باشقۇرتستاندا «كونە تۇركىستان جانە ياساۋي مۇراسى» اتتى كورمە اشىلدى

استانا. KAZINFORM - باشقۇرتستان رەسپۋبليكاسىنىڭ ۇلتتىق مۋزەيىندە «ازىرەت سۇلتان» ۇلتتىق تاريحي-مادەني مۋزەي-قورىعى ۇسىنعان «كونە تۇركىستان جانە ياساۋي مۇراسى» تاقىرىبىنداعى حالىقارالىق كورمەنىڭ سالتاناتتى اشىلۋى ءوتتى.

ق ر مادەنيەت جانە اقپارات مينيسترلىگى مالىمەتىنشە، ەكسپوزيتسيادا ۇلى جىبەك جولىنداعى باستى ورتالىق - ەجەلگى تۇركىستان تاريحىمەن بايلانىستى بىرەگەي ارحەولوگيالىق ولجالار مەن مادەني جادىگەرلەر تانىستىرىلدى.

بۇكىل تۇركى الەمىنىڭ رۋحاني مادەنيەتىنە تەرەڭ اسەر ەتكەن XII عاسىردىڭ كورنەكتى فيلوسوفى، اقىن، ويشىل قوجا احمەت ياساۋي ءومىرى مەن مۇراسىنا ەرەكشە نازار اۋدارىلدى.

مەملەكەت باسشىسى قاسىم-جومارت توقايەۆتىڭ قوجا احمەت ياساۋي مۇراسىن ناسيحاتتاۋ جونىندەگى تاپسىرماسىنا سايكەس ۇيىمداستىرىلعان كورمەدە قازاقستان مادەنيەت جانە اقپارات مينيسترلىگىنىڭ قولداۋىمەن سيرەك جادىگەرلەر قويىلدى. اتاپ ايتساق، تۇركىستان وازيسىنىڭ قالاشىقتارى مەن قورعاندارىنان تابىلعان سيرەك كەزدەسەتىن زاتتار، قوجا احمەت ياساۋي مەن ونىڭ ءىزباسارلارىنىڭ قولجازبا ەڭبەكتەرى، ءامىر تەمىردىڭ بۇيرىعىمەن سالىنعان قوجا احمەت ياساۋي كەسەنەسىنىڭ بەينەسىن سۋرەتتەيتىن ساۋلەت ەلەمەنتتەرى، فوتوماتەريالدار، ورتاعاسىرلىق نۋميزماتيكالىق جادىگەرلەر مەن قىش بۇيىمدار جانە ت. ب. ۇسىنىلدى.

سونداي- اق كەلگەن كورەرمەن ياساۋي ءىلىمىنىڭ ەدىل مەن جايىق مۇسىلماندارىنا، ونىڭ ىشىندە قازىرگى باشقۇرتستان اۋماعىنداعى كەسەنەدە جەرلەنگەن XIV عاسىرداعى قازى، رۋحاني كوسەم حۋسەين-بەككە اسەرى تۋرالى مالىمەتكە قانىق بولا الادى.

كورمە 2025 -جىلدىڭ 3-تامىزىنا دەيىن جالعاسادى.