ب ۇ ۇ اۋعاندىق ايەلدەرگە قاتىستى بارلىق شەكتەۋدى الىپ تاستاۋدى تالاپ ەتتى

استانا. KAZINFORM – ب ۇ ۇ باس حاتشىسىنىڭ ساياسي ماسەلەلەر جونىندەگى ورىنباسارى روزماري ديكارلو اۋعانستان بيلىگىنەن ەلدىڭ ايەلدەر حالقىنا قاتىستى بارلىق كەمسىتۋشىلىك شەكتەۋىن دەرەۋ الىپ تاستاۋدى تالاپ ەتتى.

نيۋ- يوركتەگى ب ۇ ۇ شتاب- پاتەرىندە اۋعانستان بويىنشا جوعارى دەڭگەيلى شارادا سويلەگەن سوزىندە ديكارلو بۇل شتاتتاعى ايەلدەردىڭ جاعدايىن سالىستىرۋعا كەلمەيتىنىن ايتتى. ويتكەنى «الەمنىڭ ەشبىر جەرىندە تالىپتەر ايەلدەرگە تىيىم سالعان مۇنداي شەكتەۋلەر جوق». ول ب ۇ ۇ اۋعانستانمەن حالىقارالىق ىنتىماقتاستىقتى كەڭەيتۋ ءۇشىن دوحا دەپ اتالاتىن پروتسەسكە جەتەكشىلىك ەتەتىنىن ەسكە سالدى.

- بۇل پروتسەسس كەزەڭ-كەزەڭىمەن جۇزەگە اسىرۋدى قاجەت ەتەدى. ءبىز ءىس جۇزىندە اۋعانستان بيلىگىنەن باسقارۋدى ينكليۋزيۆتى ەتۋدى، ايەلدەر مەن قىزداردىڭ قۇقىعىن جانە جالپى ادام قۇقىقتارىن قۇرمەتتەۋدى جانە تەرروريزم مەن ەسىرتكىگە قارسى ءتيىمدى ارەكەتتەردى كۇشەيتۋدى كۇتەمىز. مۇنىڭ ورنىنا حالىقارالىق قاۋىمداستىق ءوزىنىڭ شەكتەۋلەرىن بىرتىندەپ جەڭىلدەتەدى،- دەدى روزماري ديكارلو.

ونىڭ ايتۋىنشا، تالىپتەردى ءوز مىندەتتەمەلەرىن ورىنداۋعا ءماجبۇر ەتۋ كەرەك.

- مۇنداعى ماقسات - تالىپتەردى ەڭ الدىمەن اۋعان حالقى مەن حالىقارالىق قاۋىمداستىق الدىنداعى مىندەتتەمەلەرىن ورىنداۋعا ماجبۇرلەۋ. بۇل - اۋعانستاننىڭ حالىقارالىق قاۋىمداستىققا قايتا ورالۋىنىڭ جالعىز جولى، - دەپ قوستى ول.

وسى جىلدىڭ شىلدە ايىندا وتكەن سوڭعى كەزدەسۋدە ديكارلو جانە باسقا دا كوپتەگەن قاتىسۋشى ايەلدەر مەن قىزدارعا تىيىم سالىنعان شەكتەۋلەر ماسەلەسىن كوتەردى جانە بۇل جاھاندىق قاۋىمداستىقتىڭ تالىپتەرمەن ءوزارا ارەكەتتەسۋىنە كەدەرگى بولاتىنىن اتاپ ءوتتى.

- تالىپتەر اۋعانستاننىڭ ازاماتتىق قوعامىمەن كەزدەسۋدەن باس تارتقانىمەن، ارنايى وكىلدەر ازاماتتىق قوعاممەن، ونىڭ ىشىندە اۋعان ايەلدەرىمەن بولەك كەلىسسوزدەر جۇرگىزدى. دوحاداعى بۇل كەزدەسۋ ناقتى بيلىكپەن ماعىنالى ديالوگتا جاڭا تاراۋدىڭ باستاماسى بولادى دەپ ۇمىتتەندىك،- دەپ اتاپ ءوتتى ديكارلو.

قىزدار مەن ايەلدەردىڭ مەكتەپتەرگە، ۋنيۆەرسيتەتتەرگە، سپورت زالدارىنا، قوعامدىق ساياباقتارعا بارۋ جانە ۇكىمەتتىك ەمەس ۇيىمداردا جۇمىس ىستەۋ قۇقىقتارى جۇيەلى تۇردە شەكتەلگەن اۋعانستانداعى ايەلدەرگە دەگەن جاعىمسىز كوزقاراستىڭ سەبەپتەرى تۋرالى ءبىز بۇعان دەيىن جازعانبىز. وندا بارلىق سۇلۋلىق سالونى جابىلدى. اۋعانستانداعى ايەلدەر كوزگە ساڭىلاۋ قالدىرىپ، تولىعىمەن جابىق جۇرۋگە مىندەتتى.