ازيادانىڭ كۇمىس جۇلدەگەرىنە استانادان پاتەر بەرىلدى
ەلوردادا «استانا» سپورت فورۋمى بولدى. وندا جىلدىڭ ۇزدىك سپورتشىسى مەن جاتتىقتىرۋشىسى، باسقا دا سپورتقا قاتىسى بار ادامداردى ماراپاتتاۋ ءراسىمى ءوتتى.
ءىس-شارادا قىتايدىڭ حاڭجوۋ قالاسىندا وتكەن ازيا ويىندارىنىڭ كۇمىس جۇلدەگەرى گالينا دۋۆانوۆاعا پاتەردىڭ كىلتى تابىس ەتىلدى، دەپ حابارلادى قالا اكىمدىگىنىڭ رەسمي سايتى.
استانا اكىمدىگىنىڭ قولداۋىمەن «قازاقستان سپورتشىلار وداعى» ر ق ب ۇيىمداستىرعان ءىس-شارا بەيبىتشىلىك جانە كەلىسىم سارايىندا ءوتتى.
استانا قالاسى اكىمىنىڭ ورىنباسارى ەسەت بايكەن ءىس-شارانىڭ ءمان-ماڭىزى تۋرالى ايتا كەلىپ، ەلىمىز قاي كەزدە بولسىن جىلدىڭ ۇزدىگى اتانعان سپورتشىلار مەن جاتتىقتىرۋشىلاردىڭ، سپورت ۇيىمدارىنىڭ ەڭبەگىن باس بارماقپەن باعالايتىنىن اتاپ ءوتتى.
فورۋمدا قازىلار القاسى مۇشەلەرىنىڭ داۋىس بەرۋ قورىتىندىسى بويىنشا بىرنەشە اتالىم جەڭىمپازدارى اتالدى. وندا «سپورت ارداگەرلەرى» نوميناتسياسىندا مارات قۋانىشيەۆ، مەرەي اقشالوۆ، جانات ماناشيەۆ پەن اناتولي حراپاتىي (قايتىس بولعاننان كەيىن)، «ەرلەر اراسىنداعى جىل سپورتشىسى» اتالىمىندا نۇربەك ورالباي، «ايەلدەر اراسىنداعى جىل سپورتشىسى» نوميناتسياسىندا ءجاميلا باقبەرگەنوۆا ۇزدىك دەپ تانىلدى. سونداي-اق اقمارال ناۋاتبەك ايەلدەر اراسىنداعى ۇزدىك پارا سپورتشى، ەرعالي شامەي ەرلەر اراسىنداعى ۇزدىك پارا سپورتشى، داۋرەن ورازوۆ سپورت تۇرلەرى بويىنشا جىل جاتتىقتىرۋشىسى، اسقار ەركەبايەۆ جىل جاتتىقتىرۋشىسى اتاندى.
استانانىڭ ۇلتتىق جانە وليمپيادالىق ات سپورتى تۇرلەرىنىڭ فەدەراتسياسى «جىلدىڭ ۇزدىك ەلوردالىق فەدەراتسياسى»، گۇلنار بازاراليەۆا «ۇلتتىق سپورت تۇرلەرى بويىنشا ۇزدىك سپورتشى»، استانا اكىمدىگىنىڭ «بالالار-جاس وسپىرىمدەر سپورت مەكتەبى، مۇگەدەكتەرگە ارنالعان سپورت مەكتەبى» ك م م «جىلدىڭ ۇزدىك بالالار-جاس وسپىرىمدەر سپورت مەكتەبى»، نۇرجان باتىربەكوۆ پەن «جەڭىس» فۋتبول كلۋبى «جىل سەرپىلىسى»، دميتري ينيۋتين، اسحات مۇقاشيەۆ، اسەت نۇرعوجين، قۋانىش نۇرتاقوۆ «جىل مەتسەناتى» اتالىمىندا ۇزدىك شىقتى.