ازيادا: قازاقستان قورجىنىنا ءۇشىنشى جۇلدە ءتۇستى

قىتايدىڭ حاڭجوۋ قالاسىندا ءوتىپ جاتقان XIX جازعى ازيا ويىندارىندا ەل قۇراماسى قورجىنىنا ءۇشىنشى مەدال ءتۇستى، دەپ حابارلايدى قازاقپارات ءتىلشىسى.

اتاپ ايتقاندا، ەل قۇراماسىنان نيكيتا چيريۋكين وق اتۋدان قولا جۇلدە الدى. ول تاپانشادان 25 مەترگە جىلدام كوزدەۋ سايىسىندا ۇزدىك ۇشتىكتى تۇيىندەدى.

بۇل باسەكەدە ءبىرىنشى ورىن قىتايلىق يۋحون ليگە بۇيىرسا، ەكىنشى ورىنعا سول ەلدىڭ تاعى ءبىر وكىلى يانگپان ليۋ يە بولدى.

ەسكە سالساق، بۇدان بۇرىن ەل قۇراماسىنان دزيۋدودان ابيبا ءابۋجاقىنوۆا (48 كەلى) كۇمىس، ماعجان شامشادين (60 كەلى) قولا جۇلدەگەر اتاندى.

قازاقستان حاڭجوۋ قالاسىنا 30 سپورت تۇرىنەن 524 اتلەت (262 ەر، 262 ايەل) الىپ باردى.

ءدۇبىرلى دودادا سپورتتىڭ 8 تۇرىنەن: بوكس، ساداق اتۋ، قازىرگى بەسسايىس، ءجۇزۋ، برەيكينگ، كوگالداعى حوككەي، تەننيس پەن جەڭىل اتلەتيكادان پاريج وليمپياداسىنا ليتسەنزيا ويناتىلادى.

اۆتور

ءادىلجان ۇمبەت