بۇل تۋرالى Kazinform اگەنتتىگىنىڭ رەسمي ساۋالىنا قارجى نارىعىن رەتتەۋ جانە دامىتۋ اگەنتتىگىنىڭ سىرتقى كوممۋنيكاتسيالار باسقارماسىنىڭ باسشىسى - باسپا ءسوز حاتشىسى ولجاس رامازانوۆ جاۋاپ بەردى.
ونىڭ ايتۋىنشا، بۇل ماسەلەدە ادامنىڭ مارقۇمعا كىم بولىپ كەلەتىنى ەمەس، مۇرانى قابىلداپ-قابىلداماۋى ماڭىزدى.
- بانك نەمەسە ميكروقارجىلىق قىزمەتتى جۇزەگە اسىراتىن ۇيىم قايتىس بولعان قارىز الۋشىنىڭ تۋىستارىنان تەك ولاردىڭ تۋىستىق قاتىناستارىنا بايلانىستى كرەديتتى وتەۋدى تالاپ ەتۋگە قۇقى جوق. كرەديتور قارىزدى وتەۋ تۋرالى تالاپتى مۇرانى قابىلداعاننان كەيىن عانا مۇراگەرگە قويا الادى. مۇرانى قابىلداۋ جانە ونى زاڭدا بەلگىلەنگەن تارتىپپەن راسىمدەۋ وسى جاعدايدا ماڭىزدى. بۇل رەتتە مۇراگەردىڭ جاۋاپكەرشىلىگى وزىنە قالعان مۇرانىڭ قۇنىمەن شەكتەلەدى. وسىلايشا، ول مارقۇمنىڭ قارىزىن ءوز قاراجاتى ەسەبىنەن تولىق وتەۋگە مىندەتتى ەمەس، - دەدى سپيكەر.
سونداي-اق، ايتا كەتۋ كەرەك، زاڭناما باسقا ادامدارعا قايتىس بولعان قارىز الۋشىنىڭ بەرەشەگىن ءوز ەركىمەن وتەۋگە تىيىم سالمايدى. الايدا بۇل ولاردىڭ كرەديتتى تولەۋگە مىندەتتى ەكەنىن بىلدىرمەيدى.