جيىنعا قازاقستاننىڭ ازەربايجانداعى ەلشىسى ءالىم بايەل، ازەربايجان ميللي ءماجىلىسىنىڭ دەپۋتاتى ازەر اللاحۆەرديانوۆ، جەتەكشى ساراپتامالىق ورتالىقتاردىڭ وكىلدەرى، ساياساتتانۋشىلار، ساراپشىلار مەن ديپلوماتتار قاتىستى.
قازاقستاننىڭ ازەربايجانداعى ەلشىسى الىم بايەل ازەربايجاندىق ساراپشىلارعا پرەزيدەنت قاسىم-جومارت توقايەۆتىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى قازاقستان حالقىنا جولداۋىنىڭ نەگىزگى باعىتتارىن تانىستىردى. ول ينفراقۇرىلىمدى جاڭعىرتۋ، «حالىقتىق قۇرىلىس» باعدارلاماسىن ىسكە اسىرۋ، ەلدىڭ كولىك-لوگيستيكالىق الەۋەتىن دامىتۋ جانە ەكونوميكانى جەدەل سيفرلاندىرۋ ماسەلەلەرىنە توقتالدى. سونىمەن قاتار قازاقستاننىڭ جاساندى ينتەللەكت مينيسترلىگىن العاشقىلاردىڭ ءبىرى بولىپ قۇرعانىن ايتىپ، ەلىمىزدىڭ IT سالاسىنداعى جەتىستىكتەرىنە نازار اۋداردى.
ديپلومات قاسىم-جومارت توقايەۆتىڭ 2026-جىلعى قازاندا وتكەن ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ VII سامميتىنە قاتىسۋ ءۇشىن باكۋگە جاساعان ساپارىنىڭ قورىتىندىلارىن دا اتاپ ءوتتى.
ساپار اياسىندا قازاقستان مەن ازەربايجاننىڭ بىرلەسكەن كۇش-جىگەرىنىڭ ناتيجەسىندە ازەربايجاننىڭ ۇيىمعا ءتوراعالىق ەتۋ مەرزىمىن ۇزارتۋ جانە باس حاتشى قىزمەتىنە وسى ەلدىڭ وكىلىن تاعايىنداۋ تۋرالى شەشىم قابىلداندى. فارحاد مامەدوۆ بۇل شەشىمدى ازەربايجان ديپلوماتياسىنىڭ ازياداعى بەلسەندىلىگىن ارتتىرۋعا سەرپىن بەرگەن قادام رەتىندە باعالادى.
ەلشى ەكى ەل اراسىنداعى بىرلەسكەن اۋقىمدى جوبالاردىڭ ماڭىزىنا نازار اۋدارىپ، پرەزيدەنتتىڭ باكۋگە ساپارى كەزىندە تالشىقتى-وپتيكالىق بايلانىس جەلىسى اشىلعانىن ايتتى. بۇل - ترانسكاسپي باعىتى بويىنشا جۇزەگە اسقان العاشقى ينفراقۇرىلىمدىق جوبا. ءالىم بايەلدىڭ پىكىرىنشە، الداعى ۋاقىتتا وسى باستامانىڭ جالعاسى رەتىندە باسقا دا ماڭىزدى ينفراقۇرىلىمدىق جوبالار جۇزەگە اسادى.
بۇدان بولەك باكۋدە ەكى ەلدىڭ مەملەكەت باسشىلارى ترانسكاسپيي حالىقارالىق كولىك باعدارى تۋرالى ۇكىمەتارالىق كەلىسىمگە قول قويدى. اتالعان كەلىسىم كولىك ءدالىزىنىڭ مارتەبەسىن ارتتىرا تۇسەدى.
