بالانىڭ ءتىسىن جۇلام دەپ مۇگەدەك قىلعان ەمحانا نەبارى 1,5 ميلليون تەڭگە وتەماقى تولەيدى

قىزىلوردا. KAZINFORM - قىزىلوردا تۇرعىنى بالاسىنىڭ ءتىسى اۋىرعاندا ورتالىق قالالىق ەمحانانىڭ بالالار ستوماتولوگياسىنا بارىپ، ءتىس جۇلدىرعان. مۇنىڭ سوڭى اۋىر سالدارعا اپارىپ سوقتى.

ەمدەۋدەن كەيىنگى كەلەسى كۇنى بالانىڭ جاق سۇيەگى ءىسىنىپ، جالپى دەنساۋلىعى ناشارلاعان.

كەيىن بالاعا وبلىستىق كوپسالالى اۋرۋحانانىڭ جاق-بەت بولىمشەسىندە «سول جاق تومەنگى جاقتىڭ جەدەل ءىرىڭدى ودونتوگەندى فلەگموناسى، 7 ءتىسىن جۇلعانداعى جاعدايى» دياگنوزىمەن ەكى رەت وتا جاسالعان.

ارادا التى اي وتكەندە بالانىڭ جاق سۇيەگى قايتا ءىسىپ، ءىرىڭدى جاراسى جازىلماعاندىقتان ولار الماتى قالاسىندا اقىلى نەگىزدە اۋرۋحانادا ەمدەلىپ، وپەراتسيا جاساتۋعا ءماجبۇر بولعان.

مەديتسينالىق جانە فارماتسيەۆتيكالىق باقىلاۋ دەپارتامەنتى انانىڭ شاعىمى بويىنشا جۇرگىزىلگەن ەمحانانى تەكسەرۋ قورىتىندىسىنا سايكەس، ءتىس دارىگەرى كامەلەتكە تولماعان بالاعا مەديتسينالىق كومەك كورسەتۋ كەزىندە كلينيكالىق دياگنوستيكا جانە ەمدەۋ حاتتاماسىن ساقتاماعان.

ونىڭ ءتىسىن ورتا مەديتسينالىق ءبىلىمى بار ستوماتولوگ الىپ تاستاعان، ەمدەۋ الدىندا جاق سۇيەگىنىڭ رەنتگەنوگرافياسى وبەكتيۆتى تەكسەرىلمەي، اسقىنۋلار - تومەنگى جاقتىڭ قابىنۋ پروتسەسى بولعان.

بالانىڭ اناسى ستوماتولوگيالىق ەمحانادان وزىنە كەلگەن مورالدىق جانە ماتەريالدىق شىعىندى وتەۋدى سۇراپ، سوتقا جۇگىنگەن.

تالابىندا ول ەمحانا مەديتسينا قىزمەتكەرىنىڭ سالعىرتتىعىنان جانە العاشقى مەديتسينالىق كومەكتى دۇرىس كورسەتپەۋىنەن اۋرۋ اسقىنىپ، بالا 2 جىلعا جۋىق ۇيىقتاي الماي، دارىگەرلەردىڭ قورىتىندىسى بويىنشا مۇگەدەك بولىپ قالعانىن كورسەتكەن.

سونداي-اق ولار اقىلى نەگىزدە ءۇش وپەراتسيا جاساۋعا، ءتىس ەمدەۋگە جانە دارىگەرلەردەن كەڭەس الۋعا ءماجبۇر بولعان.

سوت ستوماتولوگيالىق ەمحانادان مورالدىق جانە ماتەريالدىق شىعىن ءۇشىن 1,5 ميلليون تەڭگەدەن استام وتەماقى ءوندىردى.

اۆتور

جانات قاپالبايەۆا