بالالار قاۋىپسىزدىگى مەن ونلاين-پلاتفورمالار: قۇرىلتاي جاڭا زاڭ جوباسىن ماقۇلدادى

استانا. KAZINFORM -بۇگىن قۇرىلتاي وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ونلاين-پلاتفورمالار جانە ماسس-مەديا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە ونلاين-پلاتفورمالار جانە ماسس- مەديا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارى ءبىرىنشى وقىىمدا ماقۇلداندى.

Фото: Kazinform/ ЖИ

دەپۋتات جاناربەك ءاشىمجاننىڭ ايتۋىنشا، زاڭ جوباسى مىنالاردى كوزدەيدى:

- جەدەل حابارلار سەرۆيستەرىن قوسپاعاندا، پايدالانۋشىلاردى الەۋمەتتىك جەلىلەردە 16 جاسقا دەيىن تىركەۋگە تىيىم سالۋ؛

- ونلاين-پلاتفورمالاردىڭ وكىلدىكتەرىن قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن مىندەتتى ەسەپتىك تىركەۋ؛

- اۋديوۆيزۋالدى پلاتفورما ۇعىمى جانە ولاردىڭ وپەراتورلارى قىزمەتىنىڭ ءتارتىبى ەنگىزىلەدى؛

- ۋاكىلەتتى ورگانعا 5 مىڭنان استام جازىلۋشىسى، اۋديتورياسى بار ونلاين- پلاتفورمالاردا پايدالانۋشىلار ءتىزىلىمىن جۇرگىزۋ قۇزىرەتى بەرىلەدى؛

- ونلاين-پلاتفورمالاردا پايدالانۋشىلاردىڭ ءبىلىم بەرۋ كۋرستارىن نەمەسە بەلگىلى ءبىر سالاداعى وقىتۋ ماتەريالى بار كونتەنتتى تاراتۋ كەزىندە وسىنداي كونتەنتتى ديپلوم نەمەسە سەرتيفيكات مالىمەتتەرىمەن، ءتيىستى ءبىلىمنىڭ بار ەكەندىگى تۋرالى حابارلامامەن سۇيەمەلدەۋ مىندەتى بەلگىلەنەدى؛

- «وككۋلتتىك قىزمەتتەر» ۇعىمى ەنگىزىلەدى، ياعني تابيعاتتان تىس، پارانورمالدى نەمەسە عىلىمي تۇرعىدان راستالماعان قابىلەتتەر تۋرالى مالىمدەمەلەرگە نەگىزدەلگەن قىزمەتتەر. بۇل رەتتە وسى قىزمەتتەر تۋرالى كونتەنت ونىڭ ويىن-ساۋىقتىق سيپاتى جانە عىلىمي نەمەسە پراكتيكالىق تۇرعىدان راستالماعانى تۋرالى ەسكەرتۋمەن سۇيەمەلدەنۋگە ءتيىس؛

- ينتەرنەت-باسىلىمدى ەسەپكە قويۋ نەمەسە قايتا ەسەپكە قويۋ كەزىندە قورلاۋ سيپاتىنداعى ەلەمەنتتەرى بار ونىڭ دومەندىك اتاۋىن جانە ب ا ق اتاۋىن پايدالانۋعا جول بەرمەۋ بولىگىندە باق ءۇشىن تالاپتار بەلگىلەنەدى؛

- مەملەكەتتىك ورگاننىڭ رەسمي جاۋاپتارىن بۇقارالىق اقپارات قۇرالدارىنىڭ تاڭبالاۋدى جۇزەگە اسىرۋ مىندەتى دە بار؛

- تەلەراديوارنالاردى ەركىن قول جەتكىزىلەتىن تەلەراديوارنالار تىزبەسىنە ەنگىزگەن كۇننەن باستاپ كۇنتىزبەلىك 30 كۇن ىشىندە ولاردىڭ حابار تاراتۋدى ۇيىمداستىرۋ جونىندەگى مىندەتتەرىن قاراستىرۋ كوزدەلگەن؛

- زاڭعا قايشى كونتەنتتى تاراتقانى ءۇشىن ونلاين-پلاتفورمالاردىڭ اكىمشىلىك جاۋاپكەرشىلىگىن زاڭنامالىق بەكىتۋ بار؛

- ۋاكىلەتتى ورگاننىڭ قازاقستان رەسپۋبليكاسىنىڭ اۋماعىنداعى ونلاين-پلاتفورمادا قۇقىققا قايشى كونتەنتتى جويۋ جونىندەگى نۇسقامالارىن ونلاين-پلاتفورما وكىلدىگىنىڭ ورىنداماعانى ءۇشىن اكىمشىلىك جاۋاپكەرشىلىك كوزدەلگەن؛

- بۇقارالىق اقپارات قۇرالدارىندا جانە ونلاين-پلاتفورمالاردا بالاعات سوزدەر ايتقانى ءۇشىن جاۋاپكەرشىلىك بار؛

- ماسس-مەديا جانە ونلاين-پلاتفورمالار سالاسىنداعى سالالىق زاڭنامانى قولدانىستاعى نورمالارىنا سايكەس كەلتىرۋ قاراستىرىلعان.

ال دەپۋتات الەكساندر دانيلوۆتىڭ ايتۋىنشا، تسيفرلىق الەم كۇن سايىن وزگەرىپ وتىرادى جانە زاڭناما وسى سىن-قاتەرلەرگە جاۋاپ بەرۋى ءتيىس.

