- انا مەن بالاعا قولداۋ كورسەتۋ ءۇشىن بەرىلەتىن بۇل تولەم اكەگە ەمەس، اناسىنا تاعايىندالادى. ەر ادام بالا كۇتىمىنە بايلانىستى دەمالىسقا شىعا الادى، ءبىراق الەۋمەتتىك تولەمدى ءوزى ەمەس، جۇبايى الادى، - دەپ جاۋاپ بەردى ەڭبەك ءمينيسترى اسقاربەك ەرتايەۆ تىلشىلەر سۇراعىنا.
مەملەكەتتىك الەۋمەتتىك ساقتاندىرۋ قورىنىڭ باسقارما ءتوراعاسى الماس قۇرمانوۆ بۇل ءتارتىپتىڭ جىنىسىنا قاراي كەمسىتۋ بولىپ سانالمايتىنىن اتاپ ءوتتى.
ونىڭ تۇسىندىرۋىنشە، «ەرلەر مەن ايەلدەردىڭ تەڭ قۇقىقتارى مەن تەڭ مۇمكىندىكتەرىنىڭ مەملەكەتتىك كەپىلدىكتەرى تۋرالى» زاڭنىڭ 4-بابىنا سايكەس، انا مەن بالانى قولداۋعا باعىتتالعان شارالار جىنىستىق بەلگى بويىنشا كەمسىتۋگە جاتپايدى.
- ەر ادام ەڭبەك كودەكسىنە سايكەس بالا كۇتىمىنە بايلانىستى دەمالىسقا شىعا الادى. ال الەۋمەتتىك تولەم اناسىنا تاعايىندالادى. ءبىراق ەر ادام بالانى جالعىز تاربيەلەپ، قورعانشى بولسا، تولەم الۋ قۇقىعى بار. مۇندا ءبىز تولەم الۋ مۇمكىندىگىن شەكتەمەيمىز، - دەدى الماس قۇرمانوۆ.
سونىمەن بىرگە، جاڭا ءتارتىپ بويىنشا انا ءسابيى 1,5 جاسقا تولعانشا جۇمىسقا شىقسا دا، الەۋمەتتىك تولەم تولىققاندى 1,5 جىل بويى بەرىلەدى.
- جۇمىسقا شىققان ايەلدىڭ ءىزىن باقىلاپ، سوڭىنان ەشكىم تۇسپەيدى. قازىر ءبىز مەملەكەتتىك كىرىستەر كوميتەتىنە ءتيىستى مالىمەتتەردى جولداپ، باسقا دا شارالاردى قولعا الامىز. ەندى انانىڭ جۇمىسقا شىققانى تۋرالى بۇيرىقتى سۇراتىپ، سونىڭ نەگىزىندە تولەم توقتاتىلمايدى. انا ءسابيى 1,5 جاسقا تولعانشا جاردەماقىسىن تولىق الادى، - دەپ ءتۇسىندىردى ا. قۇرمانوۆ.
ايتا كەتەيىك، بالاسى 1,5 جاسقا تولماي جۇمىسقا شىققان انالاردىڭ جاردەماقىسى تولىق ساقتالادى. بۇل وزگەرىس ايەلدەردىڭ جۇمىسقا ورالۋىنا كەدەرگى كەلتىرەتىن شەكتەۋدى جويۋعا باعىتتالعان.
سونىمەن قاتار، جاردەماقى ءۇشىن اجىراسۋدىڭ الدىن الۋ ءۇشىن بولەك تۇراتىن اتا-انالار دا بالانىڭ وتباسى قۇرامىنا ەنگىزىلەدى.
ەڭبەك ءمينيسترى 36 جاردەماقىنىڭ 14 تۇرىنە عانا مۇقتاجدىق كريتەريى ەنگىزىلەتىنىن ايتتى.