بالالارمەن ساپارعا شىققاندا نەنى ەسكەرۋ كەرەك؟

استانا. KAZINFORM - بالاڭىزبەن بىرگە كولىكپەن ساپارعا شىعۋدى جوسپارلادىڭىز با؟ ساپارىڭىز جايلى ءارى قاۋىپسىز بولۋى ءۇشىن الدىن الا قامدانىڭىز. ماماندار نەنى ەسكەرۋ كەرەك ەكەنىن ايتتى، - دەپ حابارلايدى Almaty.tv.

جولعا شىقپاس بۇرىن كولىگىڭىزدى دايىنداڭىز:

دوڭگەلەكتەردەگى اۋا قىسىمىن تەكسەرىڭىز.

جارىق، تەجەگىش، بۇرىلىس شامدارىنىڭ جۇمىسىن تەكسەرىڭىز. بۇل - قاۋىپسىزدىكتىڭ باستى ەلەمەنتتەرىنىڭ ءبىرى.

تەجەگىش جۇيەسىنىڭ جۇمىسىن جانە اينەك تازالاعىشتى تەكسەرىڭىز. بۇل قولايسىز اۋا رايى كەزىندە وتە قاجەت.

جولدى جاقسى كورۋ ءۇشىن اينا باپتاۋلارىن رەتكە كەلتىرىڭىز.

بالالارعا ارنالعان اۆتوورىندىق دۇرىس ورناتىلعانىنا، بالا قاۋىپسىزدىك بەلدىگىن تاققانىنا نازار اۋدارىڭىز.

جاس ەرەكشەلىكتەرىنە قاراي بالالاردى تاسىمالداۋ ەرەجەلەرى:

1 جاسقا دەيىن

نارەستەنى قوزعالىس باعىتىنا قارسى ورناتىلعان اۆتوبەسىكپەن (0+ ساناتى) تاسىمالداۋ كەرەك. بەسىكتى الدىڭعى ورىندىققا دا، ارتقى ورىندىققا دا قويۋعا بولادى، الدىڭعى ورىندىققا قويعان جاعدايدا قاۋىپسىزدىك كوپشىگىن اجىراتۋ كەرەك.

1 جاستان 7 جاسقا دەيىن

بۇل جاستاعى بالالار بيىكتىگى مەن سالماعىنا سايكەس كەلەتىن بالالارعا ارنالعان اۆتوورىندىقتا وتىرۋى كەرەك. الدىڭعى جانە ارتقى ورىندىققا دا وتىرعىزۋعا رۇقسات ەتىلەدى.

7 جاستان 11 جاسقا دەيىن

ەگەر بالانىڭ بويى 150 س م- دەن جوعارى بولسا، ستاندارتتى قاۋىپسىزدىك بەلدىگىن پايدالانا الاسىز نەمەسە تەك اۆتوورىندىق، بۋستەردى پايدالانۋ قاجەت.

12 جاستان باستاپ

كادىمگى قاۋىپسىزدىك بەلدىگىن پايدالانىپ كەز كەلگەن جولاۋشىلار ورنىندا تاسىمالداۋعا رۇقسات ەتىلەدى. قوسىمشا قۇرىلعىلار قاجەت ەمەس.