ازيا ويىندارىنا قاتىسقان ءۇش قانداسىمىز دا جۇلدە الدى - شەتەلدەگى قازاق باسپا ءسوزى
«قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
ازيا ويىندارىنا قاتىسقان ءۇش قانداسىمىز دا جۇلدەلى ورىنعا يە بولدى - CNR
وسى جولعى قىتايدىڭ حاڭجوۋ قالاسىندا وتكەن ازيا ويىندارىنا قاتىسقان شينجاڭدىق 4 قازاق سپورتشىنىڭ ۇشەۋى جۇلدەلى ورىندارعا قول جەتكىزدى.
اتاپ ايتقاندا 5-قازان كۇنى كەشكە قىتايدىڭ حاڭجوۋ قالاسىندا وتكەن ەرلەر بوكسىنىڭ 80 كەلى سالماق دارەجەسىندەگىلەردىڭ اقتىق سايىسىندا قىتايلىق قانداسىمىز توقتاربەك تاڭاتقان ۇلى فيليپپين بوكسشىسىن قاپى قالدىرىپ، ءوز سالماق دارەجەسىنىڭ التىن مەدالىن جەڭىپ الدى، - دەپ حابارلايدى قىتايدىڭ «ورتالىق حالىق راديوسى» اقپاراتتىق پورتالى.
«ول قىتاي بوكس كومانداسىنداعى شينجاڭدىق سپورتشىلاردىڭ ازيا ويىندارى جارىسىنداعى ەڭ جاقسى ناتيجەسىنە قول جەتكىزدى»، دەپ جازادى CNR.
قىتايلىق دەرەككوزدىڭ مالىمەتىنشە، سونىمەن قاتار وسى جولعى ازيا ويىندارىندا ەرلەر اراسىنداعى بوكستا 92 كەلى سالماق دارەجەسىندە قىتايلىق بايقونىس دانابەك ۇلى قولا مەدالدى ەنشىلەگەن.
سونداي-اق، كابيران ابۋشايمان ۇلى اتتى بالۋاندا ۇزدىكتەر قاتارىنان كورىنىپ، ازيا ويىندارىندا قولا مەدالدى جەڭىپ العان.
7-قازان كۇنى ەرلەر 97 كەلى سالماقتاعى ەركىن كۇرەستەن قولا مەدالعا تالاسقان. قىتاي سپورتشىسى كابيران ابۋشايمان ۇلى قارسىلاسى وڭتۇستىك كورەيالىق شەبەردى ەكى مايداندا دا جەكە-جەكە ءبىر نومىردەن ۇتىپ، 2:1 ەسەبىمەن قولا مەدالعا يە بولدى.
تاشكەنتتە «الاشتىڭ اسىل ارىستارى» اتتى حالىقارالىق كورمە اشىلدى - «ءوز ا»
2023 -جىل 4-قازان كۇنى تاشكەنت قالاسىنداعى قۋعىن- سۇرگىن قۇرباندارىن ەسكە الۋ مەملەكەتتىك مۋزەيىندە «الاشتىڭ اسىل ارىستارى» اتتى حالىقارالىق كورمە اشىلدى.
اتاۋلى كورمەنى قازاقستان رەسپۋبليكاسى مادەنيەت جانە اقپارات مينيسترلىگى مادەنيەت كوميتەتىنىڭ قازاقستان رەسپۋبليكاسى مەملەكەتتىك ورتالىق مۋزەيى جانە وزبەكستان رەسپۋبليكاسى مينيسترلەر كابينەتى جانىنداعى قۋعىن- سۇرگىن قۇرباندارىن ەسكە الۋ مەملەكەتتىك مۋزەيى بىرلەسىپ وتكىزگەن، دەپ حابارلايدى «ءوز ا» اقپاراتتىق اگەنتتىگى.
اتالعان ب ا ق-تىڭ مالىمەتىنشە، وعان اعارتۋشى- عالىم، دارىگەر، قازاقستانداعى دەنساۋلىق ساقتاۋ جۇيەسىن، جوعارى ءبىلىم بەرۋدى جانە باسپا ءىسىن العاش ۇيىمداستىرۋشىلاردىڭ ءبىرى حالەل دوسمۇحامەدوۆتىڭ 140 جىلدىعى مەن اقىن، دراماتۋرگ، اۋدارماشى، پەداگوگ ماعجان جۇمابايەۆتىڭ 130 جىلدىعىنا وراي «الاشتىڭ اسىل ارىستارى» حالىقارالىق كورمەسىن ۇيىمداستىرعان.
كورمەنىڭ ماقساتى الاش قايراتكەرلەرىنىڭ ونەگەگە تولى ءومىر جولدارىن ناسيحاتتاۋ، ەكى ەل اراسىنداعى حالىقارالىق ىنتىماقتاستىق پەن مادەني بايلانىستى نىعايتۋ جانە مۋزەي ماماندارىنىڭ تاجىريبە الماسۋىنا جول اشۋ.