ساراپشىلار دا پرەزيدەنت قاسىم-جومارت توقايەۆتىڭ جولداۋىنا جوعارى باعا بەردى. ولاردىڭ ايتۋىنشا، ەكىجاقتى ساياسي ديالوگتىڭ قارقىندى دامۋى ىنتىماقتاستىقتىڭ بارلىق باعىتىن جانداندىرىپ، ەنەرگەتيكا مەن كولىك سالالارىنداعى ورتاق ستراتەگيالىق جوبالاردى جۇزەگە اسىرۋعا تىڭ سەرپىن بەرىپ وتىر.
ازەربايجان ميللي ءماجىلىسىنىڭ دەپۋتاتى ازەر اللاحۆەرديانوۆ ەكى ەلدىڭ ۇكىمەتتىك ەمەس ۇيىمدارى اراسىنداعى بايلانىستى نىعايتۋدى ۇسىندى. بۇل باستامانى پارلامەنتارالىق ىنتىماقتاستىق اياسىندا جۇزەگە اسىرۋعا نيەتتى ەكەنىن دە ايتتى. ال biz CLUB زياتكەرلىك پلاتفورماسىنىڭ نەگىزىن قالاۋشى مۋراد ساداددينوۆ قازاقستانداعى جوعارى ءبىلىم بەرۋ جۇيەسىنىڭ دامۋ دەڭگەيىن جوعارى باعالادى.
- قازاقستان حالىقارالىق جوعارى وقۋ ورىندارىنىڭ فيليالدارىن اشىپ، ءبىلىم بەرۋ سالاسىنداعى الەۋەتىن ايتارلىقتاي كۇشەيتىپ كەلەدى. مۇنىڭ ناتيجەسىندە سوڭعى جىلدارى قازاقستاننىڭ جوعارى وقۋ ورىندارىندا ءبىلىم الىپ جۇرگەن ازەربايجاندىق ستۋدەنتتەردىڭ سانى بىرنەشە ەسە ءوستى، - دەدى ساراپشى.
CASPIA تالداۋ ورتالىعىنىڭ ديرەكتورى ورحان يولچۋيەۆ كولىك-لوگيستيكا سالاسىنداعى ىنتىماقتاستىقتى نىعايتىپ، بيۋروكراتيالىق راسىمدەردى جەڭىلدەتۋدىڭ ماڭىزىن اتاپ ءوتتى. ال «ناقتى بالاما» پارتياسىنىڭ ءتوراعاسى ناتيگ دجافارلي IT جانە جاساندى ينتەللەكت سالالارىن دامىتۋدىڭ وزەكتىلىگىنە توقتالدى. سونىمەن قاتار بەلگىلى ەكونوميست ءداستۇرلى ەكونوميكا سالالارىنداعى بايلانىستى كەڭەيتۋگە، ونەركاسىپتىك كووپەراتسيانى دامىتۋعا، سونىڭ ىشىندە مۇناي ونىمدەرىن بىرلەسىپ وندىرۋگە نازار اۋداردى.
جيىن بارىسىندا ەنەرگەتيكا جانە كولىك-لوگيستيكا سالالارىنداعى ىنتىماقتاستىق، عىلىمي-ساراپتامالىق بايلانىس، مادەني-گۋمانيتارلىق قارىم-قاتىناس ماسەلەلەرى بويىنشا ساراپشىلاردىڭ پىكىرلەرى تىڭدالدى.
تالقىلاۋ بارىسىندا قاتىسۋشىلار تۇركى مەملەكەتتەرى ۇيىمىنىڭ ماڭىزى ارتىپ كەلە جاتقانىن اتاپ، ونىڭ بولاشاعى تۋرالى پىكىر الماستى. سونداي- اق ساراپشىلار ازەربايجاننىڭ ورتالىق ازياداعى ىنتىماقتاستىق فورماتىنا قاتىسۋىنا جان-جاقتى قولداۋ كورسەتكەنى ءۇشىن قازاقستانعا العىس ايتتى.
بۇعان دەيىن وزبەكستاندىق ساياساتتانۋشى جولداۋدىڭ قازاقستان دامۋىنىڭ ۇزاق مەرزىمدى باعدارىن ايقىندايتىنىن ايتقان ەدى.