ازيا چەمپيوناتى: قازاقستاندىق مەرگەن ۇزدىك وندىققا ەندى

استانا. KAZINFORM - بۇگىن شىمكەنت قالاسىندا ءوتىپ جاتقان نىسانا كوزدەۋ مەن ستەند اتۋدان XVI ازيا چەمپيوناتىندا تاعى ءبىر وتانداسىمىز اقتىق سىندا باق سىنادى.

سپورتتى دامىتۋ ديرەكسياسى مالىمەتىنشە، ايەلدەر اراسىندا ۆينتوۆكامەن 50 مەتردەن 3 پوزيتسيادا وق اتۋدا ەليزاۆەتا بەزرۋكوۆا 8-ساتىعا جايعاستى. ونىڭ ۇپاي سانى 401.3.

وتانداسىمىز فينالعا دەيىن وتكەن ىرىكتەۋدە 584 ۇپاي جيناپ، ۇزدىك سەگىز مەرگەننىڭ قاتارىنا كىرگەن.

قالعان سپورتشىلارىمىزدىڭ ىرىكتەۋدەگى ناتيجەسى:

الەكساندرا لە 10-ورىن (584 ۇپاي)

ارينا مالينوۆسكايا 29-ورىن (571 ۇپاي)

وسى جاتتىعۋدا كوماندالىق ەسەپتە قازاقستان ايەلدەر قۇراماسى 5-ورىننان كورىندى.

ايتا كەتەيىك، شىمكەنتتەگى ازيا چەمپيوناتىندا قازاقستاندىق مەرگەندەر كۇمىس جۇلدە الدى.