ونىڭ ايتۋىنشا، مەملەكەتتىك جاردەماقىلار اتا-انانىڭ ەڭبەك قىزمەتىنە قاراماستان تاعايىندالادى. ال مەملەكەتتىك الەۋمەتتىك ساقتاندىرۋ قورىنان تولەنەتىن الەۋمەتتىك تولەمدەر ازاماتتاردىڭ جوعالتقان تابىسىنىڭ ءبىر بولىگىن وتەۋگە باعىتتالعان.
- ءبىرىنشى، ەكىنشى جانە ءۇشىنشى بالا دۇنيەگە كەلگەن كەزدە وتباسىعا 164350 تەڭگە كولەمىندە ءبىرجولعى مەملەكەتتىك جاردەماقى تولەنەدى. ءتورتىنشى جانە ودان كەيىنگى بالالار تۋعان جاعدايدا تولەم مولشەرى 272475 تەڭگە، - دەدى سپيكەر استانا قالاسىنىڭ كوممۋنيكاتسيالار الاڭىندا.
سونىمەن قاتار ول جۇمىس ىستەمەيتىن اتا-انالارعا بالا ءبىر جارىم جاسقا تولعانعا دەيىن كۇتىمىنە بايلانىستى مەملەكەتتىك جاردەماقى بەرىلەدى. بيىل ونىڭ مولشەرى ءبىرىنشى بالاعا - 24912 تەڭگە، ەكىنشى بالاعا — 29454 تەڭگە، ءۇشىنشى بالاعا - 33952 تەڭگە، ءتورتىنشى جانە ودان كەيىنگى بالالارعا - 38493 تەڭگە. 2026 -جىلعى 1- تامىزداعى جاعداي بويىنشا استانا قالاسىندا 7821 وتباسى وسى جاردەماقىنى الىپ وتىر دەپ اتاپ ءوتتى.
ال جۇمىس ىستەيتىن اتا-انالارعا مەملەكەتتىك الەۋمەتتىك ساقتاندىرۋ قورىنان بالا ءبىر جارىم جاسقا تولعانعا دەيىن كۇتىمىنە بايلانىستى الەۋمەتتىك تولەم تولەنەدى. ونىڭ مولشەرى سوڭعى ەكى جىلداعى الەۋمەتتىك اۋدارىمدار جۇرگىزىلگەن ورتاشا ايلىق تابىستىڭ 40 پايىزىن قۇرايدى.
اسقار ايماعامبەتوۆ كوپبالالى وتباسىلاردى قولداۋ شارالارىنا دا توقتالدى. ونىڭ ايتۋىنشا، كامەلەتكە تولماعان ءتورت جانە ودان كوپ بالاسى بار وتباسىلار كوپبالالى وتباسى رەتىندە تانىلادى.
— كوپبالالى وتباسىلارعا ارنالعان مەملەكەتتىك جاردەماقى وتباسىنىڭ تابىسىنا قاراماستان تاعايىندالادى. ونىڭ مولشەرى ءتورت بالاسى بار وتباسىلارعا — 69330 تەڭگە، بەس بالاعا — 86673 تەڭگە، التى بالاعا — 104000 تەڭگە، جەتى بالاعا — 121360 تەڭگە. سەگىز جانە ودان كوپ بالاسى بار وتباسىلارعا ءار بالاعا 17300 تەڭگەدەن تولەنەدى، — دەدى دەپارتامەنت باسشىسى.
سونىمەن قاتار ماراپاتتالعان كوپبالالى انالارعا اي سايىن مەملەكەتتىك جاردەماقى قاراستىرىلعان. «كۇمىس القا» يەگەرلەرىنە — 27680 تەڭگە، ال «التىن القا»، «باتىر انا» اتاعىن العان جانە 1، II دارەجەلى «انا داڭقى» وردەنىمەن ماراپاتتالعان انالارعا 32000 تەڭگە كولەمىندە جاردەماقى تولەنەدى.
سونداي-اق مۇگەدەكتىگى بار بالالاردى تاربيەلەپ وتىرعان اتا-انالارعا اي سايىن مەملەكەتتىك جاردەماقى بەرىلەدى. بيىل ونىڭ مولشەرى 81871 تەڭگەنى قۇرايدى. قازىرگى ۋاقىتتا استانا قالاسىندا مۇنداي قولداۋ شاراسىمەن 12786 اتا-انا قامتىلعان.
ايتا كەتەيىك، بالالى وتباسىلاردى قولداۋعا بيىل 974 ميلليارد تەڭگە ءبولىندى.