بالا تەرەزەدەن قۇلاپ كەتپەۋ ءۇشىن نە ىستەۋ كەرەك

استانا. KAZINFORM - استانادا بالالاردىڭ تەرەزەدەن قۇلاپ كەتۋ وقيعالارى ءالى دە ازايماي تۇر. بۇل تۋرالى قالالىق توتەنشە جاعدايلار دەپارتامەنتىنىڭ جەدەل-قۇتقارۋ جاساعى باسشىسىنىڭ مىندەتىن اتقارۋشى جانات كامەردەنوۆ ايتىپ، قايعىلى جاعدايلاردىڭ الدىن الۋ ءۇشىن تۇرعىندارعا قانداي ساقتىق شارالارىن ساقتاۋ كەرەكتىگىن ءتۇسىندىردى. بۇل تۋرالى ەلوردا اكىمدىگىنىڭ رەسمي سايتى جازدى.

قۇتقارۋشىلاردىڭ ايتۋىنشا، مۇنداي وقيعالار كۇن جىلى كەزدە جيىلەي تۇسەدى.

- كۇن جىلىنا سالىسىمەن، تەرەزەلەردى اشىپ قويىپ جاتادى. ءدال وسى ۋاقىتتا بالالار قۇلاپ كەتەتىن جاعدايلار باستالادى. كەي كۇندەرى ءتورت بالاعا دەيىن قۇلاپ جاتسا، كەيدە ءبىر بالاعا قاتىستى جاعداي تىركەلەدى. بۇدان ەشكىم ساقتاندىرىلماعان - بۇل جاڭا تۇرعىن ۇيدە دە، ەسكى كوپقاباتتى ۇيدە دە بولۋى مۇمكىن. تەرەزەسى بار كەز كەلگەن ۇيدە بالا قاراۋسىز قالسا، تەرەزەدە ارنايى قورعانىس قۇرىلعىلارى بولماسا، مۇنداي جاعدايدىڭ بولۋى ابدەن ىقتيمال. قالادا بەلگىلى ءبىر اۋدانعا عانا ءتان جاعداي دەپ ايتۋعا كەلمەيدى. بالالار ەكىنشى قاباتتان دا، ون ءتورتىنشى قاباتتان دا قۇلاپ جاتادى، - دەيدى جانات كامەردەنوۆ.

ونىڭ ايتۋىنشا، قازىر مۇنداي قاۋىپتەردىڭ الدىن الۋعا ارنالعان ءتۇرلى قۇرىلعىلار بار.

- قاۋىپسىزدىكتى قامتاماسىز ەتۋگە ارنالعان ارنايى تەحنيكالىق قۇرالدار بار - تەمىر تورلار، ءتىپتى قورعانىس تورلار دا قولدانىلادى. ارنايى كۇشەيتىلگەن ماسا تورلارى بار، ولاردى وتە مىقتاپ ورناتادى، ءتىپتى ەرەسەك ادام دا سىندىرا المايدى. سونىمەن قاتار تەرەزەنىڭ اشىلۋىن شەكتەيتىن ارنايى قورعانىس سىمدارى بار، ولاردى ورناتۋ ارقىلى تەرەزەنى تولىق اشۋعا مۇمكىندىك بولمايدى، - دەپ ءتۇسىندىردى ت ج د وكىلى.

سونداي-اق ول اتا- انالاردى بالالارمەن تەرەزە جانىندا ويناۋدىڭ قاۋىپتىلىگى جايىندا سويلەسۋگە شاقىردى.

- تەرەزە ماڭىنا جيھاز، ورىندىق، ۇستەل قويماۋ كەرەك. بالالاردى پاتەردە جالعىز قالدىرماڭىزدار، بۇلدىرشىندەر ۇيدە بولعان كەزدە تەرەزەلەردى قاتتى اشىپ قويماڭىزدار. بالالاردىڭ تەرەزە الدىنا شىعۋىنا جول بەرمەڭىزدەر. قاۋىپتىڭ الدىن الۋ ءۇشىن ارنايى تەحنيكالىق قۇرالداردى قولدانىڭىزدار، - دەدى جانات كامەردەنوۆ.

ايتا كەتەيىك، بالانىڭ تەرەزەدەن قۇلاپ كەتۋىنە سەبەپ بولعان اتا- انالار نەمەسە قامقورشىلاردىڭ ارەكەتى ناقتى جاعدايعا بايلانىستى قازاقستان رەسپۋبليكاسىنىڭ قىلمىستىق كودەكسىندەگى ءتۇرلى باپتار بويىنشا جاۋاپكەرشىلىككە تارتىلۋى مۇمكىن. مىسالى، ەگەر بالا قاراۋسىز قالىپ، تەرەزەدەن قۇلاپ كەتسە، بۇل ق ك- ءنىڭ 125-بابى - «قاۋىپتى جاعدايدا قالدىرۋ» بويىنشا قارالۋى مۇمكىن. ال ەگەر بالانىڭ جاراقاتتانۋىنا اتا- انانىڭ نەمقۇرايلىلىعى سەبەپ بولسا، بۇل ق ك- ءنىڭ 156-بابى - «تاربيە بەرۋ مىندەتتەرىن ورىنداماۋ» بويىنشا سارالانۋى ىقتيمال.

ايتا كەتەيىك، باتىس قازاقستاندا ءۇش جىلدا 30 عا جۋىق بالا تەرەزەدەن قۇلاپ كەتكەن.