بالالارعا قارجىلىق ساۋاتتىلىقتى ۇيرەتەتىن جاڭا مۋلتفيلم جارىق كوردى

استانا. KAZINFORM - قارجىلىق مونيتورينگى اگەنتتىگى «زاڭ جانە ءتارتىپ» ءنورماتيۆى اياسىندا قارجىلىق قاۋىپسىزدىك تاقىرىپتارىنا ارنالعان مۋلتفيلمدەر سيكلىن ىسكە قوستى.

بۇگىن بالالاردى قورعاۋ كۇنىنە وراي، قالىڭ كورەرمەن اراسىندا تانىمال «قوشقار مەن تەكە» مۋلتفيلمىنىڭ العاشقى سەرياسى جارىققا شىقتى.

العاشقى سەريا قارجى پيراميدالارى تاقىرىبىنا ارنالادى. بالالار ءسۇيىپ كورەتىن كەيىپكەرلەر كورەرمەندەرگە الاياقتىق سحەمالاردى قالاي انىقتاپ، وزدەرىن جانە جاقىندارىن قارجىلىق الداۋدان قالاي قورعاۋعا بولاتىنىن تۇسىندىرەدى.

- مۋلتفيلمدەر سيكلى بالالار اۋديتورياسىنا باعىتتالعان جانە ءوسىپ كەلە جاتقان ۇرپاقتىڭ قارجىلىق ساۋاتتىلىعى مەن قۇقىقتىق ساناسىن قالىپتاستىرۋدى ماقسات ەتەدى. كەلەسى بولىمدەردە لۋدومانيا، دروپپەرلەر، ينتەرنەت- الاياقتىق، زاڭسىز ميكروقارجىلىق ۇيىمداردىڭ قىزمەتى سياقتى ماڭىزدى تاقىرىپتاردى قوزعايدى، - دەلىنگەن ق م ا حابارلاماسىندا.

ايتا كەتۋ كەرەك، انيماتسيالىق تۋىندى كاسىبي مۋلتيپليكاتورلاردىڭ قولداۋىمەن جاسالدى.

ايتا كەتەلىك ەلدە تۇڭعىش رەت مۋلتفيلمدەر قازاقشا سۋردواۋدارمامەن كورسەتىلەتىنى تۋرالى جازعان ەدىك.