ب ۇ ۇ باسشىسى: كليمات تۇراقتىلىعىنا اقشا سالۋ قايىرىمدىلىق ەمەس، ەرتەڭنىڭ قامى

استانا. KAZINFORM - ازەربايجان استاناسى باكۋدە وتكەن «COP29» كليمات سامميتىندە بىرىككەن ۇلتتار ۇيىمىنىڭ باس حاتشىسى انتونيۋ گۋتەرريش كليمات وزگەرىسىمەن كۇرەس كەزەك كۇتتىرمەيتىنىن ايتىپ، الەم جۇرتىنا ۇندەۋ تاستادى.

 بۇل تۋرالى Kazinform-نىڭ مەنشىكتى ءتىلشىسى حابارلايدى.

جاھاندىق جىلىنۋدىڭ سالدارى الەم جۇرتىنىڭ الدىنا توساتىن قيىندىقتار مەن قاۋىپتەر تۋرالى ايتقان انتونيۋ گۋتەرريش 2024 -جىلعى تاريحتا بولماعان اپتاپ ىستىقتى تابيعاتتىڭ ادامزاتقا جولداعان ەسكەرتۋىنە بالادى. سونداي- اق، ول الەمنىڭ ءار تۇكپىرىندەگى داۋىلدار، جاھاندىق جىلىنۋ سالدارىنا تەڭىزدەگى تىرشىلىك الەمىنىڭ جۇتاڭدانۋى، اۋا رايىنىڭ تەپە- تەڭدىگىن بۇزىپ جاتقان ىستىق اعىستار دا ادامزاتتىڭ باس اۋرۋىنا اينالىپ وتىرعانىن ايتتى.

«بۇل اپاتتىڭ ءبارى كليماتتىڭ ادام تىرشىلىگىنىڭ اسەرىنەن ۋشىعىپ جاتىر. ودان ەشبىر مەملەكەت ساقتاندىرىلماعان. ءتىپتى كليماتتىڭ وزگەرۋى ەكونوميكاعا دا كەرى اسەرىن بايقاتىپ ۇلگەردى. بۇكىل الەمدە باعالار ءوسىپ، ساقتاندىرۋ جارنالارى قىمباتتاپ جاتىر»، - دەدى ب ۇ ۇ باس حاتشىسى.

ا. گۋتەرريش كليماتتىڭ وزگەرۋى الەم ەلدەرىنىڭ اراسىنداعى تىرشىلىك دەڭگەيىنىڭ ايىرماشىلىعىن ارتتىرا بەرەتىنىن اتادى. Oxfam حالىقارالىق ۇيىمىنىڭ مالىمەتىن دايەكسوز ەتكەن ب ۇ ۇ باسشىسى ميللياردەر بايلاردىڭ 90 مينۋت ىشىندە قورشاعان ورتانى لاستاۋعا قوسقان «ۇلەسى» قاراپايىم ادامنىڭ ءومىر بويى قوسقان «ۇلەسىنە» تەڭ ەكەنىن ايتتى.

سونداي-اق، ول كوشباسشى ەلدەردىڭ باسشىلارىنىڭ ەسىنە «COP28» سامميتىندە مويىندارىنا العان مىندەتتەمەلەردى سالدى. وتكەن سامميتتە جەر قويناۋىنان الىناتىن وتىن تۇرلەرىن شەكتەۋ ماسەلەسى تۋرالى كوپ ايتىلعانىمەن، ناتيجەسى شامالى بولعانىن اتاپ ءوتتى.

ايتۋىنشا، جاھاندىق جىلىنۋدىڭ قارقىنىن 2030 -جىلعا دەيىن جىلىنا °C 1,5دەڭگەيىندە ۇستاپ تۇرۋ ءۇشىن 2019 -جىلى قورشاعان ورتاعا تاستالعان شىعارىندىنىڭ كولەمىن 43 پايىز ازايتۋ كەرەك.

ا. گۋتەرريش دامىعان ەلدەردى كليمات وزگەرۋىنەن ەڭ كوپ زارداپ شەگىپ جاتقان قاۋىمدارعا كورسەتىلەتىن كومەكتى ەكى ەسە ارتتىرىپ، 2025 -جىلى ونىڭ كولەمىن كەمىندە 40 ميلليارد دوللارعا جەتكىزۋگە شاقىردى.

ب ۇ ۇ باس حاتشىسى كليماتقا ينۆەستيتسيا سالۋ قايىرىمدىلىق ەمەس، بارشاعا قاجەت ينۆەستيتسيا ەكەنىن ەكەنىن ايتتى.

ەسكە سالايىق، بۇگىن پرەزيدەنت قاسىم-جومارت توقايەۆ دۇنيەجۇزىلىك كليمات سامميتىنە قاتىسۋ ءۇشىن باكۋدەگى وليمپيادالىق ستاديونعا باردى. سوسىن مەملەكەت باسشىسى باكۋدەگى دۇنيەجۇزىلىك كليمات سامميتىندە ءسوز سويلەدى.

اۆتور

ەسىمجان ناقتىباي