ب ۇ ۇ باس حاتشىسى انتونيۋ گۋتەرريش ديماشپەن كەزدەستى
استانا. KAZINFORM - بۇگىن ب ۇ ۇ باس حاتشىسى انتونيۋ گۋتەرريش حالىقارالىق كوشى-قون ۇيىمىنىڭ (ح ك ۇ) ىزگى نيەت ەلشىسى، الەمگە ايگىلى ءانشى ديماش قۇدايبەرگەنمەن كەزدەستى.
«4-شىلدەدە ح ك ۇ ىزگى نيەت ەلشىسى رەتىندە ش ى ۇ ءسامميتى اياسىندا قازاقستانعا ساپارمەن كەلگەن ب ۇ ۇ باس حاتشىسى انتونيۋ گۋتەرريش مىرزامەن كەزدەستىم. كوشى-قونداعى ماڭىزدى ماسەلەنى تالقىلانىپ، بۇل باعىتتاعى جۇمىستاردى قولدايتىنىمدى ايتتىم. باس حاتشى كوشى-قون سالاسىنىڭ ماڭىزدى تۇستارىنا توقتالدى»، - دەپ جازدى د. قۇدايبەرگەن ءوزىنىڭ الەۋمەتتىك جەلىدەگى پاراقشاسىندا.
سونىمەن قاتار، باس حاتشى ا. گۋتەرريش ديماشتىڭ ونەرى بۇكىل الەم بويىنشا ميلليونداعان ادامدى ءتانتى ەتىپ، ونىڭ داۋىسى ادام قۇقىقتارىن قورعاۋدا جانە جالپى سانانى ارتتىرۋدا قوماقتى ۇلەس قوساتىنىن اتاپ ءوتتى.
«مەن ءوز تالانتىمدى الەمدەگى وڭتايلى وزگەرىستەرگە پايدالانا الاتىنىما ريزامىن. سوندىقتان بۇگىنگى تۇسكەن فوتوسۋرەتتى قۋانا وتىرىپ كوپشىلىك نازارىنا ۇسىنامىن»، - دەدى ءانشى.
ەسكە سالا كەتەيىك، استاناداعى ش ى ۇ سامميتىنىڭ قارساڭىندا ب ۇ ۇ باس حاتشىسى انتونيۋ گۋتەرريش Silk Way-گە بەرگەن ەكسكليۋزيۆتى سۇحباتىندا اتالعان سامميت پەن قازاقستاننىڭ وسى ۇيىمداعى ءرولى تۋرالى پىكىرىن ءبىلدىردى.