باكۋ مەن ۆاشينگتون ازەربايجان-ارمەنيا قارىم-قاتىناسىن قالىپقا كەلتىرۋ ماسەلەسىن تالقىلادى

استانا. KAZINFORM – ا ق ش مەملەكەتتىك حاتشىسى ەنتوني بلينكەن ازەربايجان پرەزيدەنتى يلحام اليەۆپەن تەلەفون ارقىلى سويلەستى، دەپ حابارلايدى ازەربايجان پرەزيدەنتىنىڭ باسپا ءسوز قىزمەتى.

تاراپتار تەلەفون ارقىلى ارمەنيامەن شيەلەنىستى بەيبىت جولمەن شەشۋ جانە باكۋدە COP29 كونفەرەنسياسىن ۇيىمداستىرۋ ماسەلەلەرىن تالقىلادى. ەنتوني بلينكەن 30-تامىزدا مەملەكەتتىك شەكارانى دەليميتاتسيالاۋ كوميسسيالارىنىڭ بىرلەسكەن قىزمەتى تۋرالى ەرەجەگە قول قويۋدى وڭ باعالاي وتىرىپ، ا ق ش ايماقتا تۇراقتى بەيبىتشىلىككە قول جەتكىزۋ ءۇشىن كۇش سالۋدى جالعاستىراتىنىنا سەندىردى.

«ازەربايجاننىڭ كۇش-جىگەرىنىڭ ارقاسىندا ءبىزدىڭ ايماقتا ادىلدىك پەن حالىقارالىق قۇقىققا نەگىزدەلگەن جاڭا شىندىقتار مەن ستاتۋس-كۆو پايدا بولدى. ءبىزدىڭ ەل ءارى ارمەنيا مەن ازەربايجان اراسىنداعى بىتىمگەرشىلىك كەلىسىمنىڭ باستاماشىسى»، - دەدى يلحام اليەۆ.

يلحام اليەۆ سونداي-اق وعان قول قويۋ ءۇشىن ەريەۆان باكۋگە اۋماقتىق تالاپتاردان باس تارتۋى كەرەك ەكەنىن مالىمدەدى. اڭگىمەلەسۋ بارىسىندا سونداي-اق ازەربايجاندا COP29 كونفەرەنسياسىن وتكىزۋ ماسەلەسى تالقىلاندى. بلينكەن ا ق ش- تىڭ ءىس-شارانىڭ ءساتتى دايىندالۋى مەن وتكىزىلۋىنە قولداۋ ءبىلدىرىپ، ا ق ش پەن ازەربايجان كوماندالارى مەن دەلەگاتسيالارىنىڭ بەلسەندى ىنتىماقتاستىعىن اتاپ ءوتتى.

ارمەنيا پرەمەر-ءمينيسترى نيكول پاشينيان ەريەۆان مەن باكۋ بەيبىت كەلىسىم ءماتىنىن 80 پايىز كەلىسكەنىن باياندادى. پرەمەر-ءمينيستردىڭ ايتۋىنشا، ازەربايجانعا جاقىن ارادا كەلىسىلگەن ەرەجەلەرگە قول قويۋ ۇسىنىلدى.

بۇعان دەيىن قازاقستان پرەزيدەنتى قاسىم-جومارت توقايەۆ قازاقستان تاراپىنىڭ ازەربايجان مەن ارمەنيا اراسىنداعى بەيبىتشىلىك شارتىن جاساسۋ جونىندەگى كەلىسسوزدەر ءۇشىن الماتى الاڭىن ۇسىنۋدى جالعاستىرۋعا دايىن ەكەنىن راستادى.