ايتا كەتەيىك، بۇل كورمەگە قازاقتىڭ ءبىرتۋار ازاماتتارى حالەل دوسمۇحامەدوۆ پەن ماعجان جۇمابايەۆتىڭ ءومىر جولىنان سىر شەرتەر ارحيۆتىك قۇجاتتارمەن قاتار ۇلى تۇلعالاردىڭ ۇستاپ- تۇتىنعان جەكە زاتتارى، كىتاپتارى قويىلعان. سونىمەن بىرگە الاشوردا قايراتكەرلەرى احمەت بايتۇرسىنوۆ، ءاليحان بوكەيحانوۆ، ءمىرجاقىپ دۋلات ۇلى، مۇحامەدجان تىنىشپايەۆ، مۇستافا شوقاي، ساكەن سەيفۋلليننىڭ جەكە كەشەندەرى نەگىزىندە 50 ساقتام بىرلىك مۋزەيلىك زاتتار مەن قاتار اقپاراتتىق ستەندىلەر كورمەگە كەلۋشىلەرگە ۇسىنىلعان.
حالىقارالىق كورمەنى 2023 -جىلدىڭ 4-11-قازان كۇندەرى ارالىعىندا تاشكەنت قالاسىنداعى قۋعىن- سۇرگىن قۇرباندارىن ەسكە الۋ مەملەكەتتىك مۋزەيىنە بارىپ تاماشالاۋعا بولادى.
سونداي-اق، وسى اپتادا «ءوز ا» اقپارات اگەنتتىگىندە «وزبەكستاننان تاجىريبەسى نەگىزىندە قازاقستاندا ءپىللا شارۋاشىلىعى دامىتىلماق» دەگەن تاقىرىپتاعى اقپارات جارىق كوردى.
وزبەكستاندىق ب ا ق-تىڭ مالىمەتىنشە، «ۋزبەكيپاكسانوات» بىرلەستىگىنىڭ ءتوراعاسى و. جۋمايەۆ باستاعان دەلەگاتسيا مۇشەلەرى قازاقستان رەسپۋبليكاسى تۇركىستان وبلىسى اكىمىنىڭ شاقىرۋىمەن وسى وڭىرگە بارعان.
ساپار بارىسىندا دەلەگاتسيا مۇشەلەرى تۇركىستان وبلىسىنىڭ اكىمى د. ساتىبالدىمەن كەزدەسىپ، ىنتىماقتاستىق قارىم-قاتىناس ورناتۋ ماسەلەلەرىن تالقىلاعانى تۋرالى جازادى «ءوز ا».
كەزدەسۋدە تۇركىستان وبلىسىندا ءپىللا شارۋاشىلىعىن كەشەندى دامىتۋ بويىنشا وڭىرلىك باعدارلاما مەن قۇقىقتىق قۇجات جوباسىن (ۇكىمەتتىڭ قاۋلىسى دەڭگەيىندە) ازىرلەۋدە وزبەكستان تاراپىنان ۇسىنىستار مەن پراكتيكالىق كومەك كورسەتىلۋى بەلگىلەندى .
سونداي-اق جىبەك قۇرتىنىڭ ازىق بازاسىن دامىتۋ ءۇشىن وزبەكستاننان جوعارى ساپالى تۇت كوشەتتەرىن جەتكىزۋ جانە وزبەكستاننان جىبەك ءوسىرۋ، تۇت ءوسىرۋ، ءپىللا ءوسىرۋ جانە ءپىللا وڭدەۋ سالالارىنا تاجىريبەلى مامانداردى تارتۋعا كەلىسىلگەن.
3000 شاقىرىمدى جاياۋ ءجۇرىپ بەيجىڭگە باردى - CNR
وسى اپتادا «ورتالىق حالىق راديوسى» اقپاراتتىق پورتالىندا قىتايدىڭ شينجاڭ ولكەسىنەن بەيجىڭگە جاياۋ بارعان سەرىك قاري ۇلى ەسىمدى قازاق ازاماتى تۋرالى اقپارات جارىق كوردى.
اتالعان ب ا ق-تىڭ مالىمەتىنشە، سەرىك قاري ۇلى اتتى 2023 -جىلى 1-تامىز كۇنى شينجاڭنىڭ باركول قازاق اۆتونوميالى اۋدانىنان جاياۋ جولعا شىعىپ، ەكى ايداي ۋاقىتتا قىتاي استاناسى بەيجىڭگە جەتكەن.
سەرىكتىڭ بۇل جولعى جاياۋ ءجۇرىپ وتكەن جولى 3000 شاقىرىمدى قۇرايدى.
«س. قاري ۇلى 1-قازان كۇنى بەيجىڭ قالاسىنداعى تيانانمەن الاڭىنداعى تۋ شىعارۋ سالتاناتىنا قاتىناسىپ، بالا كۇنگى ءوز ارمانىن ورىنداعان»، دەپ جازادى قىتايلىق باسىلىم.
ايتا كەتەيىك، سەرىك قاري ۇلى 1995 -جىلى باركول قازاق اۆتونوميالى اۋدانىندا دۇنيەگە كەلگەن. ول 2017 -جىلدان بەرى جەكە كاسىپكەرلىكپەن اينالىسادى.
