بالا قانشا جاستان باستاپ قارجى ساۋاتتىلىعىن جاقسى قابىلدايدى؟

استانا. قازاقپارات - بەلگىلى ەكونوميست ماقسات حالىق «وي-لايىق» Youtube-ارناسىنا بەرگەن سۇحباتىندا بالاعا قارجىلىق ساۋاتتىلىقتى قاشاننان باستاپ ۇيرەتۋ كەرەگىن ايتتى.

ول عالىمدار بالاعا ءتىپتى 7 جاسىندا قارجىلىق ساباق بەرۋگە بولادى دەپ توپشىلاعانىن جەتكىزدى.

«وسىدان بىرنەشە جىل بۇرىن جاسوسپىرىمدەرگە ارنالعان «ءاميان» دەگەن باعدارلاماعا ساراپشى بولدىم. كەيىنگى جىلدارى تاعى ساراپشى بولدىم. قاراپ تۇرسام، باعدارلاما 10-12 جاستاعى بالالارعا ارنالعان دەپ ايتىلسا دا، ءبىر-ەكى بالا 9 جاستا بولدى. كىشكەنتاي بالالار. سوسىن مەن «بالالارعا قارجى ساۋاتتىلىعى تۋرالى قالاي ايتامىن» دەپ ويلادىم. وسىلاي قينالىپ وتىرسام، كەرىسىنشە، بالالار وتە پىسىق بولىپ، اقپاراتتى جىلدام قابىلداپ، زات ساتىپ الۋعا دۇكەنگە بارعان كەزدە ساتۋشىدان «تۇبىرتەكتى بەرىڭىز، ول مەنىڭ تۇتىنۋشىلىق قۇقىعىم» دەپ ايتىپ جاتقانىن ەستىپ، بالا 9 جاستا بولسا دا، اقپارات بەرە بەرۋ كەرەگىن، ول قارجىلىق ساۋاتتىلىققا قاتىستى اقپاراتتى قابىلداي بەرەدى ەكەن دەگەن وي ءتۇيدىم. سوڭعى ءۇش جىلدىقتا گارۆارد ۋنيۆەرسيتەتىنىڭ عالىمدارى زەرتتەۋ جاريالادى، وندا بالاعا قارجى ساۋاتتىلىعىن 7 جاستان باستاپ ۇيرەتۋگە بولاتىنى جازىلعان. ءسويتىپ مەن 9 جاس دەگەننىڭ بەر جاعى ەكەنىن ءتۇسىندىم. وعان قوسا، قازاقستاندىق بانكتەردە بالالارعا ارنالعان شوت اشىلا باستادى. بۇل ءۇردىستى مەن تولىعىمەن قولدايمىن، بالالاردىڭ جەكە شوتى بولسىن، وعان اقشا اۋدارىپ تۇرايىق، قالاي ساۋدا جاساۋ كەرەگىن ۇيرەتەيىك. نەگىزى مەن وقۋشىلاردىڭ وقۋ باعدارلاماسىنا قوسىمشا ءپان ەنگىزۋ دەگەندى قولدامايمىن، ويتكەنى بالا ونسىز دا ماتەماتيكانى، نەگىزگى ءتىل مەن ادەبيەت، فيزيكانى دۇرىس مەڭگەرىپ شىعۋ كەرەك. ءبىراق ءبىلىم سالاسىنا قانداي رەفورما كەرەك دەگەندە، قارجى ساۋاتتىلىعى بولۋى كەرەك دەپ ويلايمىن»، - دەدى مامان.

ەسكە سالايىق، بۇعان دەيىن مەكتەپ پەن ج و و-دا قارجىلىق جانە سيفرلىق ساۋاتتىلىق باعدارلاماسى ەنگىزىلۋى مۇمكىن ەكەنى حابارلانعان بولاتىن.