ب ق و-دا بالاعات ءسوز ايتقان اۋىل اكىمى تارتىپتىك جاۋاپكەرشىلىككە تارتىلدى

ورال. KAZINFORM - ق ر مەملەكەتتىك قىزمەت ىستەرى اگەنتتىگىنىڭ باتىس قازاقستان وبلىسىنداعى ادەپ جونىندەگى كەڭەسىنىڭ وتىرىسىندا اقجايىق اۋدانى جاڭابۇلاق اۋىلدىق وكرۋگىنىڭ اكىمى جامبىل دابىسقاليەۆتىڭ تارتىپتىك ءىسى قارالدى.

ق ر مەملەكەتتىك قىزمەت ىستەرى اگەنتتىگىنىڭ ب ق و بويىنشا دەپارتامەنتى جۇرگىزگەن قىزمەتتىك تەرگەپ-تەكسەرۋ بارىسىندا انىقتالعانىنداي، وكرۋگ اكىمى ج. دابىسقاليەۆ بيىلعى 1-قىركۇيەك كۇنى اۋىل تۇرعىنى مەرەكە ەسقاليەۆكە قاتىستى بالاعات ءسوز ايتۋعا جول بەرگەن.

ج. دابىسقاليەۆتىڭ تۇسىنىكتەمەسىنەن ءمالىم بولعانىنداي، جاڭابۇلاق تۇرعىندارى كوپتەگەن جينالىستار مەن جەكە قابىلداۋلاردا اۋىلدىڭ تازالىعى مەن قاۋىپسىزدىگىن ساقتاۋ، اسفالت جولدى بۇزباۋ ءۇشىن ۇلكەن تەحنيكالاردى كىرگىزبەۋ كەرەكتىگىن سۇراعان. سودان كەيىن اۋىل ىشىندە جۇك كولىكتەرىنىڭ قوزعالىسىن شەكتەۋ جونىندە ءوزارا كەلىسىمگە كەلگەن. الايدا 1-قىركۇيەك كۇنى جاڭابۇلاق اۋىلدىق وكرۋگى اكىمى اپپاراتىنىڭ كۇزەتشىسى اۋىل ىشىندە ءشوپ تيەگەن جۇك كولىگى جۇرگەنىن حابارلاعان. اۋىل اكىمى جۇك كولىك يەلەرىمەن سويلەسىپ، اۋىل ىشىنە اينالما جولدار ارقىلى كىرۋگە بولاتىنىن جەتكىزگەن. سول جەردە م. ەسقاليەۆ سوزگە ارالاسىپ، ءشوپ الىپ كەلسە، اۋىل ىشىمەن جۇرەتىنىن العا تارتىپ، اكىمگە بالاعات سوزدەر ايتقان.

ادەپ جونىندەگى كەڭەس وتىرىسىندا ج. دابىسقاليەۆ كوڭىل-كۇي اۋانىنا بەرىلىپ، ءوزىنىڭ بالاعات ءسوز ايتىپ قالعانىن مويىندادى.

كەڭەس مۇشەلەرى تالقىلاي كەلە، ج. دابىسقاليەۆكە سوگىس تۇرىندەگى تارتىپتىك شارا قولدانۋ تۋرالى توقتامعا كەلدى.

ادەپ جونىندەگى كەڭەس وتىرىسىندا باسقا دا ماسەلەلەر قارالىپ، ءتيىستى شەشىمىن تاپتى.

اۆتور
عايساعالي سەيتاق