندالادى دەپ كورسەتىلگەن. الايدا ناقتى ءىس بويىنشا اتا-اناسىنىڭ ۇلتى بەلگىسىز بولعان جاعدايدا بالانىڭ ۇلتىن انىقتاۋ مۇمكىن بولماعان.

كونستيتۋتسيالىق سوتى «نەكە (ەرلى-زايىپتىلىق) جانە وتباسى تۋرالى» كودەكستىڭ (ن و ت ك) 65-بابىنىڭ كونستيتۋتسيانىڭ 19-بابىنىڭ 1-تارماعىنا سايكەستىگىن تەكسەرۋ جونىندەگى ءوتىنىشتى قارادى.

اتالعان باپتا بالانىڭ ۇلتى اتا-اناسىنىڭ ۇلتىمەن ايقىندالادى جانە بۇدان ءارى ول تەك قانا اتا-اناسىنىڭ بىرەۋىنىڭ ۇلتىنا وزگەرتىلۋى مۇمكىن دەپ بەكىتىلگەن.

- بالانىڭ اناسى قايتىس بولعان. ءتىرى كەزىندە ونىڭ قۇجاتى بولماعان. بالانىڭ اكەسى تۋرالى دەرەكتەر جوق. قولدا بار مالىمەتتەر نەگىزىندە قامقورشى اتا-اناسىنىڭ ۇلتى بويىنشا ونىڭ ۇلتىن ودان ءارى ايقىنداۋ ءۇشىن بالانىڭ تۋۋى تۋرالى اكت جازباسىنا قوسىمشا ەنگىزۋگە تىرىسقان، ءبىراق راستايتىن قۇجاتتاردىڭ بولماۋىنا بايلانىستى باس تارتىلدى. كەيىن سوت تا ن و ت ك-تىڭ 65-بابىنا سىلتەمە جاساي وتىرىپ، بالانىڭ ۇلتىن ايقىنداۋ، ەگەر ونىڭ اتا-اناسىنىڭ ۇلتى ايقىندالماسا، مۇمكىن ەمەس دەپ شەشتى. ءوتىنىش بەرۋشى ن و ت ك-تىڭ 65-بابى كونستيتۋتسيانىڭ 19-بابىنىڭ 1-تارماعىنا قايشى كەلەدى دەپ ەسەپتەيدى، اتالعان تارماققا سايكەس اركىم ءوزىنىڭ قاي ۇلتقا جاتاتىنىن ايقىنداۋعا جانە ونى كورسەتۋ-كورسەتپەۋگە قۇقىلى، - دەلىنگەن حابارلامادا.

كونستيتۋتسيالىق سوت كونستيتۋتسيانىڭ ماعىناسى بويىنشا ۇلتتى ايقىنداۋ ادامنىڭ ءوزىن-ءوزى سايكەستەندىرۋىمەن بايلانىستى ەكەنىن، وعان وتباسىلىق جانە تۋىستىق بايلانىستار مەن باسقا دا جاعدايلار اسەر ەتۋى مۇمكىن ەكەنىن كورسەتتى.

اتا-اناسىنىڭ ۇلتىنا نەگىزدەلگەن تاڭداۋ، ارينە، باسىمدىققا يە، سونىمەن بىرگە مۇنداي تاڭداۋ ءتۇرلى ومىرلىك جاعدايلارعا (اتا-اناسى بەلگىسىز، ولاردىڭ ۇلتى تۋرالى اقپارات جوق، بالانى باسقا ادامدار اسىراپ العان نەمەسە تاربيەلەگەن جانە ت. ب.) بايلانىستى ءاردايىم مۇمكىن ەمەس. ن و ت ك-تىڭ 65-بابى مۇنداي جاعدايلاردى ەسكەرمەيدى جانە وسىلايشا كونستيتۋتسيادا بەلگىلەنگەنگە تولىق سايكەس كەلمەيدى.

كونستيتۋتسيالىق سوت سونىمەن قاتار ۇلتى جەكە باسىن كۋالاندىراتىن قۇجاتتاردا كورسەتىلگەن نەمەسە باسقا دا قۇقىقتىق ماڭىزى بار كەزدە ادامنىڭ بەلگىلى ءبىر ۇلتقا جاتۋعا دەگەن ۇمتىلىسى جەتكىلىكسىز ەكەنىن اتاپ ءوتتى. مەملەكەت مۇنداي جاعدايلاردا ادام ۇسىنعان مالىمەتتەردى تەكسەرە الادى.

- كونستيتۋتسيالىق سوت نوتك- ءتىڭ اتالعان بابىن اتا-اناسى بەلگىسىز بولعان نەمەسە ولاردىڭ ۇلتىن انىقتاۋ مۇمكىن بولمايتىن جاعدايلاردا، سونداي-اق ازاماتتىڭ زاڭدى مۇددەلەرىن قوزعايتىن باسقا دا ومىرلىك جاعدايلار كەزىندە بالانىڭ ۇلتىن ايقىنداۋ مەن وزگەرتۋدىڭ وزگە تاسىلدەرىن (اتا-اناسىنان باسقا) كوزدەمەيتىن بولىگىندە كونستيتۋتسياعا سايكەس كەلمەيدى دەپ تانىدى. بۇل رەتتە كونستيتۋتسيالىق سوت اتا-اناسى بويىنشا ۇلتتى ايقىنداۋ مەن وزگەرتۋدىڭ كونستيتۋتسيالىلىعىنا كۇمان كەلتىرمەدى، - دەلىنگەن كونستيتۋتسيالىق سوت حابارلاماسىندا.

ايتا كەتەلىك ەلىمىزدە ازاماتتارعا قۇقىقتىق كەڭەس بەرەتىن جاساندى ينتەللەكت ازىرلەنەدى.

اۆتور

نازىم بولەسوۆا