ب ۇ ۇ قاۋىپسىزدىك كەڭەسى داعدارىسقا ۇشىراۋدا - مەملەكەت باسشىسى

استانا. KAZINFORM - پرەزيدەنت قاسىم-جومارت توقايەۆ Al Jazeera تەلەارناسىنا بەرگەن ەكسكليۋزيۆ سۇحباتىندا الەمدىك ءتارتىپ تاقىرىبىنا قاتىستى پىكىر ءبىلدىردى.

Al Jazeera: بۇگىندەرى استانا حالىقارالىق فورۋمى ءوتىپ جاتىر. بۇل قازاقستاننىڭ ورتا دەرجاۆالار حالىقارالىق كوپجاقتى جۇيەنى قولداۋدا ۇلكەن ءرول اتقارۋى ءتيىس دەپ سانايتىنىن بىلدىرە مە؟

- البەتتە. جاھاندىق بەيبىتشىلىك پەن قاۋىپسىزدىكتى قامتاماسىز ەتۋدە ورتا دەرجاۆالار ۇلكەن ءرول اتقارۋى ءتيىس ەكەنىنە جانە مۋلتيلاتەراليزمنىڭ ماڭىزىنا انىق سەنەمىن.

Al Jazeera: پرەزيدەنت مىرزا، كەيدە ۇلى دەرجاۆالار مۋلتيلاتەراليزم جۇيەسىن بۇزۋى مۇمكىن دەپ سانايسىز با؟ كەي كەزدەرى ءبىز «ەڭ الدىمەن امەريكا» دەگەن ۇستانىم تۋرالى، كوپجاقتى تەتىكتەر ەمەس ەكىجاقتى قاتىناستاردىڭ ماڭىزى جايىندا ءسوز قوزعايتىن كەيبىر ۇلى دەرجاۆالاردىڭ مالىمدەمەلەرىن ەستىپ جاتامىز.

- ءيا، مۇنداي جاعداي بايقالادى ءارى مۋلتيلاتەراليزم جۇيەسى السىرەپ بارادى. ءوزىڭىز دە بىلەسىز، ب ۇ ۇ قاۋىپسىزدىك كەڭەسى داعدارىسقا ۇشىراۋدا. ونىڭ بيلىگى دە، نەگىزگى حالىقارالىق پروبلەمالاردى شەشۋگە نيەتى دە جوق.

Al Jazeera: بۇل الەمگە قاۋىپ پە؟

- ارينە، بۇل ۇلكەن سىن-قاتەر. سول سەبەپتى قازاقستان سەكىلدى ورتا دەرجاۆالار نەگىزگى حالىقارالىق پروبلەمالاردى شەشۋدە جانە رەتتەۋدە ماڭىزدى ءرول اتقارۋى ءتيىس دەپ سانايمىن. قازاقستان بىرىككەن ۇلتتار ۇيىمىن رەفورمالاۋدى قولدايدى. بىرىككەن ۇلتتار ۇيىمى قۇرىلعاندا وعان 51 مەملەكەت مۇشە بولعان ەدى. ال قازىر ۇيىمنىڭ 193 مۇشەسى بار.

بۇعان دەيىن پرەزيدەنت قازاقستان - ەۋرازياداعى، اسىرەسە ورتالىق ازياداعى تۇراقتىلىق پەن قاۋىپسىزدىكتىڭ تىرەگى ەكەنىن ايتقان ەدى.