ازەربايجان مەن ناتو ەنەرگەتيكالىق ىنتىماقتاستىق بويىنشا پىكىر الماستى
باكۋ. KAZINFORM - باكۋدە ەنەرگەتيكالىق قاۋىپسىزدىك جانە كليماتتىڭ وزگەرۋى ماسەلەلەرىن زەرتتەۋگە ارنالعان «ازەربايجان-ناتو» اتتى دوڭگەلەك ۇستەل ءوتتى.
فورۋم ازەربايجاننىڭ ناتونىڭ «بەيبىتشىلىك ءۇشىن ارىپتەستىك» قۇجاتىنا قوسىلۋىنىڭ 30 جىلدىعى اياسىندا ۇيىمداستىرىلدى، دەپ حابارلايدى Kazinform مەنشىكتى ءتىلشىسى.
فورۋم بارىسىندا ەنەرگەتيكالىق قاۋىپسىزدىك ماسەلەلەرى، ەۋروپانىڭ ەنەرگەتيكالىق قاۋىپسىزدىگىن قامتاماسىز ەتۋدەگى ازەربايجاننىڭ ءرولى، ماڭىزدى ەنەرگەتيكالىق ينفراقۇرىلىمعا ىقتيمال قاۋىپتەر، كليماتتىڭ وزگەرۋى ماسەلەلەرى كوتەرىلدى.
«ازەربايجان اليانسپەن تۇراقتى ساياسي ديالوگ جۇرگىزىپ، ايماقتا جانە ودان تىس جەرلەردە بەيبىتشىلىك پەن قاۋىپسىزدىككە ۇلەس قوسۋ ءۇشىن كەڭ اۋقىمدى ماسەلەلەر بويىنشا ناتو- مەن ساياسي ىنتىماقتاستىقتى دامىتادى»، - دەدى ازەربايجان سىرتقى ىستەر مينيسترلىگىنىڭ ءبولىم باسشىسى انار مۋتالليموۆ.
ونىڭ ايتۋىنشا، ازەربايجان مەن ناتو اراسىنداعى ارىپتەستىك اسكەري ىنتىماقتاستىق شەگىنەن شىعىپ، ءبىرقاتار ماسەلەلەردى قوزعاپ وتىر. ولاردىڭ اراسىندا قاۋىپسىزدىك سەكتورىن رەفورمالاۋ، عىلىم جانە قورشاعان ورتا، گۋمانيتارلىق مينالاردان تازارتۋ، ايەلدەر، بەيبىتشىلىك پەن قاۋىپسىزدىك، قوعامدىق ديپلوماتيا مەن ەنەرگەتيكالىق قاۋىپسىزدىك ماسەلەلەرى بار.
س ءى م وكىلىنىڭ اتاپ وتۋىنشە، ازەربايجان ينفراقۇرىلىمنىڭ بولۋى مەن ءوسىپ كەلە جاتقان گاز الەۋەتىنىڭ ارقاسىندا، اسىرەسە قازىرگى حالىقارالىق جاعدايلاردا ەۋرواتلانتيكالىق ايماقتىڭ ەنەرگەتيكالىق قاۋىپسىزدىگىن قامتاماسىز ەتۋدە ماڭىزدى ءرول اتقارىپ وتىر.
«ازەربايجان ەنەرگيا جەتكىزۋشى ءرولىن كليماتتىق مىندەتتەمەلەرمەن تەڭەستىرۋگە تىرىسىپ وتىر، ونىڭ ىشىندە جاسىل ەنەرگەتيكالىق ايماقتار مەن دالىزدەردى قۇرۋ، سونداي-اق ايماقتاعى ەنەرگەتيكالىق ءوزارا ءىس-قيمىل بار»، - دەپ تۇيىندەدى ديپلومات.
ازەربايجان مەن ناتو ىنتىماقتاستىعى 1994-جىلى قول قويىلعان «بەيبىتشىلىك ءۇشىن ارىپتەستىك» نەگىزدەمەلىك قۇجاتىنا نەگىزدەلگەن. تاراپتار اراسىنداعى ارىپتەستىكتىڭ نەگىزگى باعىتتارى - ساياسي ديالوگ، بىتىمگەرشىلىك وپەراتسيالار، قاۋىپسىزدىككە قاۋىپ ءتونىپ تۇرعان قاۋىپتەر جانە قورعانىسقا باسا نازار اۋدارا وتىرىپ، كەڭ اۋقىمدى ماسەلەلەر بويىنشا پراكتيكالىق ىنتىماقتاستىق.