جاڭا تاقىرىپتاردى وقۋ-اعارتۋ مينيسترلىگى يۋنيسەف جانە بەيىندى مەملەكەتتىك ورگاندارمەن بىرلەسىپ ازىرلەدى. باعدارلاما جەكە جانە سيفرلىق قاۋىپسىزدىك، قۇقىق بۇزۋشىلىقتار مەن الاياقتىقتىڭ الدىن الۋ، توتەنشە جاعدايلار كەزىندەگى ءىس-قيمىل جانە دەنساۋلىقتى ساقتاۋ ماسەلەلەرىن قامتيدى.
ساباق مازمۇنى بالالاردىڭ جاس ەرەكشەلىگىنە قاراي بەيىمدەلگەن. مەكتەپكە دەيىنگى جاستاعى بالالار بەيتانىس ادامدارمەن قاۋىپسىز قارىم- قاتىناس جاساۋعا، كومەك سۇراۋعا جانە اداسىپ قالعان جاعدايدا قالاي ارەكەت ەتۋ كەرەكتىگىنە ۇيرەنەدى. باستاۋىش سىنىپتاردا جەكە شەكارا، ينتەرنەتتەگى قاۋىپسىزدىك، كۇماندى سىلتەمەلەر، ءورت جانە ەۆاكۋاتسيا كەزىندەگى ارەكەتتەر قاراستىرىلادى.
جاسوسپىرىمدەر ءۇشىن بۋللينگ پەن كيبەربۋللينگ، ينتەرنەت-الاياقتىق، دەربەس دەرەكتەردى قورعاۋ، جالعان اقپارات، ديپفەيكتەر جانە جاساندى ينتەللەكتىنى قاۋىپسىز پايدالانۋ تاقىرىپتارى ەنگىزىلگەن. سونىمەن قاتار قىسىم كورسەتۋ، بوپسالاۋ، قورقىتۋ، اقشا تالاپ ەتۋ جانە قۋدالاۋ جاعدايلارى تالقىلانادى.
جوعارى سىنىپ وقۋشىلارى مەن كوللەدج ستۋدەنتتەرى دروپپەرلىك پەن «وڭاي اقشا» سحەمالارىن، قارجىلىق جانە ەڭبەك الاياقتىعىن، قاۋىپتى ونلاين-تانىستىقتاردى، گرۋمينگ پەن ستالكينگتى، مانيپۋلياتسيا مەن ارباۋدى، سونداي-اق قۇقىققا قايشى ارەكەتتەرگە تارتىلۋ تاۋەكەلدەرىن قاراستىرادى.
وقۋ-اعارتۋ مينيسترلىگى مالىمەتىنشە، ساباقتار اپتا سايىن سىنىپ نەمەسە كۋراتورلىق ساعات اياسىندا 10 مينۋتتان وتكىزىلەدى. نەگىزگى باسىمدىق پراكتيكالىق داعدىلارعا بەرىلگەن: بالالار ناقتى ومىرلىك جاعدايلاردى تالداپ، قاۋىپتى الدىن الا تانۋعا، ءوزىن قورعاۋعا جانە كومەك قاجەت بولعاندا كىمگە جۇگىنۋ كەرەكتىگىن بىلۋگە ۇيرەنەدى.
مەكتەپتەردە 2-4-سىنىپ وقۋشىلارىنىڭ ارالىق باعالاۋى وتەتىنىن جازعان ەدىك.