بالا قۇقىقتارىن قورعاۋ كوميتەتى بلوگەرلەرگە ۇندەۋ جاسادى

استانا. KAZINFORM – ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى بارلىق بلوگەرلەردى، ينفليۋەنسەرلەردى جانە مەديا سالاسىنىڭ قاتىسۋشىلارىن بالالاردىڭ قۇقىقتارىن ساقتاۋعا جانە قولدانىستاعى زاڭنامانى قاتاڭ ۇستانۋعا شاقىردى.

- الەۋمەتتىك جەلىدە بالاسىنىڭ قۇقىقتارى بۇزىلعانىن مالىمدەگەن انانىڭ ۆيدەوۇندەۋى تارادى. بۇل - تانىمال بلوگەرلەردىڭ ءبىرى جاريالاعان، كامەلەتكە تولماعان بالانى تۇسىرگەن بەينەماتەريال. كوميتەت ءتوراعاسى ناسىمجان وسپانوۆا بالانىڭ اناسىمەن تىكەلەي بايلانىسقا شىعىپ، جان- جاقتى كومەك ۇسىندى - پسيحولوگيالىق جانە زاڭگەرلىك كومەك قاراستىرىلدى. قاجەت بولعان جاعدايدا كوميتەت بالانىڭ قۇقىقتارى مەن مۇددەلەرىن قورعاۋ ءۇشىن رەسمي تۇردە سوت پروتسەسىنە قاتىسۋعا دايىن، - دەپ جازىلعان كوميتەت حابارلاماسىندا.

كوميتەت بارلىق بلوگەرلەردى، ينفليۋەنسەرلەردى جانە مەديا سالاسىنىڭ قاتىسۋشىلارىن بالالاردىڭ قۇقىقتارىن ساقتاۋعا جانە قولدانىستاعى زاڭنامانى قاتاڭ ۇستانۋعا شاقىرادى. جاقسى نيەتپەن تۇسىرىلسە دە، بالالار قاتىسقان كونتەنتتى جاريالاۋ ولاردىڭ پسيحولوگيالىق جاي-كۇيىنە تەرىس اسەر ەتىپ، قۇقىقتىق جاۋاپكەرشىلىككە اكەلۋى مۇمكىن.

- قازاقستان رەسپۋبليكاسىنىڭ ازاماتتىق كودەكسىنىڭ 145-بابىنا سايكەس، كەز كەلگەن ادامنىڭ، سونىڭ ىشىندە بالانىڭ بەينەسىن جاريالاۋ تەك ونىڭ نەمەسە زاڭدى وكىلىنىڭ كەلىسىمىمەن عانا جۇرگىزىلەدى. سونداي-اق، «دەربەس دەرەكتەر جانە ولاردى قورعاۋ تۋرالى» زاڭعا سايكەس، بالانىڭ بەينەسى قولجەتىمدىلىگى شەكتەۋلى جەكە دەرەك بوپ سانالادى جانە زاڭمەن قورعالادى. قۇرمەت، قورعاۋ جانە قاۋىپسىزدىك - ءاربىر بالانىڭ قۇقىعى. بۇل قۇقىقتار شىنايى ومىردە دە، سيفرلىق كەڭىستىكتە دە قامتاماسىز ەتىلۋى كەرەك، - دەيدى كوميتەت.

بۇعان دەيىن بالا قۇقىقتارى جونىندەگى ۋاكىل دينارا زاكييەۆا تانىمال بلوگەر ۆيدەوسىنان كەيىن بۋللينگكە ۇشىراعان بالا تۋرالى پىكىرىن ءبىلدىردى جانە بلوگەردى قاتاڭ سىنعا العان ەدى.

سونداي-اق بالالار ومبۋدسمەنى «داريكورن داۋىنا» قاتىستى پىكىر ءبىلدىردى.