ءوز كاسىبىنىڭ شەبەرى - ارنۇر مەلس قىزى - Janadauir.com
قازىرگىدەي جاھاندانعان، باسەكەلەستىك كوپ ورتادا ءوزىنىڭ قوعامداعى ورنىن ايشىقتاپ، جاقسى تىرشىلىك ەتىپ وتىرعان جاندار كوپ. سونىڭ ىشىندە ءوزىنىڭ ادال ەڭبەگىمەن وتباسىن اسىراپ وتىرۋ - ۇلكەن جەتىستىك. سولاردىڭ ءبىرى - مەلس قىزى ارنۇر. ول ايماعىمىز ورتالىعىنداعى «پاندا» شاشتارازىنىڭ قوجايىنى. وسى كاسىپپەن اينالىسقانىنا 10 جىلدان استام ۋاقىت بولعان. ەندى نازارلارىڭىزعا ارنۇر حانىممەن وتكىزىلگەن سۇحباتتى ۇسىنامىز، دەپ جازادى موڭعوليالىق Janadauir.com سايتى.
اتالعان باسىلىم زامان كوشىنەن ءوز جولىن تاپقان ارنۇر مەلس قىزىنان العان سۇحباتىن جاريالاعان. جاس كاسىپكەر ءتىلشى سۇراعىنا وراي ءوزىنىڭ جەتكەن جەتىستىكتەرىن ايتىپ بەرگەن.
قازاق جازۋشىسىنىڭ تۇرىك تىلىنە اۋدارىلعان كىتابى تانىستىرىلدى - «TRT»
قازاقستاننىڭ تۇركياداعى ەلشىلىگى جانە ەۋرازيا جازۋشىلار وداعىمەن بىرلەسە وتىرىپ بەلگىلى قازاق جازۋشىسى راحمەتوللا رايىمقۇلوۆتىڭ تۋعانىنا 110 جىل تولۋىنا ارنالعان كونفەرەنسيا جانە تۇرىك تىلىنە اۋدارىلعان «جاسىل بەلەس» كىتابىنىڭ تۇساۋكەسەرى ۇيىمداستىرىلدى.
تۇرىك مادەنيەتىنىڭ حالىقارالىق ۇيىمى تۇرىكسويدىڭ انكاراداعى شتاب-پاتەرىندە راحمەتوللا رايىمقۇلوۆتىڭ تۇرىك تىلىنە اۋدارىلعان كىتابى تانىستىرىلدى.
بۇل تۋرالى تۇركيا راديو تەلەۆيزيا پورتالى حابارلادى.
شاراعا قاتىسقان تۇرىكسوي باس حاتشىنىڭ ورىنباسارى سايت يۋسۋفتىڭ ايتۋىنشا، بيىل تۇرىكسوي 30 جىلدىق مەرەيتويىن تويلاپ جاتىر. اتالعان ۇيىم 30 جىل بويى مادەنيەتتى بارىنشا ناسيحاتتاۋعا اتسالىسىپ كەلەدى، بۇل ءۇردىس الداعى ۋاقىتتا دا جالعاساتىن بولادى. ارينە، بۇل ىستەردى جالعىز ەمەس، تۇرىك الەمىنىڭ قۇندى تۇلعالارىمەن، تۇركياداعى ۇكىمەتتىك ەمەس ۇيىمدارمەن، عالىمدارمەن جانە باسقا دا باۋىرلاس ۇيىمدارمەن بىرلەسە وتىرىپ جۇرگىزىلەدى.
باسقوسۋدا قازاقستان ەلشىلىگىنىڭ ءبىرىنشى حاتشىسى، كونسۋل نىشانگۇل قاراتايەۆا سوزىندە قازاق جازۋشى راحمەتوللا رايىمقۇلوۆتىڭ ماڭىزدى شىعارمالارى مەن ونىڭ اتقارعان جۇمىستارىنا توقتالعان.
كىتاپ تانىستىرۋىنا ارنايى بارعان «قازاق كونسەرت» باسشىسى اقتوتى رايىمقۇلوۆا اكەسى راحمەتوللا رايىمقۇلوۆتىڭ 110 جىلدىعىنا وراي وتكىزىلگەن كونفەرەنسياعا جانە تۇرىك تىلىنە اۋدارىلعان «جاسىل بەلەس» كىتابىنىڭ تۇساۋكەسەرىنە ريزاشىلىعىن بىلدىرگەن.
«قۇتتىقتاۋ سوزدەردەن كەيىن «جاسىل بەلەس» كىتابىنىڭ لەنتاسى قيىلىپ، ارتىنان قاتىسۋشىلار قازاقستاندىق تانىمال «تۇران» ەتنو-فولكلورلىق مۋزىكالىق توبىنىڭ شاعىن كونسەرتىن تىڭدادى»، دەپ تۇيىندەيدى تۇركيالىق ب ا ق.
اۆتور
بەيسەن سۇلتان