ۆيتسە-پرەزيدەنت ەرلان قارين الەۋمەتتىك جەلىدە جازبا جاريالاپ، ماقالانىڭ فورماتى ەرەكشە ەكەنىن اتاپ ءوتتى.
ماقالادا سپيكەرلەر ىشكى ساياساتتىڭ، ۇلتتىق يدەولوگيانىڭ نەگىزگى باعىتتارىن جان-جاقتى تالقىلاعان.
- «ەگەمەن قازاقستان» گازەتىنىڭ بۇگىنگى نومىرىندە «ءتارتىپ پەن تازالىق - ۇلتتىق يدەولوگيانىڭ التىن دىڭگەگى» دەگەن ماتەريال وقىدىم. ءدال وسىنداي ۇلگىدەگى ماقالالاردى بۇعان دەيىنگى ساندارىنان دا كورگەن ەدىم. ءبىر تاقىرىپ توڭىرەگىندە جان-جاقتى تالقىلاۋ جۇرگىزىلەدى. فورماتى ۇنادى. بۇل - ەل گازەتىنىڭ «ساناتكەر ۇلت» دەپ اتالاتىن جوباسى. جوبا اياسىندا ىشكى ساياساتتىڭ، ۇلتتىق يدەولوگيانىڭ نەگىزگى باعىتتارى جان-جاقتى تالقىلانادى. وسى جولعى تاقىرىپ مەملەكەت باسشىسىنىڭ «تازا قازاقستان» باستاماسىنا ارنالعان. سپيكەرلەر ماسەلەگە ءار قىرىنان ءۇڭىلىپتى. جاقسى ويلار ايتىلعان. ماسەلەن، پرەزيدەنت كەڭەسشىسى باۋىرجان وماروۆ «تازا قازاقستاننىڭ» بەس قىرىنا توقتالىپ، بەسىنشى قىرى رەتىندە سانانى تازارتۋدى اتاپتى. ياعني، ويدىڭ تازالىعىن ساقتاۋ. «تەگىندە مۇنى بەسىنشى قاتارعا ەمەس، ءبارىنىڭ الدىنا، ياعني ءبىرىنشى قاتارعا قويساق تا بولار. سانا تازارسا، بارلىق نارسە تازارادى. تازارۋ جاڭارۋعا، جاڭارۋ جاڭعىرۋعا باستايدى»، دەيدى ول.
قازاقستان حالىق كەڭەسىنىڭ مۇشەسى ەدىل جاڭبىرشين: «مەملەكەت باسشىسى قاسىم-جومارت توقايەۆ «تازا قازاقستان» ۇعىمى ءار ادامنىڭ ءوز ۇيىنەن، اۋلاسىنان، كوشەسىنەن، اۋىلىنان، قالاسىنان باستالاتىنىن ۇنەمى ايتىپ كەلەدى. سانا تازارعاندا عانا ءبىز وسىناۋ اۋقىمدى تۇسىنىكتىڭ استارىنا تەرەڭدەي ۇڭىلە الامىز»، دەپتى. قۇرىلتاي دەپۋتاتى سەرىك ەگىزبايەۆتىڭ پىكىرىنشە، پرەزيدەنتىمىز باستاپ بەرگەن جالپىۇلتتىق يدەولوگيا ءاربىر ءۇيدىڭ، ءاربىر ازاماتتىڭ كۇندەلىكتى ءومىر سالتىنا اينالۋعا ءتيىس. ال قۇرىلتاي دەپۋتاتى يرينا تەن «تازالىق تازا جەردە ەمەس، تازالىق ساقتالعان جەردە بولادى» دەگەن ءتۇيىندى وي ايتقان. ءارى قوقىس جينايتىن ادامداردىڭ سانىن كوبەيتۋدەن گورى، قوقىس تاستامايتىن بۋىن قالىپتاستىرۋعا كوبىرەك كۇش سالۋىمىز كەرەك ەكەنىن العا تارتادى. تالقىلاۋعا قاتىسقان باسقا دا سپيكەرلەر كوڭىلگە قونىمدى وي-پىكىر بىلدىرگەن، - دەدى ەرلان قارين.
سونىمەن قاتار دوڭگەلەك ۇستەل فورماتىنداعى مۇنداي ماتەريالدار وقىرمان قاۋىم ءۇشىن ماڭىزدى ەكەنىن اتاپ ءوتتى.
- «ساناتكەر ۇلت» جوباسى اياسىندا وسىعان دەيىن ۋربانيزاتسيا داۋىرىندەگى ادەبيەت، تاريحي وپتيميزم تاقىرىپتارى دا تالقىلانعانىن وقىعان ەدىم. بىزگە دوڭگەلەك ۇستەل فورماتىنداعى مۇنداي ماتەريالدار كەرەك. تالقىلاۋ كەزىندە بارلىق تاراپتىڭ وكىلدەرىن قامتۋ دا ماڭىزدى. بۇل وقىرمان ءۇشىن دە ۇلكەن ولجا دەپ ەسەپتەيمىن. وسى جوبا ارقىلى «ەگەمەن قازاقستان» گازەتى تىڭ ويلار ايتىلاتىن، تەرەڭ پىكىر الماسۋلار جۇرەتىن الاڭعا اينالىپ كەلە جاتقانىن بايقاتتى، - دەدى ۆيتسە-پرەزيدەنت.
ماقالانىڭ تولىق نۇسقاسىن مىنا سىلتەمە ارقىلى وقي الاسىز.