ازەربايجان ارانداتۋشىلىققا بايلانىستى حالىقارالىق وليمپيادا كوميتەتىنە نارازىلىق ءبىلدىردى

استانا. kazinform - ازەربايجان رەسپۋبليكاسىنىڭ جاستار جانە سپورت مينيسترلىگى مەن ۇلتتىق وليمپيادا كوميتەتى پاريجدەگى جازعى وليمپيادا ويىندارىنىڭ اشىلۋىندا France2 تەلەارناسىندا جاسالعان ازەربايجانعا قارسى ارانداتۋشىلىق مالىمدەمەگە بايلانىستى حالىقارالىق وليمپيادا كوميتەتىنە رەسمي نارازىلىق حاتىن جولدادى، دەپ جازادى Trend.

«26-شىلدە كۇنى فرانسيا استاناسى پاريجدە وتكەن جازعى وليمپيادا ويىندارىنىڭ اشىلۋ سالتاناتىندا فرانسيانىڭ France2 ۇلتتىق تەلەارناسىنىڭ ءتىلشىسى ازەربايجان مەن ارمەنيا سپورتشىلارىنىڭ شەرۋى كەزىندە كەمسىتۋشىلىك كورسەتىپ، ازەربايجاندى ارمەنيامەن قاقتىعىسقا قاتىستى ايىپتادى. سونىمەن بىرگە ول بيىلعى جىل ارميان حالقىنىڭ «ازەربايجان ارمياسىنىڭ تاۋلى قاراباقتى قۇلاتۋىمەن» ەستە قالعانىن اتاپ ءوتتى. شىن مانىندە، بۇل - وليمپيادا حارتياسىنىڭ نەگىزگى قاعيداتتارىن ورەسكەل بۇزۋ.

بۇل پرينتسيپتەر سوڭعى جىلدارى بىرىككەن ۇلتتار ۇيىمى باس اسسامبلەياسىنىڭ (ب ۇ ۇ) بىرنەشە قارارىندا ايتىلىپ، قولداۋ تاپتى، سونىڭ ىشىندە «وليمپيادا حارتياسىنىڭ نەگىزگى پرينتسيپتەرىن مويىنداۋ» (A/RES/78/10) بولىپ سانالادى. جارعىدا «ح و ك- تىڭ ميسسياسى - بۇكىل الەمدە وليمپيادانى ناسيحاتتاۋ، وليمپيادالىق قوزعالىستى باسقارۋ جانە سپورت پەن سپورتشىلاردىڭ كەز- كەلگەن ساياسي نەمەسە كوممەرتسيالىق قاناۋىنا قارسى تۇرۋ.

وقيعاعا بايلانىستى ازەربايجان رەسپۋبليكاسىنىڭ جاستار جانە سپورت مينيسترلىگى مەن ۇلتتىق وليمپيادا كوميتەتى حالىقارالىق وليمپيادا كوميتەتىنە رەسمي نارازىلىق حات جولدادى. حاتتا مەملەكەتتىك تەلەارنانىڭ ازەربايجانعا دەگەن قۇرمەتسىزدىگى وليمپيادا حارتياسىن ايقىن بۇزۋ دەلىنگەن. مۇنداي ۇگىت-ناسيحات ويىنداردىڭ رۋحىنا قايشى كەلەدى جانە ازەربايجان مەن ارمەنيا اراسىنداعى بەيبىت قاتىناستى بۇزۋعا اسەر ەتەدى. سوندىقتان ح و ك- قا پاريجدەگى 2024 -جىلعى وليمپيادا كەزىندە سپورتتى ساياساتتاندىرۋعا قارسى بەرىك ۇستانىم جاساۋ جانە فرانسيا ۇكىمەتى، فرانسيانىڭ ۇلتتىق وليمپيادا جانە سپورت كوميتەتى جانە جوعارىدا اتالعان تەلەارنا الدىندا كوپشىلىك الدىندا مالىمدەمە جاساۋ ۇسىنىلدى»، - دەلىنگەن حابارلامادا.

اۆتور

ەركەجان سماعۇلوۆا