ب ۇ ۇ باس حاتشىسى يزرايلدى قاتاڭ ايىپتادى

استانا. KAZINFORM - ب ۇ ۇ باس حاتشىسى انتونيۋ گۋتەرريش يزرايلدىڭ سيرياداعى سۋۆەيدا، داراا قالالارى مەن استانا داماسككە جاساعان سوققىلارىن قاتاڭ ايىپتادى. بۇل تۋرالى Anadolu جازدى.

ب ۇ ۇ باس حاتشىسىنىڭ رەسمي وكىلى ستەفان ديۋجارريك كۇندەلىكتى باسپا ءسوز ءماسليحاتىندا تاياۋ شىعىستاعى جاعدايعا بايلانىستى جۋرناليستەر سۇراقتارىنا جاۋاپ بەرىپ، گۋتەرريشتىڭ جازباشا مالىمدەمەسىن وقىپ بەردى.

- باس حاتشى (گۋتەرريش) يزرايلدىڭ سۋۆەيدا، داراا جانە سيريا استاناسى داماسكتىڭ ورتالىعىنا جاساعان اۋە شابۋىلدارىنىڭ كۇشەيۋىن ايىپتايدى، - دەدى ديۋجارريك.

ول يزرايل ارمياسىنىڭ گولان جوتالارىنا قايتا ورنالاسقانى جونىندەگى حابارلامالارعا سىلتەمە جاساي وتىرىپ، ب ۇ ۇ باسشىسىنىڭ بۇل وقيعالارعا جاۋاپ قايتارعانىن ايتتى.

- باس حاتشى بەيبىت تۇرعىندارعا قارسى كەز كەلگەن زورلىق-زومبىلىقتى، سونىڭ ىشىندە ەرىكتى ولتىرۋلەر مەن ءدىنارالىق شيەلەنىستى كۇشەيتەتىن، سيريالىقتاردىڭ بەيبىتشىلىك پەن تاتۋلاسۋعا دەگەن ءۇمىتىن جويىپ جاتقان ارەكەتتەردى قاتاڭ ايىپتايدى، - دەدى باسپا ءسوز حاتشىسى.

سيرياداعى قاقتىعىستىڭ 14 جىلدان بەرى جالعاسىپ كەلە جاتقانىن ەسكە سالعان ديۋجارريك باس حاتشىنىڭ سيريالىقتارعا شىنايى كوڭىل ايتىپ، ەلدەگى زورلىق-زومبىلىقتى دەرەۋ توقتاتۋعا شاقىرعانىن جەتكىزدى.

ايتا كەتەيىك، بۇعان دەيىن يزرايل داماسكىدەگى پرەزيدەنت سارايىنا اۋە سوققى جاساعان.