ب ۇ ۇ قاۋىپسىزدىك كەڭەسى دۇيسەنبىدە يزرايلدىڭ يرانعا سوققى بەرۋىنە بايلانىستى باس قوسادى

استانا. KAZINFORM - وتىرىستا قاۋىپسىزدىك كەڭەسىنىڭ مۇشەلەرى يزرايلدىڭ يرانعا شابۋىلىن تالقىلايدى.

بۇل تۋرالى جەكسەنبى كۇنى كەڭەسكە قازان ايىندا ءتوراعالىق ەتكەن شۆەيتساريا ءمالىم ەتتى، دەپ حابارلايدى Kazinform مەنشىكتى ءتىلشىسى.

شۆەيتساريانىڭ ب ۇ ۇ جانىنداعى ميسسياسىنىڭ حابارلاۋىنشا، بۇل كەزدەسۋ يراننىڭ ءوتىنىشى بويىنشا الجير، قىتاي جانە رەسەيدىڭ قولداۋىمەن ۇيىمداستىرىلدى، دەپ حابارلايدى Reuters.

«يزرايل رەجيمىنىڭ ارەكەتتەرى حالىقارالىق بەيبىتشىلىك پەن قاۋىپسىزدىككە ۇلكەن قاۋىپ توندىرەدى جانە ونسىز دا وسال ايماقتى ودان ءارى تۇراقسىزداندىرادى. يران بىرىككەن ۇلتتار ۇيىمىنىڭ جارعىسىندا بەكىتىلگەن قاعيداتتاردى ۇستانا وتىرىپ جانە حالىقارالىق قۇقىققا سايكەس وسى قىلمىستىق شابۋىلدارعا ءتيىستى ۋاقىتتا زاڭدى جاۋاپ بەرۋ قۇقىعىن قالدىرادى»، - دەپ مالىمدەدى يران سىرتقى ىستەر ءمينيسترى ابباس اراكچي سەنبى كۇنى ب ۇ ۇ قاۋىپسىزدىك كەڭەسىنىڭ 15 مۇشەسىنە جولداعان حاتىندا.

يزرايل اسكەريلەرىنىڭ حابارلاۋىنشا، ونداعان يزرايلدىك ۇشاق سەنبى كۇنى تاڭ اتقانعا دەيىن تەگەران مەن باتىس يران ماڭىنداعى زىمىران زاۋىتتارى مەن باسقا نىساندارعا ءۇش رەت سوققى جاسادى.

بۇل يراننىڭ 1-قازاندا 200 گە جۋىق بالليستيكالىق زىمىرانمەن يزرايلگە جاساعان شابۋىلىنا جاۋاپ بولدى. يزرايل يرانعا سوڭعى سوققىدان كەيىن جاۋاپ قايتارماۋدى ەسكەرتتى.

يزرايلدىڭ ب ۇ ۇ- داعى تۇراقتى وكىلى دەنني دانون جەكسەنبى كۇنى يراننىڭ ب ۇ ۇ- عا شاعىمىن قابىلداماي، يران «يزرايل حالىقارالىق قۇقىقتى بۇزدى» دەگەن كۇلكىلى ايىپتاۋلار ارقىلى ديپلوماتيالىق ارەنادا بىزگە قارسى ارەكەت ەتۋگە تىرىسۋدا» دەپ مالىمدەدى.

«بىرنەشە رەت ايتقانىمىزداي، ءبىز ءوزىمىزدى قورعاۋعا قۇقىعىمىز بار جانە سوعان مىندەتتىمىز، يزرايل ازاماتتارىن قورعاۋ ءۇشىن قولىمىزداعى بارلىق قۇرالداردى پايدالانامىز»، - دەدى دانون.

ءوز كەزەگىندە ب ۇ ۇ باس حاتشىسى انتونيۋ گۋتەرريش گازا سەكتورى مەن ليۆاندى قوسا العاندا، بارلىق تاراپتاردى اسكەري ءىس-قيمىلداردى توقتاتۋعا، تولىق اۋقىمدى ايماقتىق سوعىستىڭ الدىن الۋعا جانە ديپلوماتيالىق جولعا قايتا ورالۋعا بار كۇش-جىگەرىن سالۋعا شاقىردى.