باكۋدە الەمنىڭ ءدىني كوشباسشىلارىنىڭ جاھاندىق سامميتى باستالدى

استانا. KAZINFORM - ازەربايجاندا پرەزيدەنت يلحام اليەۆتىڭ قامقورلىعىمەن COP29 كليماتتىق كونفەرەنسياسى اياسىندا «الەمدىك دىندەر جاسىل عالام ءۇشىن» اتتى III ءدىن كوشباسشىلارىنىڭ جاھاندىق سامميتى ءوتىپ جاتىر.

ءىس-شاراعا 30 عا جۋىق الەمدىك ءدىني كوشباسشىلار، سونىڭ ىشىندە ۆاتيكان مەن ءال-ازحاردىڭ جوعارى لاۋازىمدى تۇلعالارى، سونداي-اق 55 ەل مەن 30 حالىقارالىق ۇيىمنىڭ وكىلدەرى قاتىستى. قاتىسۋشىلار اراسىندا ءارتۇرلى مادەني جانە ءدىني ورتاداعى عالىمدار، ءدىن كوشباسشىلارى جانە باق وكىلدەرى بار.

ەكى كۇنگە سوزىلاتىن سامميت قاتىسۋشىلاردىڭ كليماتتىڭ وزگەرۋىنىڭ ەتيكالىق جانە مورالدىق سالدارى تۋرالى حاباردارلىعىن ارتتىرۋعا باعىتتالعان.

ازەربايجان جاھاندىق ديالوگتىڭ يەسى رەتىندە ەلدىڭ تۇراقتى دامۋعا دەگەن ۇمتىلىسىن قۋاتتادى.

سامميت سونىمەن قاتار COP29 ماقساتتارىنا سايكەس كونفەسسياارالىق ديالوگ الاڭىن قامتاماسىز ەتەدى.

پرەزيدەنت يلحام اليەۆ سامميتكە ۇندەۋ جولداپ، وندا COP29 كوتەرگەن ماسەلەلەردى شەشۋدەگى كونفەسسياارالىق ديالوگتىڭ ءرولىن اتاپ ءوتتى. ازەربايجان باسشىسى ىقپالدى ءدىني داۋىستار بولاشاق ۇرپاق ءۇشىن قورشاعان ورتانى قورعاۋعا كومەكتەسەتىنىن اتاپ ءوتتى.

- ءتۇرلى سەنىمدەر مەن نانىمداردىڭ باي رۋحاني الەۋەتى كليماتتىڭ وزگەرۋىنەن تۋىنداعان ەكزيستەنسيالدى ماسەلەلەردى شەشۋگە سەرپىن بەرە الادى. بۇل سىن-قاتەرلەرگە قارسى كۇرەستە الەمنىڭ ءدىني كوشباسشىلارى ۇلكەن ءرول اتقارا الادى، - دەدى پرەزيدەنت يلحام اليەۆ ءوز جولداۋىندا.

ءبىر قىزىعى، سامميتتىڭ كۇن تارتىبىندە الەمدەگى باستى ەكولوگيالىق ماسەلەلەردىڭ ءبىرى سانالاتىن جانە جەرگىلىكتى كليماتقا كەرى اسەرىن تيگىزەتىن ارال تەڭىزىنىڭ قۇرعاۋ پروبلەماسى دا بولدى. ورتالىق ازيا ايماعىندا اۋقىمدى جوبالار جۇزەگە اسىرىلىپ، كليماتتىق داعدارىستى ەڭسەرۋ باعىتىندا ەلەۋلى جۇمىستار اتقارىلىپ جاتقانى ايتىلدى.

ءىس-شارا ناتيجەسىندە ءسامميتتىڭ قورىتىندى قۇجاتى - باكۋ دەكلاراتسياسى جانە الەمدىك ءدىن كوشباسشىلارىنىڭ باكۋدە وتەتىن COP29 قاتىسۋشىلارىنا ۇندەۋى قابىلدانادى.

بۇعان دەيىن پرەزيدەنت قاسىم-جومارت توقايەۆ تۇركى مەملەكەتتەرى ۇيىمىنىڭ سامميتىنە قاتىسۋ ءۇشىن بىشكەككە بارعانى حابارلاندى.

اۆتور
ەركەجان سماعۇلوۆا