- جاڭا زاڭ جوبالارىنىڭ باستى ماقساتى - ينتەرنەتتە ءتارتىپ ورناتۋ، زاڭداردى زاماناۋي مەديانى دامىتۋعا بەيىمدەۋ جانە ازاماتتاردى قاۋىپتى مازمۇن مەن الداۋدان قورعاۋ. اقپاراتتىق كەڭىستىك ءومىرىمىزدىڭ اجىراماس بولىگىنە اينالعاندىقتان، ول دا شىنايى ومىردەگىدەي قاۋىپسىز ءارى رەتتەلگەن بولۋى كەرەك،-دەدى ول.

زاڭ جوبالارى جەلىنىڭ بارلىق مۇشەسى ءۇشىن اشىق ەرەجەلەردى بەلگىلەيدى جانە بىرنەشە نەگىزگى قادامدى قامتيدى اتاپ ايتقاندا، بالالاردىڭ قاۋىپسىزدىگى. 16 جاسقا تولماعان جاسوسپىرىمدەرگە الەۋمەتتىك جەلىلەردە تىركەلۋگە تىيىم سالىنادى. بۇل رەتتە اتا-انالارىمەن جانە دوستارىمەن بايلانىسۋعا ارنالعان كادىمگى مەسسەندجەرلەر ولارعا تولىق قولجەتىمدى بولىپ قالادى.

پلاتفورمالاردىڭ قازاقستان رەسپۋبليكاسىنىڭ زاڭدارىن ساقتاۋى. شەتەلدىك الەۋمەتتىك جەلىلەر مەن بەينەسەرۆيستەر ەلىمىزدە رەسمي وكىلدىكتەرىن اشۋعا مىندەتتى بولادى. زاڭعا قايشى ماتەريالداردى تاراتۋ جانە مەملەكەتتىك ورگانداردىڭ تالابى بويىنشا تىيىم سالىنعان اقپاراتتى جويۋدان باس تارتقانى ءۇشىن پلاتفورمالارعا اكىمشىلىك جاۋاپتىلىق ەنگىزىلەدى.

بەينەسەرۆيستەر مەن ءىرى بلوگەرلەرگە ارنالعان ەرەجەلەر. زاڭ ستريمينگتىك پلاتفورمالاردىڭ جۇمىسىنا قاتىستى ستاندارتتاردى ناقتى ايقىندايدى. سونىمەن قاتار بەلگىلى ءبىر پاراقشالار مەن ارنالاردىڭ رەسمي ءتىزىلىمىن ەنگىزۋ ۇسىنىلادى.

جالعان ساراپشىلاردان قورعاۋ. ينتەرنەتتە وقىتۋ كۋرستارىن ازىرلەيتىن جانە ساتاتىن اۆتورلار ءوز بىلىكتىلىگىن ديپلوممەن نەمەسە سەرتيفيكاتپەن راستاۋعا مىندەتتى بولادى. پايدالانۋشىلار سپيكەردىڭ ناقتى ءبىلىمى بار-جوعىن انىق ءبىلۋى كەرەك.

ەزوتەريكا سالاسىنداعى اشىقتىق. وككۋلتتىك قىزمەتتەردىڭ رەسمي ۇعىمى ەنگىزىلەدى. بال اشۋ جانە تابيعاتتان تىس تاجىريبەلەر تۋرالى كەز كەلگەن كونتەنتكە نەمەسە جارناماعا ونىڭ عىلىمي دالەلى جوق، تەك ويىن-ساۋىق سيپاتىنداعى اقپارات ەكەنى تۋرالى ناقتى بەلگى قويۋ ۇسىنىلادى.

- بۇقارالىق اقپارات قۇرالدارىنا قورلايتىن اتاۋلار مەن دومەندىك اتاۋلاردى قولدانۋعا تىيىم سالىنادى. ال جاڭا تەگىن تەلە-جانە راديوارنالار رۇقسات العاننان كەيىن ءبىر اي ىشىندە ەفيرگە شىعۋعا مىندەتتەلەدى. سونداي-اق مەملەكەتتىك ورگانداردىڭ رەسمي جاۋاپتارىن ارنايى بەلگىلەۋ ۇسىنىلادى. زاڭ جوباسىندا باق پەن ونلاين-پلاتفورمالاردا بالاعات سوزدەر قولدانعانى ءۇشىن جاۋاپكەرشىلىك قاراستىرىلعان. بۇل زاڭ جوباسىن قابىلداۋ ۋاقتىلى ءارى قاجەتتى قادام دەپ ەسەپتەيمىن. ول زاڭسىز كونتەنتتىڭ تارالۋىن ازايتۋعا، بالالاردى ينتەرنەتتەگى قاۋىپ-قاتەردەن قورعاۋعا، ازاماتتاردى الاياقتاردان ساقتاۋعا جانە ەلىمىزدىڭ ءاربىر تۇرعىنى ءۇشىن ءقاۋىپسىز ءارى ءادىل سيفرلىق ورتا قالىپتاستىرۋعا مۇمكىندىك بەرەدى،-دەدى دەپۋتات.

بۇعان دەيىن مادەنيەت جانە اقپارات ءمينيسترى ارمان قىرىقبايەۆ زاڭ جوبالارىنىڭ نەگىزگى باعىتتارىن اتاعان ەدى.