ب ۇ ۇ باسشىسى «ايەلدەرگە ينۆەستيتسيا سالۋعا» شاقىردى
استانا. KAZINFORM - ايەلدەر مەن قىزدار ۇلكەن جەتىستىكتەرگە قول جەتكىزدى - ولار بار كەدەرگىلەردى بۇزىپ، ستەرەوتيپتەردى جويىپ، ءادىل دە تەڭ الەمگە قاراي ىلگەرىلەۋدە. بۇل تۋرالى ب ۇ ۇ باس حاتشىسىنىڭ حالىقارالىق ايەلدەر كۇنىنە ارنالعان بەينەۇندەۋىندە ايتىلعان، دەپ حابارلايدى ب ۇ ۇ جاڭالىقتار ورتالىعى.
«بۇل رەتتە ولار ۇلكەن كەدەرگىلەرگە تاپ بولادى. ميللياردتاعان ايەلدەر مەن قىزدار مارگيناليزاتسيا، ادىلەتسىزدىك جانە كەمسىتۋشىلىكپەن بەتپە-بەت كەلەدى، ال ايەلدەرگە قاتىستى جالعاسىپ جاتقان زورلىق-زومبىلىق ىندەتى بۇكىل ادامزات ءۇشىن ۇيات جاعداي»، - دەپ جالعاستىردى انتونيو گۋتەرريش.
ب ۇ ۇ باسشىسىنىڭ ايتۋىنشا، قازىرگى الەم ءالى دە ەر ادامدار ۇستەمدىك ەتەتىن «مىڭداعان جىلدارداعى بيلىك قاتىناستارىن» كورسەتەدى. پروگرەسكە قاۋىپ ءتونىپ تۇر، ويتكەنى ايەلدەردىڭ قۇقىقتارىنا اياۋسىز شابۋىل جاسالۋدا.
«دامۋدىڭ قازىرگى قارقىنىندا قۇقىقتىق تەڭدىككە ءۇش ءجۇز جىلدان كەيىن عانا قول جەتكىزۋگە بولادى. ءبىز تەزىرەك قوزعالۋىمىز كەرەك»، - دەدى ا. گۋتەرريش.
ب ۇ ۇ باس حاتشىسى ءوز قۇقىقتارى ءۇشىن كۇرەسەتىن ايەلدەر مەن قىزداردى قولداۋعا جانە پروگرەستى جەدەلدەتۋگە شاقىردى. ونىڭ ايتۋىنشا، بيىلعى حالىقارالىق ايەلدەر كۇنىنىڭ
«ايەلدەرگە ينۆەستيتسيا» تاقىرىبى پاتريارحاتتى جويۋ اقشانى قاجەت ەتەتىنىن ەسكە سالادى.
ا. گۋتەرريش «الدىڭعى قاتاردا» تۇرعان ايەلدەر ۇيىمدارىن قولداۋ، ايەلدەرگە قاتىستى زورلىق-زومبىلىقتى توقتاتۋ جانە ايەلدەردى ەكونوميكاعا، سيفرلىق تەحنولوگياعا، بەيبىتشىلىك ورناتۋعا جانە كليماتتىڭ وزگەرۋىنە قوسۋعا جاردەمدەسۋ باعدارلامالارىنا ينۆەستيتسيالاۋ قاجەتتىلىگى تۋرالى ايتتى.
«سونداي- اق ءبىز بيزنەس، قارجى، ورتالىق بانكتەر مەن قارجى مينيسترلىكتەرىندەگى كوشباسشى ايەلدەردىڭ سانىن كوبەيتۋىمىز كەرەك. ايەل قۇقىعى - ءادىل، بەيبىت جانە گۇلدەنگەن قوعامعا اپاراتىن دالەلدەنگەن جول. بۇل بارىمىزگە پايدالى»، - دەدى ب ۇ ۇ باسشىسى.