ازەربايجان سيريانى قالپىنا كەلتىرۋگە قاتىسۋعا دايىن - يلحام اليەۆ
استانا. KAZINFORM - ازەربايجان پرەزيدەنتى يلحام اليەۆ انتاليادا ءوتىپ جاتقان 4-ديپلوماتيالىق فورۋم اياسىندا سيريانىڭ وتپەلى كەزەڭدەگى پرەزيدەنتى احمەد اش-شاراامەن كەزدەستى، دەپ حابارلايدى ازەربايجان پرەزيدەنتىنىڭ رەسمي سايتى.
كەزدەسۋدە يلحام اليەۆ سيرياداعى وزگەرىستەرگە قاناعاتتانعانىن ايتىپ، احمەد اش-شاراانى قۇتتىقتادى. سونداي-اق ول ازەربايجان ەلدەگى تۇراقتىلىقتى نىعايتۋ ءۇشىن سيريانى قالپىنا كەلتىرۋگە قاتىسۋعا دايىن ەكەنىن اتاپ ءوتتى.
احمەد اش-شاراا يلحام اليەۆكە كورسەتكەن قولداۋى ءۇشىن العىسىن ءبىلدىردى. سيريانىڭ وتپەلى كەزەڭدەگى پرەزيدەنتى ازەربايجاننىڭ ءوز ەلىنە ەنەرگەتيكا، ينفراقۇرىلىم جانە قاۋىپسىزدىك سالالارى بويىنشا كوپ كومەگىن تيگىزىپ جاتقانىن ايتتى.
احمەد اش-شاراا سيرياداعى تۇراقتىلىقتى قالپىنا كەلتىرۋ ءۇشىن قولدان كەلگەننىڭ ءبارىن جاساپ جاتقانىن تىلگە تيەك ەتە كەلە، سىرتقى فاكتورلاردىڭ ىقپالىنا الاڭداۋشىلىق بىلدىرەتىنىن جاسىرمادى.
كەلىسسوزدەر بارىسىندا كوشباسشىلار ازەربايجان- سيريا-تۇركيا ءۇشجاقتى ىنتىماقتاستىق فورماتىن دامىتۋ ماسەلەلەسىن تالقىلادى.
ەكى ەلدىڭ جوعارى دەڭگەيدەگى رەسمي دەلەگاتسياسى مەن ىسكەر توپ وكىلدەرىنىڭ ءوزارا ساپارلارىن جۇزەگە اسىرۋ تۋرالى ۋاعدالاستىققا قول جەتكىزىلدى.
جەلتوقسان ايىندا ازەربايجان سىرتقى ىستەر مينيسترلىگى بۇل ەلدىڭ سيرياداعى گۋمانيتارلىق ماسەلەلەردى شەشۋگە ۇلەس قوسۋعا دايىن ەكەنىن مالىمدەگەن.
بىرەر كۇن بۇرىن نەتانياحۋ كەڭسەسى سيرياداعى جاعىمسىز وقيعالاردىڭ الدىن الۋعا باعىتتالعان دەەسكالاتسيا مەحانيزمىن تالقىلاۋ ءۇشىن تۇركيا مەن يزرايل دەلەگاتسيالارىنىڭ ازەربايجاندا كەزدەسۋىن راستادى.
ەسكە سالا كەتەيىك، بۇعان دەيىن ازەربايجاننىڭ قىتايمەن قورعانىس سالاسى بويىنشا ديالوگتى باستاعانىن حابارلاعان بولاتىنبىز.