سەيسەنبى كۇنى داماسك سوتى سيريانىڭ بۇرىنعى پرەزيدەنتى باشار اسادتىڭ تۋىسى ۆاسيم اسادتى ادامزاتقا قارسى قىلمىس پەن اسكەري قىلمىس جاساعانى ءۇشىن ءولىم جازاسىنا كەستى. بۇل تۋرالى «سانا» اگەنتتىگى حابارلادى.
داماسكىدەگى ءتورتىنشى قىلمىستىق سوت ونى قاساقانا كىسى ءولتىرۋ، ازاپتاۋ، زاڭسىز باس بوستاندىعىنان ايىرۋ جانە باسقا دا قىلمىستار جاساعانى ءۇشىن كىنالى دەپ تانىدى. سونداي-اق سوت سوتتالعان ادامنىڭ جىلجىمالى جانە جىلجىمايتىن مۇلكىن مەملەكەت قازىناسىنا تاركىلەۋ تۋرالى شەشىم شىعاردى.
ءىس ماتەريالدارىنا سايكەس، 2011 -جىلى ۆاسيم اساد بريگادالىق گەنەرال عيات داللامەن كەلىسىپ، قۇرامىندا شامامەن 30 ادام بولعان ەكى قارۋلى جاساق قۇرعان. ولار بۇرىنعى پرەزيدەنتتىڭ اعاسى ماحەر اساد باسقارعان سيريا ارمياسىنىڭ 4-ديۆيزياسىمەن بايلانىستى كۇشتەردىڭ قۇرامىندا ارەكەت ەتكەن.
بۇل جاساقتاردىڭ نەگىزگى قىزمەتى شىعىس عۋتا ايماعىندا شوعىرلانعان. سوت ولاردىڭ ەلدى مەكەندەرگە شابۋىل جاساۋعا، ادامداردى ۇرلاۋعا، ازاپتاۋعا جانە بەيبىت تۇرعىنداردى ولتىرۋگە قاتىسى بار ەكەنىن انىقتادى.
اتاپ ايتقاندا، ۆاسيم اساد پەن ونىڭ باقىلاۋىنداعى توپتار 2013 -جىلى ءال-مليحا اۋدانىندا بولعان وقيعاعا قاتىسى بار دەپ تانىلدى. سول كەزدە اۋەدەن جانە ارتيللەريادان جاسالعان اتقىلاۋ سالدارىنان شامامەن 75 بەيبىت تۇرعىن قازا تاپقان.
سونىمەن بىرگە سوت ۆاسيم اسادتى ەسىرتكى ساۋداسى مەن كونترابانداسىنا قاتىستى ايىپتار بويىنشا جەتكىلىكتى دالەل بولماعاندىقتان اقتادى.
سوت پروتسەسى 24-ماۋسىمدا باستالىپ، ۇكىم التىنشى وتىرىستا شىعارىلدى. سوت شەشىمىنە كاسساتسيالىق تارتىپپەن شاعىم جاساۋعا بولادى.
بۇعان دەيىن، 11-تامىزدا، وسى سوت سيريانىڭ بۇرىنعى پرەزيدەنتى باشار اسادتى جانە ءبىرقاتار بۇرىنعى جوعارى لاۋازىمدى سيريالىق شەنەۋنىك پەن اسكەري قىزمەتكەرلەردى سىرتتاي ءولىم جازاسىنا كەسكەن بولاتىن.