بالا اسىراپ العىسى كەلەتىن ازاماتتار قانداي قۇجات جيناۋى ءتيىس
استانا. KAZINFORM - جاقىندا سەناتور گەننادي شيپوۆسكيح ەلىمىزدە بالا اسىراپ الۋ پروتسەسى تىم ۇزاق ەكەنىن ايتىپ، دەپۋتاتتىق ساۋال جولداعان بولاتىن. نەكە جانە وتباسىنا قاتىستى قولدانىستاعى زاڭنامادا بالا اسىراپ الۋ ءتارتىبى ەگجەي-تەگجەيلى قاراستىرىلعان. ال پروتسەس قۇجات جيناۋدان باستالاتىنى بەلگىلى. وسى ورايدا، وقۋ-اعارتۋ مينيسترلىگىنەن قۇجاتتار ءتىزىمىن ناقتىلادىق.
- «نەكە جانە وتباسى تۋرالى» ق ر كودەكسىنىڭ قابىلدانۋىمەن قازاقستاندىق ازاماتتاردىڭ بالا اسىراپ الۋ ءراسىمى جەڭىلدەتىلدى. بالانى اسىراپ الۋعا تىلەك بىلدىرگەن ادام تۇرعىلىقتى جەرى بويىنشا قورعانشىلىق نەمەسە قامقورشىلىق جونىندەگى فۋنكتسيالاردى جۇزەگە اسىراتىن ورگانعا ءوتىنىش، جەكە باسىن كۋالاندىراتىن قۇجاتتاردى، وتباسى جاعدايى تۋرالى، دەنساۋلىق جاعدايى، سوتتالماعاندىعى تۋرالى انىقتامانى، جاقىن تۋىستارىنىڭ كەلىسىمىن، تۇرعىن ءۇيىنىڭ بولۋى جانە جالاقىسى تۋرالى انىقتامانى، سونداي-اق جەتىم بالالار مەن اتا-اناسىنىڭ قامقورلىعىنسىز قالعان بالالاردى (بالانىڭ جاقىن تۋىستارىن قوسپاعاندا) وتباسىندا تاربيەلەۋگە قابىلداۋعا تىلەك بىلدىرگەن ادامداردىڭ دايارلىقتان وتكەنى جونىندەگى سەرتيفيكاتتى ۇسىنادى، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.
ۆەدومستۆو اقپاراتىنا قاراعاندا، بالا اسىراپ الۋعا ۇمىتكەر دەپ تانىلعاننان كەيىن، ول بالانى تاڭداپ، بالامەن جاقىن تانىسۋ ءۇشىن ەكى اپتا ۋاقىت بەرىلەدى. سودان كەيىن عانا قۇجاتتاردى سوتقا دايىنداۋعا مىندەتتى. بالا اسىراپ الۋ تۋرالى تۇپكىلىكتى شەشىمدى سوت قابىلدايدى.
ەسكە سالساق، بىلتىر بالا قۇقىقتارى جونىندەگى ۋاكىل دينارا زاكيەۆا بالالاردى رەسمي نەكەدە تۇرماعان ەر ادامداردىڭ قامقورلىعىنا بەرۋگە تىيىم سالۋ كەرەكتىگىن ءمالىم ەتتى.
بۇدان بۇرىن حابارلانعانداي، بيىل شىلدە ايىندا كونستيتۋتسيالىق سوت ەرلەر مەن ايەلدەر بالا اسىراپ العىسى كەلەتىندەردىڭ تىزىمىندە تەڭ دارەجەدە ەكەنىن جاريالادى.
اۆتور
رۋسلان عابباسوۆ